ວັນຈັນ, 19 ພະຈິກ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ສຍ ຫ້ອງວ່າການແຂວງເຊກອງ ຮັບຮອງເປັນໜ່ວຍ 3 ດີໄລຍະI

 

ສຍ ຫ້ອງວ່າການແຂວງເຊກອງ ຮັບຮອງເປັນໜ່ວຍ 3 ດີໄລຍະI
ຂ່າວ-ພາບ: ພຸດທະສອນ
     ໃນຕອນບ່າຍ ວັນທີ 4 ຕຸລາ 2018 ໜ່ວຍສະຫະພັນແມ່ຍິງ ຫ້ອງວ່າການແຂວງ ເຊກອງ ໄດ້ຈັດພິທີຮັບຮອງ ໜ່ວຍສະພັນແມ່ຍິງ 3 ດີ ໄລຍະ I ປີ 2016- 2017 ແລະ ເປິດບັ້ນແຂ່ງຂັນ 3 ດີໄລຍະ II ປີ 2018-2019. ໂດຍການເຂົ້າຮ່ວມ ຂອງທ່ານ ນາງ ວິໄລວັນ ດາລາສິນ ຮອງປະທານ ສະຫະພັນແມ່ຍິງ ແຂວງ, ທ່ານ ໂພໄຊ ພິມມະສອນ ຮອງເລຂາໜ່ວຍພັກ, ຮອງຫົວໜ້າຫ້ອງວ່າການແຂວງ, ແຂກຖືກເຊີນ ຈາກໜ່ວຍສະຫະພັນແມ່ຍິງ ຂົງເຂດພັກ-ພະນັກງານ ພ້ອມດ້ວຍສະມາຊິກ ພາຍໃນໜ່ວຍ ເຂົ້າຮ່ວມ.
   ທ່ານ ນາງ ຄໍາເລັດ ທອງສົມສະໜິດ ປະທານໜ່ວຍສະຫະພັນແມ່ຍິງ ຫ້ອງວ່າການແຂວງ ໄດ້ຜ່ານບົດສະຫຼຸບ ຕີລາຄາການຈັດຕັ້ງປະຕິບັດ ວຽກງານ 3 ດີ ໄລຍະ I ປີ 2016-2017 ເຊິ່ງໄດ້ປະຕິບັດຕາມ 4 ບາດກ້າວຄື: ການກະກຽມ, ການເປີດຂະບວນການ ແຂ່ງຂັນ 3 ດີ, ການຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດ ຂະບວນການ 3 ດີ ແລະ ການສະຫຼຸບຕີລາຄາ ແລະ ການຍ້ອງຍໍ ເຊິ່ງໃນໄລະ 2 ປີຜ່ານມາ ຄະນະໜ່ວຍ ສຍ ພວກເຮົາ ໄດ້ເອົາໃຈໃສ່ ໃນການນໍາພາ ການປະຕິບັດ ຂໍ້ແຂ່ງຂັນ 3 ດີ ໄປຄຽງຄູ່ກັບ ການຈັດຕັ້ງປະຕິບັດ ແຜນການ ຂອງຄະນະໜ່ວຍພັກ ພ້ອມທັງໄດ້ມີການຕິດຕາມ, ກວດກາ, ປະເມີນຜົນ ແລະ ສະຫຼຸບລາຍງານ ການຈັດຕັ້ງປະຕິບັດ ຂໍ້ແຂ່ງຂັນ 3 ດີໃນແຕ່ລະໄລຍະ, ນອກນີ້ໄດ້ເອົາໃຈໃສ່ ສຶກສາອົບຮົມ ການເມືອງ-ແນວຄິດ ໃຫ້ແກ່ສະມາຊິກຢ່າງ ເປັນປົກກະຕິ ແລະ ໄດ້ເປີດຂະບວນ ເຊື່ອມຊຶມ ແລະ ແຂ່ງຂັນ 3 ດີ ໄລຍະ I ປີ 2016-2017, ມີຜູ້ເຂົ້າຮ່ວມທັງໝົດ 37 ສະຫາຍ, ຊາຍ 4 ສະຫາຍ ແລະ ສະມາຊິກ ສຍ ເຂົ້າຮ່ວມແຂ່ງຂັນ 27 ສະຫາຍ ເທົ່າກັບ 100% ແລະ ສາມາດປະເມີນ, ຄັດເລືອກ ສະມາຊິກທີ່ມີຜົນງານດີເດັ່ນຄື: ພົນລະເມືອງດີ 27 ສະຫາຍ ເທົ່າກັບ 100%, ພັດທະນາດີ 25 ສະຫາຍ ເທົ່າກັບ 92,5%, ຄອບຄົວດີ 27 ສະຫາຍ, ເທົ່າກັບ 100%, ສະມາຊິກ 3 ດີ ປະເພດ I ມີ 25 ສະຫາຍ, ເທົ່າກັບ 92,5%, ປະເພດ II ມີ 2 ສະຫາຍ ເທົ່າກັບ 7,4%ຂອງ ສະມາຊິກທັງໝົດ.
     ພ້ອມນີ້ ຍັງໄດ້ວາງແຜນການເຄື່ອນໄຫວ ເປີດບັ້ນຂະບວນການແຂ່ງຂັນ 3 ດີ ໄລຍະ II ປີ 2018-2019 ເຊິ່ງຄະນະໜ່ວຍ ໄດ້ປຸກລະດົມສະມາຊິກ ຂອງຕົນເປັນເຈົ້າການ ໃນການສ້າງຕົນເອງ ໃຫ້ມີຄວາມເຂັ້ມແຂງ, ມີຄວາມຮູ້, ຄວາມສາມາດ ເປັນແບບຢ່າງ ທີ່ດີໃຫ້ແກ່ມະຫາຊົນ ເຮັດໃຫ້ຕົນເອງ ກາຍເປັນສະມາຊິກ 3 ດີ ແລະ ສ້າງໜ່ວຍໃຫ້ກາຍເປັນໜ່ວຍ 3 ດີ, ຈັດຕັ້ງການເຊື່ອມຊຶມ ເນື້ອໃນຂໍ້ແຂ່ງຂັນ 3 ດີ ພ້ອມທັງ ເປີດຂະບວນການ ແຂ່ງຂັນ 3 ດີໃຫ້ໄດ້100%, ສູ້ຊົນສ້າງສະມາຊິກ ໃຫ້ກາຍເປັນ ພົນລະເມືອງດີ 100%, ພັດທະນາດີ ໃຫ້ໄດ້ 90% ຂຶ້ນໄປ, ຄອບຄົວດີ ໃຫ້ໄດ້ 90% ຂຶ້ນໄປ, ສ້າງສະມາຊິກ 3 ດີໃຫ້ໄດ້ 90%ຂຶ້ນໄປ.