ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ໂຄງການກໍ່ສ້າງ ຂົວຂ້າມນ້ຳເຊກອງສຳເລັດ 79,5%.

   

  ທ່ານ ຄຳເກັ່ງ ແກ້ວສຸວັນ ຮອງຫົວໜ້າໂຄງການກໍ່ສ້າງຂົວຂ້າມນ້ຳເຊກອງ ໄດ້ໃຫ້ສຳພາດຕໍ່ນັກຂ່າວໃຫ້ຮູ້ໃນວັນທີ 10 ເມສາ 2017 ນີ້ວ່າ: ປະຈຸບັນການກໍ່ສ້າງຂົວຂ້າມນ້ຳເຊກອງສຳເລັດແລ້ວ 79,5%, ເຊິ່ງໂຄງການດັ່ງກ່າວແມ່ນໄດ້ລົງມືກໍ່ສ້າງມາແຕ່ວັນທີ 4 ພະຈິກ 2014 ແລະ ຄາດວ່າຈະໃຫ້ສຳເລັດ ແລະ ເປີດນຳໃຊ້ໃນທ້າຍເດືອນມັງກອນ 2018.

  ການຈັດຕັ້ງປະຕິບັດໂຄງການກໍ່ສ້າງດັ່ງກ່າວໃນໄລຍະຜ່ານມາ ມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນ ດ້ານຄວາມສະດວກ ເຈົ້າຂອງໂຄງການ ກໍຄືທາງລັດຖະບານ ຕະຫລອດຮອດຄະນະນຳຂັ້ນແຂວງ ໄດ້ໃຫ້ຄວາມຮ່ວມມື ແລະ ພົວພັນປະສານງານເປັນຢ່າງດີ ເຮັດໃຫ້ການຈັດຕັ້ງປະຕິບັດໂຄງການດໍາເນີນໄປຕາມແຜນທີ່ວາງໄວ້, ແຕ່ກໍ່ຍັງພົບຄວາມຫຍຸ້ງຍາກໃນຫລາຍດ້ານເປັນຕົ້ນ: ການຈັດຕັ້ງປະຕິບັດໂຄງການກໍ່ສ້າງບໍ່ບັນລຸຕາມແຜນການ ເຊິ່ງ ຕາມແຜນການແມ່ນໃຫ້ສໍາເລັດ ແລະ ເປີດນຳໃຊ້ໃນຕົົ້ນປີ 2017 ຜ່ານມາ, ແຕ່ເນື່ອງຈາກວ່າການກໍ່ສ້າງມີຄວາມ ຜິດພາດທາງດ້ານເຕັກນິກບາງດ້ານ ໄດ້ມີການປັບປຸງແກ້ໄຂຄືນໃໝ່ ລວມທັງດ້ານສະພາບດິນຟ້າອາກາດບໍ່ເອື້ອອຳນວຍ ຄວາມສະດວກ ໂດຍສະເພາະແມ່ນລະດັບນ້ຳ ມີການເພີ່ມຂຶ້ນ ແລະ ລົດລົງ ບໍ່ປົກກະຕິ ເຮັດໃຫ້ການກໍ່ສ້າງຂົວມີຜົນກະທົບ ແລະ ຫຍຸ້ງຍາກ, ສະນັ້ນ ຈຶ່ງໄດ້ເພີ່ມໄລຍະການກໍ່ສ້າງຂຶ້ນຕື່ມອີກເປັນໄລຍະ 10 ເດືອນ ແລະ ຄາດວ່າຈະໃຫ້ສຳເລັດ ແລະ ເປີດນຳໃຊ້ໃນທ້າຍເດືອນມັງກອນ 2018 ນີ້.
  ຂົວຂ້າມນ້ຳເຊກອງມີຄວາມຍາວທັງໝົດແມ່ນ 300 ແມັດ, ກວ້າງ 11 ແມັດ, ມູນຄ່າການກໍ່ສ້າງທັງໝົດ 1.620.685.000 ເຢນ ( ໜຶ່ງຕື້ ຫົກຮ້ອຍຊາວລ້ານ ຫົກແສນ ແປດສິບຫ້າພັນເຢນ ຕະກຸນເງິນຍີ່ປຸ່ນ ), ຊຶ່ງທຶນດັ່ງກ່າວແມ່ນໄດ້ຮັບການຊ່ວຍເຫລືອຈາກລັດຖະບານຍີ່ປຸ່ນ 100%, ປະຈຸບັນໂຄງການກໍ່ສ້າງດັ່ງກ່າວແມ່ນສຳເລັດ 79,5%, ໃນນີ້ມີ 2 ໜ້າວຽກຄື: ການກໍ່ສ້າງເສັ້ນທາງເຂົ້າຂົວ ມີຄວາມຍາວທັງໝົດ 527 ແມັດ ສຳເລັດ 34,07% ຍັງແຕ່ຂັ້ນຕອນລົງເບັສຄັອດ ແລະ ປູຢາງ, ສຳລັບວຽກຂົວ ສຳເລັດແລ້ວ 84,6% ໃນນີ້້ສໍາເລັດວຽກເບຕົງໂຄງສ້າງພາກສ່ວນລຸ່ມຂົວ ແລະ ວຽກງານໜັກໆແມ່ນສຳເລັດແລ້ວ ແລະ ກຳລັງສືບຕໍ່ຂຸ້ນຂ້ຽວວຽກເບຕົງພາກສ່ວນເທິງຂົວ ແລະ ວຽກງານຍ່ອຍອື່ນໆ.
  ພາຍຫຼັງສຳເລັດການກໍ່ສ້າງຂົວຂ້າມນ້ຳເຊກອງແລ້ວ ຈະມີຜົນກະທົບໂດຍທັງກົງ ແລະ ທາງອ້ອອມຕໍ່ການພັດທະນາເສດຖະກິດ-ສັງຄົມຂອງແຂວງ, ໂດຍສະເພາະລັດຖະບານໄດ້ກຳນົດເອົາເສັ້ນທາງດັ່ງກ່າວ ເປັນເສັ້ນທາງ AEC ເພື່ອເຊື່ອມຕໍ່ຜ່ານບັນດາແຂວງພາກໃຕ້ຂອງລາວ ແລ້ວອອກສູ່ທະເລ ແລະ ໃນອະນາຄົດຈະມີການຂົນສົ່ງສິນຄ້າຕ່າງໆຈຳນວນຫຼາຍ ຈາກປະເທດໄທ ເຂົ້າມາຜ່ານແຂວງເຊກອງ ເພື່ອອອກສູ່ທ່າເຮືອ ແຂວງດາໜັງ ສສ ຫວຽດນາມ ເວົ້າລວມ, ພ້ອມທັງອຳນວຍຄວາມສະດວກໃນການໄປ-ມາຫາສູ່ ແລກປ່ຽນຊື້-ຂາຍສິນຄ້າຂອງປະຊາຊົນ, ໂດຍສະເພາະການຄົມມະນາຄົມຂົນສົ່ງໄປສູ່ເມືອງກະລຶມ ແລະ ເມືອງດາກຈຶງ ທີ່ມີຊາຍແດນຕິດຈອດກັບ ສສ ຫວຽດນາມ ໃຫ້ມີຄວາມສະດວກສະບາຍຂຶ້ນກວ່າເກົ່າ.
                                                                          ຂ່າວ-ພາບ: ພຸດທະສອນ