ວັນອັງຄານ, 17 ກໍລະກົດ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ ປາຖະກະຖາວັນສ້າງຕັ້ງສະຫະພັນກຳມະບານລາວຄົບຮອບ 61 ປີ

 

   ພິທີປະຖະກະຖາວັນ ສ້າງຕັ້ງສະຫະພັນກຳມະບານລາວ ຄົບຮອບ 61 ປີ ໄດ້ຈັດຂຶ້ນໃນຕອນເຊົ້າ ວັນທີ 1 ກຸມພາ 2017, ຢູທີ່ສະໂມສອນແຂວງ ໂດຍການເຂົ້າຮ່ວມເປັນປະທານຂອງ ທ່ານສີດາ ສຸວັນນະສາຍ ຮອງເລຂາພັກແຂວງ, ຜູ້ຊີ້ນຳວຽກງານ ອົງການຈັດຕັ້ງມະຫາຊົນ, ມີຄະນະບໍລິຫານງານສະຫະພັນກຳມະບານແຂວງ, ຫົວໜ້າຫລື ຮອງພະແນກການ, ກົມກອງ, ຄະນະໜ່ວຍກຳມະບານຮາກຖານອ້ອມຂ້າງແຂວງພ້ອມດ້ວຍສະມາຊິກເຂົ້າຮ່ວມ.
  ທ່ານສີດາ ສຸວັນນະສາຍ ຮອງເລຂາພັກແຂວງ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ໄດ້ຍົກໃຫ້ເຫັນປະຫວົດ ແຫ່ງການກຳເນີດ ແລະ ການຂະຫຍາຍຕົວຂອງສະຫະພັນກຳມະບານລາວ ໃນຄະໄຫຼອດໄລຍະ 61 ປີຜ່ານມາ, ເຊິ່ງທ່ານໄດ້ກ່າວວ່າ: ນັບຕັ້ງແຕ່ມື້ມີພັກຄອມມູນິດອິນດູຈີນນຳພາເປັນຕົ້ນມາ ກໍ່ຄື ພາຍຫຼັງການກໍ່ຕັ້ງພັກປະຊາຊົນລາວຂື້ນ ພັກກໍ່ໄດ້ເອົາໃຈໃສ່ ສ້າງ ແລະ ປັບປຸງ ບັນດາອົງການຈັດຕັ້ງມະຫາຊົນ ເພື່ອເປັນການປະຕິບັດຈຸດຢືນຂອງພັກທີ່ວ່າ: ຖືເອົາກໍາລັງແຮງແຮງມະຫາຊົນ, ຊົນຊັ້ນກໍາມະກອນ, ລັດທິມາກ-ເລນິນເປັນລະບົບແນວຄິດຊີ້ນໍາ-ນໍາພາ, ເຊິ່ງໄດ້ເຮັດໃຫ້ຂະບວນການຕໍ່ສູ້ ຂອງກຳມະກອນໄດ້ເລີ່ມມີຮູບການຈັດຕັ້ງ ແລະ ໄດ້ເຄື່ອນໄຫວປະຕິບັດໜ້າທີ່ຂອງຕົນ ເປັນຕົ້ນ, ກຳມະບານຢູ່ບໍ່ກົ່ວໂພນຕິ້ວລະຫວ່າງປີ 1932 ເຖິງ ປີ 1933, ເປັນຂີດໝາຍແຫ່ງບາດລ້ຽວໃໝ່ ຂອງຂະບວນການຕໍ່ສູ້ຊົນຊັ້ນກຳມະກອນລາວ, ຈາກຂະບວນການເກີດຂຶ້ນເອງ ກາຍມາເປັນຂະບວນການ ທີ່ມີສະຕິທາງຊົນຊັ້ນ, ຕໍ່ສູ້ທວງເອົາສິດຜົນປະໂຫຍດອັນຊອບທຳ ທາງດ້ານເສດຖະກິດ ແລະ ສັງຄົມ ເຊິ່ງຕິດແໜ້ນກັບການຕໍ່ສູ້ທາງດ້ານການເມືອງ ດ້ວຍຫຼາຍຮູບການ, ມາເຖິງວັນທີ 1 ກຸມພາ 1956 ກົມການເມືອງສູນກາງພັກ ໄດ້ມີມະຕິຕົກລົງ ສ້າງຕັ້ງອົງການຈັດຕັ້ງກຳມະບານລາວ ຂຶ້ນຢ່າງເປັນທາງການ, ຈຸດປະສົງເພື່ອສືບຕໍ່ໂຄສະນາຂົນຂວາຍ, ເຕົ້າໂຮມກຳມະກອນ, ຊາວຜູ້ອອກແຮງງານລາວບັນດາເຜົ່າ ໃຫ້ມີຄວາມຕື່ນຕົວ, ມີນ້ຳໃຈຮັກຊາດ, ມີທັດສະນະຊົນຊັ້ນກຳມະກອນ, ມີຄວາມຕື່ນຕົວທາງດ້ານຊົນຊັ້ນ ຢ່າງຈະແຈ້ງ, ເສີມຂະຫຍາຍປະຊາທິປະໄຕ, ມີລະບຽບແບບແຜນ ເປັນພົນລະເມືອງດີຂອງຊາດ ສົ່ງເສີມການມີວຽກເຮັດງານທຳ ແລະ ເປັນຕົວແທນໃຫ້ແກ່ ການປົກປ້ອງສິດຜົນປະໂຫຍດ ອັນຊອບທຳໃຫ້ແກ່ ກຳມະກອນ ຊາວຜູ້ອອກແຮງງານລາວບັນດາເຜົ່າ ກາຍເປັນກຳລັງແຮງເຂົ້າຮ່ວມຢ່າງຕັ້ງໜ້າ ໃນການຕໍ່ສູ້ດູ້ຊາດ ປົກປັກຮັກສາ ແລະ ພັດທະນາປະເທດຊາດ ຕາມເສັ້ນທາງກ້າວຂຶ້ນສູ່ສັງຄົມນິຍົມ.

