ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ປີນີ້ ເຊກອງມີແຜນປູກຕົ້ນໄມ້ 800 ກວ່າເຮັກຕາ

   ທ່ານ ສົມຫວັງ ຂຳມະວົງ ກຳມະການພັກແຂວງ, ຫົວໜ້າພະແນກກະສິກຳ ແລະ ປ່າໄມ້ແຂວງເຊກອງ ໄດ້ລາຍງານໃຫ້ຮູ້ວ່າ: ປ່າໄມ້ເປັນແຫຼ່ງຊັບພະຍາກອນທຳມະຊາດ ອັນໃຫຍ່ຫຼວງ ແລະ ແມ່ນຊັບສົມບັດຂອງຊາດ ທີ່ມີບົດບາດສຳຄັນ ຕໍ່ການພັດທະນາເສດຖະກິດ-ສັງຄົມຂອງຊາດ, ເຮັດໃຫ້ສະພາບດິນຟ້າອາກາດ ຢູ່ໃນສະພາບປົກກະຕິ ແລະ ຄ້ຳຊູຊີວິດການເປັນຢູ່ ຂອງປະຊາຊົນບັນດາເຜົ່າ, ເຊິ່ງຍາມໃດພັກ-ລັດຖະບານກໍເຫັນໄດ້ຄວາມສຳຄັນ ຕໍ່ກັບການປົກປັກຮັກສາປ່າໄມ້ ໃຫ້ມີຄວາມຍືນຍົງຕະຫຼອດໄປ ເຊິ່ງປະຈຸບັນເນື້ອທີ່ປົກຫຸ້ມປ່າໄມ້ ແມ່ນຍັງເຫລືອ 40 ກວ່າ%, ດັ່ງນັ້ນພັກ-ລັດຖະບານ ໄດ້ຮັບຮອງ ແລະ ວາງຄາດໝາຍຮອດປີ 2020 ໃຫ້ອັດຕາປົກຫຸ້ມປ່າໄມ້ເຖິງ 70%; ສະນັ້ນ, ເນື່ອງໃນໂອກາດວັນທີ 1 ມິຖຸນາ ວັນປູກຕົ້ນໄມ້ແຫ່ງຊາດ ປີ 2017 ນີ້ ແຂວງເຊກອງໄດ້ວາງແຜນການປູກໄມ້ທັງໝົດ 800 ກວ່າເຮັກຕາ ( ha ), ກະກຽມເບ້ຍໄມ້ 5 ແສນກວ່າເບ້ຍ ເພື່ອສະໜອງໃຫ້ແກ່ວັນດັ່ງກ່າວ.

