ວັນສຸກ, 14 ທັນວາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ ເຊື່ອມຊຶມ ແລະຜັນຂະຫຍາຍ ເອກະສານສຳຄັນຂອງພັກ ແລະຂອງຊາດ

 

      ໃນວັນທີ 21 ສິງຫາ 2018 ນີ້ ,ຫ້ອງວ່າການແຂວງ ໄດ້ຈັດພິທີ ເຊື່ອມຊຶມ ເອກະສານສຳຄັນ ຂອງພັກ ແລະ ຂອງຊາດ ໂດຍການເຂົ້າຮ່ວມ ຂອງ ທ່ານ ຂັນຕີ ສີລະວົງສາ ກຳມະການພັກແຂວງ, ເລຂາຄະນະພັກ ຮາກຖານ ຫ້ອງວ່າການແຂວງເຊກອງ, ມີຄະນະພັກ-ຄະນະ ຫ້ອງວ່າການ, ຫົວໜ້າ-ຮອງຂະແໜງ ພ້ອມດ້ວຍ ພະນັກງານວິຊາການ ພາຍໃນຫ້ອງວ່າການ ເຂົ້າຮ່ວມຢ່າງພ້ອມພຽງ.

 


      ເອກະສານ ທີ່ນຳມາເຜີຍແຜ່ ເຊື່ອມຊຶມ ແລະ ຜັນຂະຫຍາຍ ໃນຄັ້ງນີ້ ປະກອບມີ: ເອກະສານ ວັນເຊັນສັນຍາມິດຕະພາບ-ການຮ່ວມມືຮອບດ້ານ ຄົບຮອບ 41 ປີ ແລະ ວັນສ້າງ ຕັ້ງສາຍພົວພັນ ການທູດ ລະຫວ່າງລາວ-ຫວຽດນາມ ຄົບຮອບ 56 ປີ; ບົດບັນທຶກ ຂໍ້ຕົກລົງລະຫວ່າງ ກົມການເມືອງ ສູນກາງພັກ ປະຊາຊົນປະຕິວັດລາວ ແລະ ກົມການເມືອງ ສູນກາງພັກ ກອມມູນິດຫວຽດນາມ ປີ 2018 ; ວັນຍຶດອຳນາດ ທົ່ວປະເທດ ສປປ ລາວ ຄົບຮອບ 73 ປີ ແລະ 43 ປີ; ຄຳແນະນໍາ ກ່ຽວກັບການຈັດຕັ້ງປະຕິບັດ ຄໍາສັ່ງກົມການເມືອງ ສູນກາງພັກ ວ່າດ້ວຍການເພີ່ມທະວີ ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງຄະນະຈັດຕັ້ງ ສູນກາງພັກ ສະບັບເລກທີ 291/ຄຈສພ ລົງວັນທີ 26 ເມສາ 2018; ມະຕິຕົກລົງ ຂອງຄະນະປະຈຳພັກ ແຂວງວ່າດ້ວຍການ ແບ່ງງານພາຍໃນ ຄະນະບໍລິຫານງານ ພັກແຂວງສະໄໝ IX ; ເຜີຍແຜ່ແນະນໍາ ກ່ຽວກັບການຈັດຕັ້ງ ແລະ ການເຄື່ອນໄຫວຂອງຫ້ອງວ່າການຂັ້ນແຂວງ ແລະ ຂັ້ນເມືອງ ຂອງກະຊວງພາຍໃນ ສະບັບເລກທີ 20/ພນ ລົງວັນທີ 8 ກຸມພາ 2018; ແຈ້ງການ ການຈັດຕັ້ງປະຕິບັດ ຄຳແນະນຳກ່ຽວກັບ ການຈັດຕັ້ງ ແລະ ການເຄື່ອນໄຫວ ຂອງຫ້ອງວ່າການຂັ້ນແຂວງ ແລະ ຂັ້ນເມືອງ ຂອງກະຊວງພາຍໃນ ສະບັບເລກທີ 19/ພນ ລົງວັນທີ 28 ກຸມພາ 2018; ແຈ້ງການແນະນໍາ ເພີ່ມເຕີມ ຂອງຄະນະໂຄສະນາ ອົບຮົມແຂວງ ສະບັບເລກທີ 37/ຄອຂ.ຊກ ລົງວັນ 25 ພຶດສະພາ 2018 ແລະ ເນື້ອໃນຕີລາຄາ ຄຸນນະພາບ ແລະ ແບ່ງປະເພດໜ່ວຍພັກ.

 


        ທັງນີ້ ກໍເພື່ອແນໃສ່ ເຮັດໃຫ້ສະມາຊິກພັກ, ພະນັກງານ-ລັດຖະກອນ ທຸກຄົນ ພາຍໃນຫ້ອງວ່າການແຂວງ ໄດ້ເຊື່ອມຊຶມ, ເຂົ້າໃຈ ແລະ ກໍາແໜ້ນ ກ່ຽວກັບມູນເຊື້ອ ວັນສໍາຄັນຂອງພັກ ແລະ ຂອງຊາດຢ່າງເລິກເຊິ່ງ ເຖິງຖອງ ແລະ ທັງເປັນການເພີ່ມທະວີ ວຽກງານສຶກສາອົບຮົມ ການເມືອງ-ແນວຄິດ ໃຫ້ແກ່ຖັນແຖວສະມາຊິກພັກ, ພະນັກງານ-ລັດຖະກອນ ເພື່ອເຮັດໃຫ້ແຕ່ລະຄົນ ກໍາແໜ້ນທັດສະນະ, ຫຼັກໝັ້ນການເມືອງຂອງພັກ ແຜນນະໂຍບາຍ ແລະ ແນວທາງປ່ຽນແປງໃໝ່ ຂອງພັກ, ເຊີດຊູຫຼັກໝັ້ນຊົນຊັ້ນ ຢ່າງໜັກແໜ້ນ, ຕ້ານແນວຄິດເອກະຊົນ, ຕ້ານປະກົດການຫຍໍ້ທໍ້ອື່ນໆໃນສັງຄົມ.