ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຮອງ​ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະປ່າ​ໄມ້​​ລົງຊຸກ​ຍູ້​ວຽກ​ງານ​ຢູ່​ເມືອງ​ກະ​ລຶມ

86

ເພື່ອຍົກສູງຄຸນນະພາບ ການພັດທະນາວຽກງານກະສິກຳ ແລະ ປ່າໄມ້ ໃຫ້ດີກວ່າເກົ່າ ໃນວັນທີ 19 ມີນາ ນີ້ ທ່ານ ຄຳບຸນນັດ ໄຊຍະນິນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມຄະນະ ໄດ້ລົງເຄື່ອນໄຫວຊຸກຍູ້ວຽກງານ ຢູ່ ເມືອງກະລຶມ ແຂວງເຊກອງ ໂດຍການໃຫ້ກຽດຕ້ອນຮັບຢ່າງອົບອຸ່ນຈາກ ອຳນາດການປົກຄອງເມືອງ ພ້ອມດ້ວຍຂະແໜງການກ່ຽວຂ້ອງຂອງເມືອງ.

ທ່ານ ສົມໃຈ ສຸນິໄຊ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ລາຍງານວ່າ: ເມືອງກະລຶມແມ່ນໜຶ່ງໃນ 4 ເມືອງ ຂອງແຂວງເຊກອງ ທີ່ນອນ ຢູ່ ໃນເມືອງທຸກຍາກຂອງ ສປປລາວ ເປັນເມືອງພູດອຍກວມເອົາ 100% ເຊິ່ງໄລຍະຜ່ານມາເມືອງຂອງພວກເຮົາໄດ້ຖືກໄພທຳມະຊາດຂົ່ມຄູ່ຢ່າງໜັກໜ່ວງ ເຮັດໃຫ້ການພັດທະນາເສດຖະກິດ ມີຄວາມຫຍຸ້ງຍາກພໍສົມຄວນ ແຕ່ແນວໃດກໍດີ ອຳນາດການປົກຄອງທຸກຂັ້ນ ກໍເອົາໃຈໃສຊີ້ນຳໆພາ ຢ່າງໃກ້ຊິດຕິດແທດ ບວກກັບພະນັກງານວິຊາການ ຈາກຂະແໜງການກ່ຽວຂ້ອງ ທີ່ມີຄວາມຫ້າວຫັນເປັນເຈົ້າການເຮັດສຳເລັດທຸກໜ້າທີ່ຕາມການມອບໝາຍຂອງຂັ້ນເທິງ ຄຽງຄູ່ກັນນັ້ນ ເມືອງກະລຶມ ຍັງມີທ່າແຮງບົ່ບຊ້ອນຄື: ພື້ນຖານຄວາມດຸໝັ່ນຂະໜັນພຽນໃນການອອກແຮງງານຂອງປະຊາຊົນ ພ້ອມທັງປະກອບມີຊັບໃນດິນສິນໃນນ້ຳ ຄື ແຮ່ທາດ, ປ່າໄມ້ ແລະ ເຄື່ອງປ່າຂອງດົງຢ່າງຫຼວງຫຼາຍ ທີ່ຊ່ວຍຍູ້ດັນ ແລະ ເປັນເງື່ອນໄຂໃນການພັດທະນາ ວຽກງານກະສິກຳ ແລະ ປ່າໄມ້ ໃຫ້ຂະຫຍາຍຕົວຢ່າງຕໍ່ເນື່ອງ ພ້ອມທັງປະກອບສ່ວນ ສ້າງລາຍຮັບໃຫ້ແກ່ເມືອງເປັນປົກກະຕິ ແລະ ເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາດີຂຶ້ນເລື້ອຍໆ ສະແດງອອກໃນການຜະລິດພຶດສະບຽງອາຫານ ສາມາດຜະລິດເຂົ້າໄດ້ 2.847,71 ໂຕນ ສະມັດຕະພາບ 2,83 ໂຕນ/ເຮັກຕາ ຖ້າສະເລ່ຍໃສ່ຫົວຄົນ ແມ່ນກຸ້ມກິນ 7 ເດືອນ ເທົ່າກັບ 158,6 ກິໂລ/ຄົນ/ປີ, ວຽກງານລ້ຽງສັດ ໃນທົ່ວເມືອງມີສັດລ້ຽງທັງໝົດ 109.972 ໂຕ ໃນນັ້ນມີຄວາຍ 3.644 ໂຕ, ງົວ 4582 ໂຕ, ໝູ 19.227 ໂຕ, ແບ້ 3.438 ໂຕ, ສັດປີກ 79.081 ໂຕ ແລະ ມີໜອງປາ 650 ໜອງ ມີຈຳນວນປາທີ່ປ່ອຍ 14.000 ໂຕ ທຽບໃສ່ປີຜ່ານມາຝູງສັດລ້ຽງເພີ່ມຂຶ້ນ 14.283 ໂຕ ຫຼືເທົ່າກັບ 13,9% ນອກນັ້ນ, ຍັງມີການປູກຝັງລ້ຽງສັດພືດນາໆພັນອື່ນໆອີກຢູ່ບັນດາກຸ່ມບ້ານເປົ້າໝາຍ ຄາດວ່າຈະໄດ້ຮັບການເກັບກ່ຽວຜົນໃນອີກບໍ່ດົນ.

