ວັນສຸກ, 14 ທັນວາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ-ກວາງນາມ ສືບຕໍ່ຮ່ວມມືວຽກງານແນວລາວສ້າງຊາດ

ພາບ-ຂ່າວ: ພຸດທະສອນ
     ກອງປະຊຸມ ພົວພັນ ຮ່ວມມືລະຫວ່າງ ຄະນະກໍາມະການແນວລາວ ສ້າງຊາດແຂວງເຊກອງ ສປປ ລາວ ກັບ ຄະນະກໍາມະການ ແນວໂຮມ ແຫ່ງຊາດຫວຽດນາມ ແຂວງກວາງນາມ ໄດ້ມີຂຶ້ນ ໃນວັນທີ 24 ກໍລະກົດ ນີ້ ຢູ່ທີ່ຫ້ອງປະຊຸມ ຊັ້ນ3 ຫ້ອງວ່າການ ແຂວງເຊກອງ, ຝ່າຍ ແຂວງເຊກອງນໍາໂດຍ ທ່ານ ສີດາ ສຸວັນນະສາຍ ຮອງເລຂາພັກແຂວງ, ຊີ້ນໍາວຽກງານ ອົງການຈັດຕັ້ງມະຫາຊົນ, ມີ ທ່ານ ສົງຄໍາ ເທບບຸບຜາສາຍ ຮອງປະທານແນວ ລາວສ້າງຊາດ ແຂວງເຊກອງ ພ້ອມຄະນະ, ຝ່າຍ ແຂວງກວາງນາມ ນໍາໂດຍ ທ່ານ ຫວໍຊວນກາ ກໍາມະການ ປະຈໍາພັກແຂວງ, ກໍາມະການສູນກາງ ແນວໂຮມ ແຫ່ງຊາດຫວຽດນາມ, ປະທານ ແນວໂຮມ ແຫ່ງຊາດຫວຽດນາມ ແຂວງກວາງນາມ ພ້ອມຄະນະ ແລະພາກສ່ວນທີ່ກ່ຽວຂ້ອງເຂົ້່າຮ່ວມ.

 


      ໃນພິທີ ທັງສອງຝ່າຍ ໄດ້ຜັດປ່ຽນກັນ ລາຍງານ ຜົນການຈັດຕັ້ງປະຕິບັດ ຕາມບົດບັນທຶກຊ່ວຍຈໍາ ທີ່ໄດ້ຮ່ວມລົງນາມ ກັນໃນປີຜ່ານມາ, ເຊິ່ງຄະນະແນວລາວສ້າງຊາດ ແຂວງເຊກອງ ແລະ ແນວໂຮມແຫ່ງຊາດ ຫວຽດນາມ ຂັ້ນຕ່າງໆ ຂອງແຂວງ ກວາງນາມ ໄດ້ປະສານສົມທົບ ກັບທະຫານຊາຍແດນ ແລະ ກໍາລັງປະກອບອາວຸດ ໂຄສະນາສຶກສາອົບຮົມ ປະຊາຊົນລຽບ ຕາມຊາຍແດນ ສອງແຂວງ ກ່ຽວກັບ ແນວທາງຂອງພັກ, ນະໂຍບາຍ, ກົດໝາຍ ຂອງ ສອງຊາດ, ການກໍ່ສ້າງເສັ້ນທາງ ຊາຍແດນ ສັນຕິພາບ, ມິດຕະພາບ, ກົດລະບຽບ, ກົດໝາຍ ການຄຸ້ມຄອງຊາຍແດນ, ການຮ່ວມມື ຊ່ວຍເຫຼືອ ເຊິ່ງກັນ ແລະ ກັນ, ການກໍ່ສ້າງ ປັບປຸງ ລະບົບການເມືອງ ພື້ນຖານ ການເມືອງ ເຂດຊາຍແດນ, ຊຸກຍູ້ວຽກງານ ພັດທະນາເສດຖະກິດ-ສັງຄົມ, ຫຼຸດພົ້ນ ຄວາມທຸກຍາກ, ຮັກສາຄວາມສະຫງົບ ສຸກຂອງປະຊາຊົນ ເຂດຊາຍແດນ ຂອງສອງແຂວງ ຢ່າງເຂັ້ມງວດ.

 


     ຈາກນັ້ນ ທັງສອງຝ່າຍ ໄດ້ເປັນເອກະພາບ ກັນສືບຕໍ່ຮ່ວມມື ໃນວຽກງານ ແນວລາວສ້າງຊາດ ລະຫວ່າງ ສອງແຂວງ ເຊກອງ-ກວາງນາມ ໂດຍສຸມໃສ່ ສຶກສາອົບຮົມ ໃຫ້ປະຊາຊົນ ສອງຝ່າຍລຽບຕາມ ຊາຍແດນ ກ່ຽວກັບແນວທາງ ນະໂຍບາຍ ຂອງພັກ, ລະບຽບກົດໝາຍຂອງລັດ ກ່ຽວກັບການຮັກສາ ມູນເຊື້ອ ສາມັກຄີພິເສດ ແລະ ຮ່ວມມືຮອບດ້ານ ລະຫວ່າງ ປະຊາຊົນ ສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ສອງຄະນະແນວລາວ ສ້າງຊາດ ແຂວງເຊກອງ ກັບແນວໂຮມ ແຫ່ງຊາດຫວຽດນາມ ແຂວງກວາງນາມ, ຕິດຕາມ, ສະກັດກັ້ນ ປະກົດການຫຍໍ້ທໍ້ ຕາມເຂດຊາຍແດນ ຂອງສອງແຂວງ, ເພີ່ມທະວີກໍ່ສ້າງ ປັບປຸງ ລະບົບພື້ນຖານການເມືອງ ຢູ່ເຂດຊາຍແດນ ໂດຍປັບປຸງ ອົງການແນວລາວສ້າງຊາດ ຂັ້ນຕ່າງໆ ໃຫ້ນັບມື້ເຂັ້ມແຂງ ແລະ ຈັດສັນທີ່ຢູ່ອາໄສ ຂອງປະຊາຊົນ, ສະໜອງຂໍ້ມູນ ແລະ ອໍານວຍຄວາມສະດວກ ໃນການຂຸດຄຄົ້ນ ອັດຖິທະຫານ ອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດ ໃນປາງສົງຄາມ ຢູ່ລາວ ແລະ ອັດຖິທະຫານລາວ ທີ່ເສຍຊີວິດຢູ່ຫວຽດນາມ, ພ້ອມທັງຕິດຕາມ ຊຸກຍູ້ ໃຫ້ແນວໂຮມ ຂອງເມືອງທີ່ຕິດຈອດ ຕິດຕາມ ແລະ ສະກັດກັ້ນ ກຸ່ມຄົນບໍ່ ຫວັງດີທີ່ສວຍໃຊ້ ສາສະໜາຕ່າງໆ ເພື່ອແບ່ງແຍກ ຄວາມສາມັກຄີ ທັງສອງຝ່າຍ ຢ່າງເປັນປະຈໍາ ທັງນີ້ ເພື່ອເພີ່ມທະວີ ສາຍພົວພັນ ມິດຕະພາບການຮ່ວມມື ລະຫວ່າງສອງຝ່າຍ ໃຫ້ຫຼາຍຂນກວ່າເກົ່າ.