ວັນອັງຄານ, 17 ກັນຍາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເປີດແລ້ວອະນຸສາວະລີອົງແກ້ວວິລະບຸລຸດຂອງຊາດ

 

                                            ເປີດແລ້ວອະນຸສາວະລີອົງແກ້ວວິລະບຸລຸດຂອງຊາດ
•    ຂ່າວ : ພຸດທະສອນ
    ( ເຊກອງ, ວັນທີ 13/06/2019 ) * ອະນຸສາວະລີອົງແກ້ວ ວິລະບຸລຸດຂອງຊາດລາວ ທີ່ປະດິດສະຖານ ຢູ່ຫລັກສອງ ບ້ານ ໃໝ່ຫົວເມືອງ ເມືອງລະມາມ ແຂວງເຊກອງ ໄດ້ເປີດນຳໃຊ້ ຢ່າງເປັນທາງການ ໃນວັນທີ 13 ມິຖຸນາ ນີ້ ໂດຍ ທ່ານ ປອ ຄຳພັນ ພົມມະທັດ ກຳມະການ ກົມການເມືອງ ສູນກາງພັກ, ຄະນະເລຂາທິການ ສູນກາງ, ຫົວໜ້າ ຫ້ອງວ່າການ ສູນກາງພັກ, ທ່ານ ຄໍາເຜີຍ ບຸດດາວຽງ ກໍາມະການ ສູນກາງພັກ, ເລຂາພັກແຂວງ, ເຈົ້າແຂວງໆເຊກອງ; ພ້ອມນີ້ ກໍມີການນຳ 3 ແຂວງ ພາກໃຕ້ຄື: ແຂວງສາລະວັນ, ຈໍາປາສັກ, ອັດຕະປື, ພາກສ່ວນກ່ຽວຂ້ອງ ແລະ ມວນຊົນແຂວງ ດັ່ງກ່າວເຂົ້າຮ່ວມ.


        ທ່ານ ຖາວອນ ພົມມະໄລລຸນ ຮອງເຈົ້າແຂວງ ເຊກອງ ກ່າວວ່າ: ທ່ານ ອົງແກ້ວ ແມ່ນຜູ້ນຳທີ່ໂດດເດັ່ນ ແລະ ສຳຄັນ ໃນສະໄໝ ຕໍ່ສູ້ຕ້ານຝຣັ່ງ ແລະ ຈາກການເປັນຜູ້ໜຶ່ງ ທີ່ມີນ້ຳໃຈ ຮັກຊາດ ຍອມເສຍສະລະຊີວິດ ເພື່ອຊາດ ເພື່ອປະຊາຊົນຢ່າງແທ້ຈິງ, ທ່ານໄດ້ ເຕົ້າໂຮມ ຄວາມສາມັກຄີ ປະຊາຊົນລາວ ບັນດາເຜົ່າ ຢູ່ເຂດພາກໃຕ້ ລາວລຸກຮື້ຂຶ້ນ ຕໍ່ສູ້ປົດປ່ອຍ ປະ ເທດຊາດ ໃຫ້ຫລຸດພົ້ນ ຈາກການກົດຂີ່ ຂູດຮີດ ຂອງພວກສັກດິນນາ ໃນປະເທດ ແລະ ພວກຈັກກະພັດ ຮຸກຮານ ໂດຍສະເພາະ ພວກລ່າເມືອງ ຂຶ້ນຝຣັ່ງ ເພື່ອຄວາມ ເປັນເອກະລາດ ປົກປັກຮັກສາ ຜືນແຜ່ນດິນ ຂອງຕົນໄວ້ໃຫ້ຍືນຍົງ ເຊິ່ງການກໍ່ສ້າງ ສວນອະນຸສາວະລີ ອົງແກ້ວ ເພື່ອຈາລຶກວິລະກໍາ ອັນລໍ້າເລີດ ແລະ ເພື່ອເຮັດໃຫ້ຄົນຮຸ່ນຫລັງ ໄດ້ຮຽນເອົາຄຸນງາມຄວາມດີ  ແລະ ບົດຮຽນອັນລໍ້າຄ່າ ທັງເປັນການເສີມຂະຫຍາຍ ມູນເຊື້ອຮັກຊາດ, ມູນເຊື້ອສາມັກຄີ ປອງດອງ ຕໍ່ສູ້ບໍ່ຍອມຈຳນົນ ຂອງເພິ່ນຈົນໄດ້ ຮັບນາມມະຍົດເປັນ : “ ວິລະບູລຸດ ຂອງຊາດລາວ ”. ຂະນະດຽວກັນ ກໍເປັນສັນຍະລັກ ແຫ່ງດິນແດນຖີ່ນກຳເນີດ ວິລະຊົນຄົນກ້າ ແລະ ເປັນສະຖານທີ່ ສັກກາລະບູຊາ ທັງເປັນສູນລວມຈິດໃຈ ເຕົ້າໂຮມຄວາມສາມັກຄີ ຂອງປະຊາຊົນບັນດາເຜົ່າ ຄຽງຄູ່ກັບ ຫລັກເມືອງ, ເປັນບ່ອນອົບຮົມບົ່ມ ສອນຄົນຮຸ່ນຫລັງ ໃຫ້ຮູ້ຮັກເຊື້ອແພງຊາດ, ຮູ້ຄຽດແຄ້ນສັດຕູ ຂອງຊາດ ທັງເປັນການເສີມຂະຫຍາຍ ລັດທິວິ ລະຊົນ.

 

 


        ຂະນະທີ່ ທ່ານ ບູ່ໄຊ ໄຊຍະເສນ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງເຊກອງກ່າວວ່າ: ຍ້ອນເຫັນໄດ້ ວິລະກຳອັນລ້ຳເລີດ, ຄຸນງາມຄວາມດີ ຂອງເພິ່ນ ທີ່ມີຕໍ່ປະເທດຊາດ, ກົມການເມືອງ ສູນກາງພັກ ໄດ້ຕົກລົງໃຫ້ ແຂວງເຊກອງ ສ້າງອະນຸສາວະລີ ແລະ ຫລໍ່ຮູບທ່ານ ອົງແກ້ວ ໃນເເນື້ອທີ່ 4 ເຮັກຕາ ແລະ ດໍາເນີນການກໍ່ສ້າງ ອາຄານ, ນ້ຳພຸ, ສວນສາທາລະນະ ແລະ ເດີ່ນອະເນກປະສົງ, ຕາຂ່າຍໄຟຟ້າ ແລະ ຖານຕັ້ງຮູບຫລໍ່ອົງແກ້ວ ໂດຍມີມູນຄ່າ 23 ຕື້ກວ່າກີບ. ສ່ວນ ຮູບຫລໍ່ ອົງແກ້ວຫລໍ່ ດ້ວຍທອງປະສົມສູງ 4,90 ແມັດ, ໜັກ 6 ໂຕນມູນຄ່າ 1,8 ຕື້ກວ່າກີບ.