ວັນຈັນ, 9 ທັນວາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຄະນະຜູ້ແທນຂັ້ນສູງ ແຂວງເຊກອງ ຕ້ອນຮັບ ຄະນະຜູ້ແທນຂັ້ນສູງ ແຂວງຊຽງແຕງ

 850

ໃນຕອນເຊົ້າວັນທີ 14 ມີນາ 2018 ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງເຊກອງ ຄະນະຜູ້ແທນຂັ້ນສູງ ແຂວງເຊກອງ ສປປ ລາວ ໄດ້ຕ້ອນຮັບ ແລະ ເຮັດວຽກຮ່ວມກັບ ຄະນະນຳຂັ້ນສູງ ແຂວງຊຽງແຕງ ຣາຊະອານາຈັກກໍາປູເຈຍ, ຝ່າຍແຂວງເຊກອງ ນໍາໂດຍ ທ່ານ ຄໍາເຜີຍ ບຸດດາວຽງ ກໍາມະການສູນກາງພັກ, ເລຂາພັກແຂວງ,ເຈົ້າແຂວງເຊກອງ ພ້ອມດ້ວຍຄະນະປະຈໍາພັກ, ກໍາມະການພັກແຂວງ ແລະ ຝ່າຍແຂວງຊຽງແຕງ ນໍາໂດຍ ພະນະທ່ານ ມົນສາເຣືອນ ເຈົ້າແຂວງຊຽງແຕງ ພ້ອມຄະນະ.

ການເຄື່ອນໄຫວຢ້ຽມຢາມ ມິດຕະພາບ ແລະ ປະຊຸມປຶກສາຫາລື ຂອງຄະນະນຳຂັ້ນສູງ ແຂວງຊຽງແຕງ ແຫ່ງຣາຊະອານາຈັກກໍາປູເຈຍ ຮ່ວມກັບ ຄະນະຜູ້ແທນຂັ້ນສູງ ແຂວງເຊກອງ ສປປ ລາວ ໃນຄັ້ງນີ້ ແມ່ນເພື່ອປຶກສາຫາລື ການພົວພັນຮ່ວມມືທາງດ້ານການພັດທະນາ ເສດຖະກິດ-ສັງຄົມ, ການທ່ອງທ່ຽວ ໃນອະນາຄົດ, ໃນໂອກາດນີ້ ທັງສອງຝ່າຍ ໄດ້ຜັດປ່ຽນກັນລາຍງານ ສະພາບຈຸດພິເສດພູມມີພາກ ແລະ ການພັດທະນາ ເສດຖະກິດ-ສັງຄົມ ແລະ ທັງເປັນການແລກປ່ຽນ ບົດຮຽນ ເຊິ່ງກັນ ແລະ ກັນ ພ້ອມທັງ ລາຍງານສະພາບ ການເຄື່ອນໄຫວວຽກງານ ການເປີດກວ້າງການພົວພັນຮ່ວມມື ຂອງທັງສອງແຂວງ ໃນເງື່ອນໄຂ ການເຊື່ອມໂຍງສາກົນ.

ເຖິງຢ່າງໃດກໍ່ດີ ລາວ-ກໍາປູເຈຍ ກໍເປັນປະເທດບ້ານໃກ້ເຮືອນຄຽງ, ມີຊາຍແດນຮ່ວມກັນ, ປະຊາຊົນມີມູນເຊື້ອ ຮີດຄອງປະເພນີ ຄ້າຍຄືກັນ, ໄປ-ມາ ຫາສູ່ກັນ, ເຊິ່ງໄດ້ກາຍເປັນຂີດໝາຍ ອັນສໍາຄັນໃນການປະກອບສ່ວນ ເຂົ້າໃນການຮັດແໜ້ນສ້າງສາຍພົວພັນ ມິດຕະພາບ ລະຫວ່າງ ສອງປະເທດ, ເວົ້າລວມ, ເວົ້າສະເພາະ ແຂວງ ເຊກອງ ສປປ ລາວ ກັບ ແຂວງ ຊຽງແຕງ ແຫ່ງຣາຊະອານາຈັກ ກໍາປູເຈຍ ທີ່ຈະໄດ້ມີການພົວພັນ ອູ້ມຊູເພີ່ມທະວີຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ນັບມື້ນັບເພີ່ມພູນຄູນສ້າງຂຶ້ນເລື້ອຍໆ ໃນອະນາຄົດ.

ພາບ-ຂ່າວ: ພຸດທະສອນ