ວັນພຸດ, 20 ມິຖຸນາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຊຸກຍູ້ວຽກງານ ຢູ່ ແຂວງເຊກອງ

          ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກຮອງນາຍົກລັດຖະມົນຕີພ້ອມຄະນະ ໄດ້ເຄື່ອນໄຫວຊຸກຍູ້, ຕິດຕາມວຽກງານ ຢູ່ ແຂວງເຊກອງ ໃນວັນທີ 3 ເມສາ ນີ້ ໂດຍການຕ້ອນຮັບ ຂອງທ່ານ ຄຳເຜີຍ ບຸດດາວຽງ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ ພ້ອມດ້ວຍຄະນະ, ມີບັນດາທ່ານຫົວໜ້າ-ຮອງພະແນກການອ້ອມຂ້າງແຂວງ ພະນັກງານອາວຸໂສບຳນານເຂົ້າຮ່ວມນໍາ.

        ຈຸດປະສົງໃນການເຄື່ອນໄຫວເຮັດວຽກຢູ່ແຂວງເຊກອງໃນຄັ້ງນີ້ ເພື່ອຊີ້ນໍາ, ຊຸກຍູ້, ຕິດຕາມ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ IXຂອງແຂວງ ໄລຍະເຄິ່ງສະໄໝ ກໍຄືການຈັດຕັ້ງແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII, ການຈັດຕັ້ງປະຕິບັດວຽກງານຂອງບັນດາຄະນະກໍາມະການຂັ້ນແຂວງ ເປັນຕົ້ນແມ່ນຄະນະກໍາມະການສົ່ງເສີມ ແລະ ຄຸ້ມຄອງການລົງທຶນພາຍໃນ ແລະ ຕ່າງປະເທດ, ການສົ່ງເສີມຄວາມກ້າວໜ້າຂອງແມ່ຍິງ, ການອະໄພຍະໂທດໃຫ້ແກ່ນັກໂທດ, ວຽກງານ 3 ສ້າງ, ວຽກງານຕ້ານການຄ້າມະນຸດ, ວຽກງານຫ້ອງວ່າການປົກຄອງແຂວງ, ວຽກງານໂພສະນາການ-ວຽກງານແມ່ແລະເດັກ, ວຽກງານຄຸ້ມຄອງອິນເຕີເນັດແຫ່ງຊາດ, ວຽກງານການທ່ອງທ່ຽວເຫຼົ່ານີເປັນຕົ້ນ.  

        ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ໄດ້ລາຍງານ ການເຄື່ອນໄຫວວຽກງານໂດຍຫຍໍ້ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ ຂອງພັກ, ຄັ້ງທີ IX ຂອງແຂວງ ກໍຄືການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2018) ຂອງລັດຖະບານ ກໍ່ຄືແຂວງວາງອອກ ໄລຍະເຄິ່ງສະໄໝໃຫ້ເຫັນວ່າ: ຄະນະພັກ-ອຳນາດການປົກຄອງທ້ອງຖິ່ນ ແລະ ປະຊາຊົນບັນດາເຜົ່າຊາວແຂວງເຊກອງ ໄດ້ສູ້ຊົນເປັນເຈົ້າການຊີ້ນຳ-ນໍາພາ ຈັດຕັ້ງປະຕິບັດເຂົ້າສູ່ຂະບວນການຕົວຈິງ ໄປຄຽງຄູ່ກັບການນໍາໃຊ້ ແລະ ຂຸດຄົ້ນທ່າແຮງບົມຊ້ອນກັບທີ່ ແລະ ເປີດກວ້າງການຍາດແຍ່ງຊ່ວຍເຫຼືອ-ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ຕິດພັນກັບການແກ້ໄຂຊີວິດການເປັນຢູ່ ຂອງຖັນແຖວພະນັກງານ, ທະຫານຕໍາ-ຫຼວດ ແລະ ປະຊາຊົນບັນດາເຜົ່າ ໃຫ້ໄດ້ຮັບການຍົກລະດັບດີຂຶ້ນ ທັງໝົດນີ້ ໄດ້ເຮັດໃຫ້ການເຕີບໂຕ ທາງດ້ານເສດຖະກິດຂອງແຂວງເພີ່ມຂຶ້ນ ມາຮອດປະຈຸບັນສາມາດປະຕິບັດໄດ້ 9,1%, ມີມູນຄ່າ GDP ສະເລ່ຍຕໍ່ປະຊາກອນບັນລຸໄດ້ 1.580 ໂດລາສະຫະລັດ ຕໍ່ຄົນຕໍ່ປີ ເຄີ່ງຄາດວ່າຮອດປີ 2020 ຈະບັນລຸຕາມລະດັບຄາດໝາຍທີ່ວາງໄວ້.

         ໂອກາດນີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໂອ້ລົມ, ຊີ້ນໍາໃຫ້ຄະນະນຳຂອງແຂວງ ເອົາໃຈໃສ່ແກ້ໄຂຈຸດທີ່ເປັນຂອດບົກຜ່ອງ, ຂໍ້ຫຍຸ້ງຍາກ ໃນການປະຕິບັດວຽກງານຂອງຕົນ ໃຫ້ມີຄວາມສະດວກ ເພື່ອເຮັດໃຫ້ການຈັດຕັ້ງປະຕິບັດ ບັນດາແຜນການ ຄາດໝາຍສູ້ຊົນ ໃຫ້ມີຜົນສໍາເລັດ ແລະ ມີປະສິດພາບສູງ, ໃຫ້ສຸມໃສ່ ປະຕິບັດບາງຄາດໝາຍ ທີ່ຍັງຄ້າງຄາ ໂດຍສະເພາະແມ່ນ ດັດສະນີໝາຍກ່ຽວກັບ ການນຳພາປະເທດພວກເຮົາຫຼຸດພົ້ນປະເທດທີ່ດ້ອຍພັດທະນາ ໃນປີ 2020, ເອົາໃຈໃສ່ຕິດຕາມ, ຊຸກຍູ້ສົ່ງເສີມ ແລະ ຄຸ້ມຄອງການລົງທຶນ ຂອງນັກລົງທຶນທັງພາຍໃນ ແລະ ຕ່າງປະເທດ ເພື່ອພັດທະນາພື້ນຖານໂຄງລ່າງ ຂອງແຂວງໃຫ້ດີຂຶ້ນກວ່າເກົ່າ, ສິ່ງທ້າທາຍແມ່ນ ການພັດທະນາຊັບພະຍາກອນມະນຸດ ທີ່ພົວພັນກັບຂະແໜງວັດທະນະທຳສັງຄົມ, ຕ້ອງໄດ້ມີການຄົ້ນຄວ້າ ປະຊາສໍາພັນໂຄສະນາດ້ານໂພສະນາການ ໃຫ້ທົ່ວເຖິງ, ເອົໃຈໃສ່ ກໍ່ສ້າງດ້ານພື້ນຖານໂຄງລ່າງ, ການແກ້ໄຂບັນຫາໄພທຳມະຊາດ, ການແກ້ໄຂຄວາມທຸກຍາກຂອງປະຊາຊົນ ໃຫ້ຫຼຸດລົງເທື່ອລະກ້າວ; ແລະ ໃນຕໍ່ໜ້າ ເພື່່ອສືບຕໍ່ປະຕິບັດ ຜັນຂະຫຍາຍມະຕິກອງປະຊຸມໃຫຍ່ຂອງພັກ ກໍຄືແຜນພັດທະນາເສດຖະກິດສັງຄົມ 5 ປີວາງໄວ້ນັ້ນໃຫ້ສຳເລັດ ຮຽກຮ້ອງໃຫ້ບັນດາຂະແໜງການ ກວດກາຈຸດໃດທີ່ຍັງເປັນຄວາມສ່ຽງ, ເປັນສິ່ງທ້າທາຍ, ເບິ່ງເຫດຜົນສາຍເຫດຕົວຈິງວ່າຈະແກ້ໄຂແນວໃດ ເພື່ອໃຫ້ບັນລຸຕາມເປົ້າໝາຍຕ່າງໆ ນັ້ນ ຕ້ອງໄດ້ມີການປະສານພົວພັນ ກັບບັນດາຂະແໜງການຂັ້ນສູນກາງ ທີ່ມີສ່ວນຮ່ວມ ເພື່ອຫັນລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມທິດສາມສ້າງ; ນອກນີ້ເອົາໃຈໃສ່ ແກ້ໄຂການອະໄພຍະໂທດ, ການຕ້ານການຄ້າມະນຸດ, ສືບຕໍ່ປະຕິບັດວຽກງານສາມສ້າງໃຫ້ເປັນຮູບປະທໍາ ພ້ອມນີ້ ທ່ານຍັງໄດ້ລົງຕິດຕາມໂຄງການກໍ່ສ້າງຈໍານວນໜຶ່ງ ຢູ່ ແຂວງເຊກອງຕື່ມອີກ.

ຂ່າວ-ພາບ: ພຸດທະສອນ