ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຖະແຫຼງຜົນສຳເລັດກອງປະຊຸມສະໄໝສາມັນເທື່ອທີ 3 ສພຊ ຊຸດທີ VIII

   ທ່ານ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນແຂວງເຊກອງ, ທັງເປັນສະມາຊິກສະພາແຫ່ງຊາດຊຸດທີ VIII ເຂດເລື່ອກຕັ້ງທີ 16 ໄດ້ລາຍງານກ່ຽວກັບ ຜົນສຳເລັດຂອງກອງປະຊຸມ ຕໍ່ນັກຂ່າວ ເມື່ອວັນທີ 27 ພຶດສະພານີ້ວ່າ: ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ຊຸດທີ VIII ທີ່ໄດ້ດຳເນີນເປັນເວລາ 17 ວັນ ແຕ່ວັນທີ 25 ເມສາ ຫາ 18 ພຶດສະພາ 2017 ຢູທີ່ນະຄອນຫຼວງວຽງຈັນ ໄດ້ອັດລົງດ້ວຍຜົນສຳເລັດອັນຈົບງາມບັນລຸໄດ້ຕາມຈຸດປະສົງ ແລະ ຄາດໝາຍທີ່ວາງໄວ້.
   ທ່ານ ພອນເພັດ ຄິວລະວົງ ໃຫ້ຮູ້ວ່າ: ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ໄດ້ພິຈາລະນາ ຕົກລົງ ແລະ ຮັບຮອງຫຼາຍບັນຫາ ເປັນຕົ້ນ: ກອງປະຊຸມໄດ້ພິຈາລະນາ ແລະ ຮັບຮອງເອົາ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງ ຄົມ, ແຜນງົບປະມານແຫ່ງລັດ 6 ເດືອນຜ່ານມາ ແລະ ວຽກງານຈຸດສຸມທ້າຍປີ 2017; ພິຈາລະນາຮັບຮອງເອົາ ບົດລາຍງານກ່ຽວກັບ ການຄຸ້ມຄອງສິນຄ້າ ແລະ ມາດຕະການຈຳນວນໜຶ່ງ ເພື່ອຫຼຸດຜ່ອນຜົນກະທົບຕໍ່ການຜະລິດ ແລະ ຊີວິດການເປັນຢູ່ຂອງປະຊາຊົນ, ໄດ້ພິຈາລະນາຮັບຮອງເອົາ ບົດລາຍງານ ຂອງອົງການໄອຍະການປະຊາຊົນສູງສຸດ ກ່ຽວກັບການປະຕິບັດສິດສັ່ງຟ້ອງຄະດີຂຶ້ນສານ ແລະ ການເຂົ້າຮ່ວມການດຳເນີນຄະດີແພ່ງ ໃນທີ່ປະຊຸມສານ; ບົດລາຍງານຂອງສານປະຊາຊົນສູງສຸດ ກ່ຽວກັບການດຳເນີນຄະດີ ຢູ່ສານຂັ້ນຕົ້ນ ແລະ ສານອຸທອນໄລຍະຜ່ານມາ ແລະ ທິດທາງປັບປຸງ, ຍົກສູງຄຸນນະພາບວຽກງານໃນຊຸມປີຕໍ່ໜ້າ, ໄດ້ພິຈາລະນາຮັບຮອງເອົາ ບົດສະຫຼຸບການເຄື່ອນໄຫວວຽກງານ ຂອງອົງການກວດສອບແຫ່ງລັດ ໄລຍະ 5 ປີຜ່ານມາ ແລະ ແຜນການເຄື່ອນໄຫວ 5 ປີຕໍ່ໜ້າ; ພິຈາລະນາຮັບຮອງເອົາທ່ານ ປອ ນາງ ວຽງທອງ ສີພັນດອນ ເປັນປະທານອົງການກວດສອບແຫ່ງລັດ ອີກສະໄໝໜຶ່ງ ຕາມການສະເໜີຂອງປະທານປະເທດ, ນອກນັ້ນ ກໍ່ໄດ້ຮັບຟັງການລາຍງານ ຂອງຄະນະປະຈຳສະພາແຫ່ງຊາດ ກ່ຽວກັບການປະຕິບັດໜ້າທີ່ ລະຫວ່າງ ສອງກອງປະຊຸມ ແລະ ທິດທາງວຽກງານ 9 ເດືອນປີ 2017; ພິຈາລະນາຮັບຮອງເອົາ ການສະເໜີແຕ່ງຕັ້ງທ່ານ ປທ ອຳໄພ ຈິດມານົນ ສະມາຊິກສະພາແຫ່ງຊາດ ເຂດເລືອກຕັ້ງທີ 16 ເປັນຮອງປະທານກຳມາທິການກົດໝາຍ ຕາມການສະເໜີຂອງຄະນະປະຈຳສະພາແຫ່ງຊາດ ພ້ອມນັ້ນ ກອງປະຊຸມໄດ້ພິຈາລະນາຮັບຮອງເອົາກົດໝາຍ 14 ສະບັບໃນຂົງເຂດເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ການປົກຄອງ ແລະ ຍຸຕິທຳ, ອົງການຈັດຕັ້ງມະຫານຊົນ ແລະ ການຕ່າງປະເທດ ຊຶ່ງເປັນການເພີ່ມເຄື່ອງມືຄຸ້ມຄອງລັດ, ຄຸ້ມຄອງເສດ ຖະກິດ-ສັງຄົມໃຫ້ນັບມື້ສົມບູນຄົບຖ້ວນຂຶ້ນ.
   ທ່ານ ພອນເພັດ ຄິວລະວົງ ຍັງໃຫ້ຮູ້ອີກວ່າ: ໂດຍອີງໃສ່ລັດຖະທຳມະນູນມາດຕາ 57; ກົດໝາຍ ວ່າດ້ວຍສະພາປະຊາຊົນແຂວງ ມາດຕາ 60 ແລະ ລະບຽບກ່ຽວກັບການດຳເນີນກອງປະຊຸມ, ສະພາປະຊາຊົນແຂວງເຊກອງ ຈະໄດ້ໄຂຂື້ນໃນກາງເດືອນມິຖຸນາ 2017 ນີ້ ໂດຍໃນກອງປະຊຸມຈະໄດ້ພິຈາລະນາ ແລະ ຮັບຮອງເອົາບັນຫາສຳຄັນຕ່າງໆ ທີ່ເປັນພື້ນຖານຂອງແຂວງ ເປັນຕົ້ນ; ແມ່ນວຽກງານອົງການປົກຄອງແຂວງ; ວຽກງານຕຸລາການ ແລະ ບົດລາຍງານຂອງຄະນະປະຈຳສະພາປະຊາຊົນແຂວງ.

                                                                ( ຂ່າວພາບ : ປີຊາ ສິງສັກສິດ )