  ນອກນີ້ ທ່ານ ສຸວັນ ວິນາລັດ ຮອງປະທານສະຫະພັນກຳມະບານແຂວງ ຍັງໄດ້ຜ່ານເນື້ອໃນ ຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ ເພື່ອເປັນພື້ນຖານ ໃນການພັດທະນາ ສະຫະພັນກຳມະບານແຕ່ລະຂັ້ນ ໃຫ້ມີຄວາມເຂັ້ມແຂງຮອບດ້ານ ແນໃສ່ຈັດຕັ້ງປະຕິບັດ ຂະບວນການແຂ່ງຂັນຮັກຊາດ ແລະ ພັດທະນາຢູ່ຂົງເຂດກຳມະບານ ໃຫ້ປະກົດຜົນເປັນຈິງ ພາຍຫລັງຜ່ານແລ້ວ ບັນດາຄະນະຮາກຖານກຳມະບານອ້ອມຂ້າງແຂວງ ໄດ້ຕາງໜ້າສະມາຊິກທຸຄົນ ຂຶ້ນຈັບມືກັນ ເພື່ອພ້ອມກັນປະຕິບັດ ເນື້ອໃນຂໍ້ແຂ່ງຂັນດັ່ງກ່າວ ແນໃສ່ສ້າງຄວາມເປັນເຈົ້າໃຫ້ກຳມະບານ ໃນໄລຍະໃໝ່ ກໍຄືໄລຍະຂອງການເຊື່ອມໂຍງກັບສາກົນ ຕາມແນວທາງນະໂຍບາຍຂອງພັກ ໃຫ້ປະກົດຜົນເປັນຈິງເທື່ອລະກ້າວ.
                                                                               ຂ່າວ-ພາບ: ພຸດທະສອນ