ໂອກາດດັງກ່າວນີ້ ທ່ານ ຄຳບຸນນັດ ໄຊຍະນິນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ຍັງໄດ້ເນັ້ນໃຫ້ເມືອງກະລຶມ ເອົາໃຈໃສ່ຕື່ມອີກຫຼາຍດ້ານ ໂດຍສະເພາະ ການປູກພຶດສະບຽງອາຫານ, ພືດອຸດສະຫະກຳ ຕ້ອງອີງໃສ່ທ່າແຮງບົ່ມຊ້ອນທີ່ຈຳເປັນ ຂອງປະຊາຊົນ ຄົ້ນຄົ້ວຈັດຫາອາຊີບໃຫ້ປະຊາຊົນ ສ້າງໃຫ້ເປັນຄອບຄົວຕົວແບບ ຊອກຫາຕະຫຼາດຮອງຮັບ ແລະ ໃຫ້ຜະລິດເປັນສິນຄ້າ ການທ່ອງທ່ຽວ, ສິນຄ້າທີ່ລະນຶກ ຄຽງຄູ່ກັນນັ້ນ ຕ້ອງເປັນເຈົ້າການຄຸ້ມຄອງ ແລະ ຟື້ນຟູຊັບພະຍາກອນປ່າໄມ້ ຈາກການຖາງປ່າເຮັດໄຮ່ເລື່ອນລອຍ ເປັນການເຮັດໄຮ່ຄົງທີ່, ສິງສຳຄັນພະນັກງານຫ້ອງການກະສິກຳ ແລະ ປ່າໄມ້ ຕ້ອງເປັນແບບຢ່າງ ໃນການສ້າງເສດຖະກິດຄອບຄົວ ເພີ່ງຕົນເອງ,ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ທັງໝົດນັ້ນ ຕ້ອງປະສານສົມທົບຈາກຂະແໜງການທີ່ກ່ຽວຂ້ອງ ຢ່າງກົມກຽວ ໃນການຊອກຫາແຫຼ່ງທຶນຈາກບັນດາໂຄງການທີ່ເຂົ້າມາລົງທຶນ ເພື່ອແກ້ໄຂບັນຫາຊີວິດການເປັນຢູ່ ຂອງພໍ່ແມ່ປະຊາຊົນໃຫ້ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ຂ່າວພາບໂດຍ: ທ ອັດສະວິນ ແສງສີຈັນ