   ເນື່ອງໃນໂອກາດວັນປູກຕົ້ນໄມ້ແຫ່ງຊາດປີນີ້ ຢຸ່ ແຂວງເຊກອງ ໄດ້ຖືເປັນປາງບຸນໃຫຍ່ໜຶ່ງຂອງແຂວງ ກໍຄືອຳນາດການປົກຄອງຂອງແຕ່ລະຂັ້ນ, ພະແນກການ, ກົມກອງ, ທະຫານ-ຕຳຫຼວດ, ພໍ່ຄ້າຊາວຂາຍ, ຜູ້ປະກອບການທຸລະກິດ ຕະຫຼອດຮອດປະຊາຊົນບັນດາເຜົ່າໃຫ້ເປັນຂະບວນຟົດຟື້ນ ເຊິ່ງໃນ 800 ກວ່າເຮັກຕາ ໃນນີ້ປູກລວມໝູ່ (ສຳນັກງານອົງການປູກເປັນທາງການ) 16 ເຮັກຕາ, ປູກແບບຄອບຄົວ 222 ເຮັກຕາ, ປູກໄມ້ເປັນປ່າ 200 ເຮັກຕາ, ປູກໄມ້ເປັນເສດຖະກິດ 400 ເຮັກຕາ, ເຊິ່ງປະຈຸບັນໄດ້ກະກຽມເບ້ຍໄມ້ 5 ແສນກວ່າເບ້ຍ, ໃນນີ້ມີໂຄງການອະນຸລັກປ່າໄມ້ຕາມແລວເຊື່ອມຕໍ່ ກະກຽມ 135.000 ເບ້ຍ, 4 ຕົວເມືອງ 350.000 ເບ້ຍ, ຂະແໜງປ່າໄມ້ 26.669 ເບ້ຍ, ເຊິ່ງເບ້ຍໄມ້ທີ່ກະກຽມແມ່ນ: ໄມ້ຂະຍຸງ, ໄມ້ຈຳປາປ່າ, ໄມ້ແຕ້, ໄມ້ສັກ, ໄມ້ດູ່ທຳມະຊາດ, ໄມ້ບາກ, ໄມ້ແຕ້ຂ່າ, ໄມ້ກະຖິນນາລົງ, ໄມ້ແຄນ, ໄມ້ຍາງ, ໄມ້ໝາກຈອງ, ໄມ້ບົງແດງ...; ນອກນີ້ ຍັງມີແຜນຟື້ນຟູປ່າໄມ້ແບບທຳມະຊາດໃນ 3 ຕົວເມືອງຄື: ລະມາມ,ດາກຈຶງ ແລະ ກະລຶມ ເຊິ່ງປະກອບມີປະເພດປ່າຜະລິດ, ປ່າປ້ອງກັນ ແລະ ປ່າສະຫງວນ ມີ 2.340 ເຮັກຕາ, ເຊີ່ງເປັນການປົກປັກຮັກສາປ່າໄມ້ ໃຫ້ມີຄວາມຂຽວສົດງົດງາມ ແລະ ຮັກສາສະພາບແວດລ້ອມ ໃຫ້ມີຄວາມຍຶນຍົງຕື່ອີກ.
   ເບິ່ງລວມແລ້ວ ການປູກໄມ້ປີນີ້ ມີຂະບວນການເພີ່ມຂຶ້ນຫລາຍກວ່າປີກ່ອນ ເຊິ່ງໃນປີ 2016 ມີເນື້ອທີ່ປູກເປັນທາງການມີ 11,5 ເຮັກຕາ, ແຕ່ປີ2017 ນີ້ ໄດ້ກະກຽມເນື້ອທີ່ປູກ ເປັນທາງການ ມີ 16 ເຮັກຕາ, ຍ້ອນພາຍຫຼັງມີຄຳສັ່ງນາຍົກເລກທີ 15/ນຍ ອອກມາ ເຫັນວ່າ: ອຳນາດການປົກຄອງທ້ອງຖິ່ນ ໄດ້ມີການທຳລາຍທຸລະກິດໄມ້ແບບຊະຊາຍ, ການຂຸດຄົ້ນໄມ້ບໍ່ຖືກກົດໝາຍ ໃຫ້ຢຸດຕິໄປຢ່າງຊິ້ນເຊີງ; ສ່ວນມາດຕະການໃນການຄຸ້ມຄອງ ແລະ ປົກປັກຮັກສາ , ສຳລັບສ່ວນບຸກຄົນ ແມ່ນມອບໃຫ້ເຈົ້າຂອງຮັບຜິດຊອບເອງ, ສຳລັບພາກລັດ ໃຫ້ແຕ່ລະເມືອງມີບົດບັນທຶກສັນຍາ ການຮັກສາກັບແຕ່ລະບ້ານ ແລ້ວຈຶ່ງຂໍສະເໜີຄ່າປົກປັກຮັກສາ, ສຳລັບເຂດຟື້ນຟູປ່າ ໄດ້ກຳນົດຂອບເຂດ,ຕິດປ້າຍ, ມອບໃຫ້ບ້ານປົກປັກຮັກສາ ແລະ ມີກອງລາຕະເວນກວດກາປ່າໄມ້ຂອງບ້ານເປັນຜູ້ຮັບຜິດຊອບ.

   ໂອກາດນີ້ ທ່ານສົມຫວັງ ຂໍາມະວົງ ໄດ້ຮຽກຮ້ອງມາຍັງພະນັກງານ, ທະຫານ-ຕຳຫຼວດ, ພໍ່ຄ້າຊາວຂາຍ, ຜູ້ປະກອບການທຸລະກິດ ຕະຫຼອດຮອດປະຊາຊົນບັນດາເຜົ່າ ຈົ່ງເປັນເຈົ້າການສະໜັບສະໜູນ ແລະ ເຂົ້າຮ່ວມຂະບວນການປູກໄມ້ໃນຄັ້ງນີ້ ໃຫ້ເປັນຂະບວນຟົດຟື້ນ ເພື່ອເຮັດໃຫ້ວຽກງານດັ່ງກ່າວ ປະສົບຜົນສຳເລັດຕາມລະດັບຄາດໝາຍທີ່ວາງໄວ້; ນອກຈາກການປູກຕົ້ນໄມ້ໃນວັນປູກຕົ້ນໄມ້ແຫ່ງຊາດແລ້ວ ຂະບວນການປູກຕົ້ນໄມ້ ແມ່ນຍັງຈະໄດ້ສືບຕໍ່ປູກຈົນຮອດ ຕົ້ນເດືອນກັນຍາ 2017.
                                                                                       ຂ່າວ-ພາບ: ພຸດທະສອນ