ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຖວທ ແຂວງເຊກອງ ແຕ່ງຕັ້ງຮອງຫົວໜ້າພະແນກ

• ຂ່າວ : ພຸດທະສອນ
          ວັນທີ 21 ກຸມພາ 2019 ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ໄດ້ຈັດພິທີປະກາດການຈັດຕັ້ງ ໂດຍການເຂົ້າຮ່ວມ ມີ ທ່ານ ປອ. ຄໍາພຽມ ບົວລະພາ ຮອງເລຂາພັກ ແຂວງເຊກອງ, ທ່ານ ບູ່ໄຊ ໄຊຍະເສນ ຫົວໜ້າພະແນກ ຖວທ ແຂວງ, ພ້ອມດ້ວຍ ຫົວໜ້າ - ຮອງພະແນກ, ຫ້ອງການ, ອົງການຈັດຕັ້ງ ມະຫາຊົນ ແລະ ວິຊາການກ່ຽວຂ້ອງເຂົ້າຮ່ວມ.
           ໃນພິທີທ່ານ ນາງ ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງ ຂອງ ທ່ານເຈົ້າແຂວງໆເຊກອງ ສະບັບ ເລກທີ 02 ແລະ 03/ຈຂ ລົງວັນທີ 11 ກຸມພາ 2019 ວ່າດ້ວຍ ຍົກຍ້າຍ ແລະ ແຕ່ງຕັ້ງພະນັກງານ ການນໍາ ຂອງແຂວງເຊກອງ ໂດຍໄດ້ຕົກລົງ ຍົກຍ້າຍ ແລະ ແຕ່ງຕັ້ງ ທ່ານ ນາງ ວຽງສະໄໝ ວົງວິຈິດ ຮອງຄະນະບໍລິຫານງານ ຊາວໜຸ່ມປະຊາຊົນປະຕິວັດລາວ ແຂວງໄປຮັບໜ້າທີ່ໃໝ່ ເປັນຮອງຫົວໜ້າພະແນກ ຖວທ ແຂວງເຊກອງ.

 


        ໃນໂອກາດເຂົ້າຮ່ວມ ທ່ານ ປອ ຄໍາພຽມ ບົວລະພາ ໄດ້ມີຄໍາເຫັນ ໂອ້ລົມ ໂດຍເນັ້ນ ໃຫ້ຜູ້ທີ່ໄດ້ຮັບ ການແຕ່ງຕັ້ງ ຈົ່ງອຸ່ນອ່ຽງ ທຸ່ນທ່ຽງ ໃນການປະຕິບັດ ໜ້າທີ່ ວຽກງານ ແລະ ເອົາໃຈໃສ່ເຊີດຊູ ຄວາມສາມັກຄີ ເປັນເອກະພາບ ໃນໝູ່ຄະນະ, ປະຕິບັດຫຼັກການ ລວມສູນ ປະຊາທິປະໄຕ, ແບ່ງງານ ແບ່ງຄວາມຮັບຜິດຊອບ ຈະແຈ້ງ ເພື່ອເສີມສ້າງ ຄວາມຮູ້ຄວາມສາມາດ ໃຫ້ສູງຂຶ້ນ, ເສີມຂະຫຍາຍ ສິດເປັນເຈົ້າ ຂອງບຸກຄົນ ຢ່າງຕັ້ງໜ້າ, ມີຄວາມເຂັ້ມງວດ ຕໍ່ການປະຕິບັດ ລະບຽບຂອງພັກ, ກົດຫຼາຍຂອງລັດ ຢ່າງເຂັ້ມງວດ ເພື່ອເປັນແບບຢ່າງ ນໍາໜ້າທີ່ດີ ໃຫ້ແກ່ມະຫາຊົນ, ຮັບຟັງການຕໍານິ ສົ່ງຂ່າວ ຈາກຄະນະພັກ, ສະມາຊິກພັກ, ພະນັກງານ-ລັດຖະກອນ ເພື່ອນໍາໄປ ປັບປຸງ ແກ້ໄຂ ໃນການປະຕິບັດ ວຽກງານ ທີ່ຕົນຮັບຜິດຊອບ ໃຫ້ປະສິດທິພາບ ແລະ ປະສິດທິຜົນສູງ ທັງນີ້ເພື່ອແນໃສ່ ສະກັດກັ້ນ ປະກົດການຫຍໍ້ທໍ້ ຕ່າງໆໃນຂະແໜງການຕົນ ໃຫ້ຫຼຸດໜ້ອຍຖອຍລົງ ເທື່ອລະກ້າວ, ຂໍໃຫ້ບັນດາທ່ານຄະນະພັກ-ຄະນະນໍາ ແລະ ພະນັກງານຫຼັກແຫຼ່ງພາຍໃນພະແນກ ຖວທ ແຂວງ ໃຫ້ການຕິດຕາມ ຊ່ວຍເຫຼືອ ຮອງຫົວໜ້າພະແນກ ຖວທ ຜູ້ໃໝ່ ເຮັດສໍາເລັດໜ້າທີ່ ການເມືອງທີ່ພັກ-ລັດຂັ້ນເທິງມອບໝາຍໃຫ້.