ວັນອັງຄານ, 17 ກັນຍາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຈົ້າແຂວງອຸດົມໄຊ ເຄື່ອນໄຫວເຮັດວຽກ ແລະແລກປ່ຽນບົດຮຽນ ຢູ່ແຂວງເຊກອງ

ຂ່າວ: ພຸດທະສອນ

   ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງ-ແຂວງອຸດົມໄຊ ພ້ອມຄະນະ ໄດ້ເຄື່ອນໄຫວເຮັດວຽກ, ແລກປ່ຽນ ແລະແລກຖອດຖອນບົດຮຽນ ແຂວງເຊກອງ ໃນວັນທີ 21 ມີນາ 2019 ຢູ່ທີ່ຫ້ອງປະຊຸມຊັ້ນ3 ຫ້ອງວ່າການແຂວງເຊກອງ ໂດຍການຕ້ອນຮັບຂອງທ່ານ ຖາວອນ ພົມມະໄລລຸນ ກໍາມະການປະຈໍາພັກແຂວງ, ຮອງເຈົ້າແຂວງ-ແຂວງເຊກອງ ພ້ອມດ້ວຍຄະນະຈາກບັນດາຂະແໜງການອ້ອມຂ້າງແຂວງ ໄດ້ໃຫ້ການຕ້ອນຮັບຢ່າງອົບອຸ່ນ.

   ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ໄດ້ລາຍງານສະພາບຈຸດພິເສດ ແລະການຈັດຕັ້ງແຜນພັດທະນາເສດຖະກິດ-ສັງຄົມຂອງແຂວງປະຈໍາປີ 2018 ຕິດພັນກັບການກະກຽມຈັດຕັ້ງດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍຫຍໍ້ ເຊິ່ງທ່ານໃຫ້ຮູ້ວ່າ: ສໍາລັບນະໂຍບາຍ, ຍຸດທະສາດ, ເປົ້າໝາຍພັດທະນາເສດຖະກິດ-ສັງຄົມ ແມ່ນສືບຕໍ່ບຸກທະລຸທັງ 4 ດ້ານ, ການພັດທະນາຊົນນະບົດແກ້ໄຂຄວາມທຸກຍາກ ຕິດພັນກັບ 4 ເນືອໃນ 4 ຄາດໝາຍ, ການປະຕິບັດຂໍ້ແຂ່ງຂັນຮັກຊາດ ແລະພັດທະນາ, ການປະຕິບັດບັນດາຕົວເລກຄາດໝາຍການພັດທະນາແບບຍືນຍົງ( SDG) ໃນ 18 ຕົວຊີ້ວັດ, ວຽກງານ 3 ສ້າງ, ການແບ່ງຂັ້ນຄຸ້ມຄອງໃນສາຍຕັ້ງສາຍຂວາງລະຫວ່າງແຂວງ, ເມືອງ, ບ້ານ ເພື່ອການພັດທະນາກະສິກໍາ-ອຸດສະຫະກໍາເປັນສິນຄ້າ, ພະລັງງານ ແລະບໍ່ແຮ່, ການບໍລິການການທ່ອງທ່ຽວ ແລະພັດທະນາການທ່ອງທ່ຽວ, ເຊິ່ງຄະນະພັກແຂວງໄດ້ອອກມະຕິຮັບຮອງເອົາ 4 ແຜນງານໃຫຍ່ເປັນບູລິມະສິດຂອງແຂວງ; ສໍາລັບການພັດທະນາເສດຖະກິດ-ສັງຄົມໃນ 1 ປີຜ່ານມາ ເຫັນວ່າແຂວງພວກເຮົາຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂອງແຂວງສືບຕໍ່ຂະຫຍາຍດ້ວຍຈັງຫວະໝັ້ນທ່ຽງເພີ່ມຂຶ້ນ 8,3%, ເຊິ່ງຫຼຸດແຜນການທີ່ວາງໄວ້ເລັກນ້ອຍ ເນື່ອງຈາກຜົນກະທົບຈາກປັດໃຈພາຍນອກ ( ແຜນ 9,3%), ເຮັດໃຫ້ມູນຄ່າລວມຍອດລາຍຮັບພາຍໃນສະເລ່ຍໃສ່ປະຊາກອນປະມານ 12,98 ລ້ານກີບ ເທົ່າກັບ 1.623 ໂດລາສະຫະລັດຕໍ່ຄົນຕໍ່ປີ ໃນນັ້ນ ຂະແໜງກະສິກຳຂະຫຍາຍຕົວ 5,81% ກວມເອົາ 40,54%, ຂະແໜງອຸດສະຫະກໍາ 9,62% ກວມເອົາ 22,98%, ຂະແໜງບໍລິການ 10,35% ກວມເອົາ 36,48%; ການຂຸດຄົ້ນເກັບລາຍຮັບເຂົ້າງົບປະມານຂອງແຂວງປະຕິບັດໄດ້ 93%ຂອງແຜນການດັດແກ້; ການກະກຽມກອງປະຊຸມໃຫຍ່ 3 ຂັ້ນຂອງພັກ ໄດ້ເປັນເຈົ້າການຈັດຕັ້ງຜັນຂະຫຍາຍ ແລະປະຕິບັດຕາມເນື້ອໃນຄໍາສັ່ງຂອງຂະນະເລຂາທິການສູນກາງພັກ ແລະຄໍາແນະນໍາຂອງຄະນະຈັດຕັ້ງສູນກາງພັກ, ມາຮອດປະຈຸບັນໄດ້ສໍາເລັດການດໍາເນີນກອງປະຊຸມໃຫຍ່ຄະນະພັກ, ໜ່ວຍພັກຮາກຖານທົ່ວແຂວງ 284 ໜ່ວຍ, ກວມເອົາ 58,55% ຂອງຈໍານວນໜ່ວຍພັກທັງໝົດທົ່ວແຂວງ.

     ໃນໂອກາດທີ່ໄດ້ເຄື່ອນໄຫວເຮັດວຽກ ແລະແລກປ່ຽນ, ຖອດຖອນບົດຮຽນ ຢູ່ແຂວງເຊກອງໃນຄັ້ງນີ້ ທ່ານ ປອ ຄຳພັນ ເຜີຍຍະວົງ ພ້ອມຄະນະຍັງໄດ້ເຄື່ອນໄຫວຢ້ຽມຢາມພື້ນຖານການຜະລິດ ແລະຄອບຄົວຕົວແບບ, ກຸ່ມຜະລິດເປັນສິນຄ້າ ຢູ່ເມືອງທ່າແຕງແຂວງເຊກອງຕື່ມອີກ; ນອກນັ້ນ ທ່ານຍັງໄດ້ເຄື່ອນໄຫວແລກປ່ຽນບົດຮຽນຢູ່ບັນດາແຂວງພາກໃຕ້ຕື່ມອີກ.