ວັນຈັນ, 19 ພະຈິກ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ຄຳໄຕ ສີພັນ ສີພັນດອນ ອາດີດປະທານພັກ,ອາດີດປະທານປະເທດ ແຫ່ງ ສປປ ລາວ ເຄື່ອນໄຫວຢ້ຽມຢາມເຊກອງ.

    ຕອນເຊົ້າວັນທີ 31 ມັງກອນ 2018 ນີ້ ທ່ານ ຄຳໄຕ ສີພັນ ສີພັນດອນ ອາດີດປະທານພັກ, ອາດີດປະທານປະເທດ ແຫ່ງ ສປປ ລາວ, ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ ໂດຍການຕ້ອນຮັບຢ່າງອົບອຸ່ນຈາກ ທ່ານ ຄໍາເຜິຍ ບຸດດາວຽງ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ ພ້ອມດ້ວຍຄະນະປະຈໍາພັກແຂວງ, ກຳມະການພັກແຂວງ, ເຈົ້າເມືອງ-ຮອງເຈົ້າເມືອງ 4 ຕົວເມືອງ ຕະຫຼອດຮອດພະນັກງານຫຼັກແຫຼ່ງ ຈາກອົງການ, ພະແນກການອອ້ມຂ້າງແຂວງ ເຂົ້າຮ່ວມຕ້ອນຮັບ ແລະ ຮັບຟັງການໂອ້ລົມໃນຄັ້ງນີ້.

    ທ່ານ ຄຳເຜີຍ ບຸດດາວຽງ ເລຂາພັກແຂວງ-ເຈົ້າແຂວງໆເຊກອງ ໄດ້ລາຍງານ ການຊີ້ນໍາ-ນໍາພາຈັດຕັ້ງປະຕິບັດການພັດທະນາເສດຖະກິດ-ສັງຄົມຂອງແຂວງເຊກອງ ປີ 2017 ຜ່ານມາວ່າ: ໃນ 1 ປີຜ່ານມາ ສະພາບລວມຂອງແຂວງເຊກອງ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂອງແຂວງ ສຶບຕໍ່ຂະຫຍາຍຕົວດ້ວຍຈັງຫວະໝັ້ນທ່ຽງ, ລວມຍອດຜະລິດຕະພັນພາຍໃນ ຫຼື GDP ຂະຫຍາຍຕົວໃນລະດັບ 9,1% ສະເລ່ຍຕໍ່ຫົວຄົນບັນລຸໄດ້ 12,64 ລ້ານກີບ ຫຼືເທົ່າກັບ 1.580 ໂດລາສະຫະລັດ, ການຂຸດຄົ້ນລາຍຮັບເຂົ້າງົບປະມານຂອງລັດໝົດປີ ບັນລຸໄດ້ລື່ນແຜນການທີ່ວາງໄວ້, ການປະຕິບັດດ້ານລາຍຈ່າຍ ອັນເປັນພື້ນຖານ ແມ່ນຮັບປະກັນການເບີກຈ່າຍເງິນເດືອນ ໃຫ້ພະນັກງານ-ລັດຖະກອນ, ສອງກຳລັງປະກອບອາວຸດ, ພະນັກງານບໍານານ, ຄູອາຈານ ແລະ ຖັນແຖວພະນັກງານແພດໝໍ ແມ່ນປະຕິບັດໄດ້ເປັນປົກກະຕິ ທຸກໆເດືອນ ຕິດພັນກັບການສົ່ງເສີມການປະຢັດ ແລະ ຕ້ານການຟຸມເຟືອຍງົບປະມານລັດ ຕາມຄໍາສັ່ງ 09/ນຍ ສາມາດເຮັດໃຫ້ຫຼຸດຜ່ອນ ການສິ້ນເປືອງງົບປະມານຂອງລັດ ໃນພາກລາຍຈ່າຍ ລົງຢ່າງຈະແຈ້ງ ຂະບວນການຜະລິດ, ການປູກ-ການລ້ຽງຂອງປະຊາຊົນ ສືບຕໍ່ຂະຫຍາຍຕົວເພີ່ມຂຶ້ນ.
    ໃນໂອກາດດັ່ງກ່າວນີ້ ທ່ານ ຄຳໄຕ ສີພັນດອນ ອາດີດປະທານປະເທດ ແຫ່ງ ສປປ ລາວ ກໍ່ໄດ້ໂອ້ລົມ ແລະ ໄດ້ເນັ້ນໜັກ ໃຫ້ຄະນະນໍາແຂວງເຊກອງ ຈົ່ງພອ້ມກັນເອົາໃຈໃສ່ ສືບຕໍ່ປັບປຸງ, ການຄຸ້ມຄອງການນຳພາ ໃຫ້ດີຂຶ້ນກວ່າເກົ່າ, ສືບຕໍ່ກໍ່ສ້າງວຽກງານພັກ-ພະນັກງານໃຫ້ໜັກແໜ້ນເຂັ້ມແຂວງ, ສ້າງຮາກຖານການເມືອງ ຕິດພັນກັບວຽກງານ 3 ສ້າງ ໂດຍສະເພາະ ການສ້າງບ້ານໃຫ້ເປັນຫົວໜ່ວຍພັດທະນາ ເຮັດໃຫ້ສະພາບຢູ່ຂັ້ນບ້ານ ມີການຫັນປ່ຽນທີ່ດີຂຶ້ນ ປະຊາຊົນມີຄວາມຢູ່ດີກິນດີ, ລົບລ້າງການເຊື່ອຖືແບບງົບງວາຍ ຂອງປະຊາຊົນບັນດາເຜົ່າ ເພື່ອຫັນສູ່ການພັດທະນາຄອບຄົວ ໃຫ້ແທດເໝາະກັບສະພາບຄວາມເປັນຈິງ ໃນປະຈຸບັນ, ເອົາໃຈໃສ່ຊຸກຍູ້ ການປະຕິບັດລະບຽບກົດໝາຍ, ສະກັດກັ້ນບັນຫາຢາເສບຕິດ ແລະ ການສໍ້ລາດບັງຫຼວງໃຫ້ໝົດໄປ ຢ່າງສີ້ນເຊີງ, ສ້າງພື້ນຖານໂຄງລ່າງເສດຖະກິດ-ສັງຄົມຢ່າງໜັກແໜ້ນ ດ້ວຍການຊຸກຍູ້ສົ່ງເສີມ ປະຊາຊົນຜະລິດເປັນສີນຄ້າ ຄຽງຄູ່ກັບການສະໝອງເຕັກນິກ ແລະ ເຄື່ອງມືການຜະລິດ ທີ່ທັນສະໄໝ ເພື່ອຕອບສະໝອງໄດ້ ການບໍລິໂພກພາຍໃນ ແລະ ສົ່ງອອກອັນເປັນພື້ນຖານທີ່ສຳຄັນ ຂອງການສ້າງເສດຖະກິດຂອງແຂວງ ໃຫ້ແຂງແຮງ, ສ້າງກົນໄກທີ່ສອດຄ່ອງ ແລະສັກສິດ ຕໍ່ກັບການປະຕິບັດລະບຽບກົດໝາຍ, ຊຸກຍູ້ການສ້າງຄວາມສາມັກຄີປອງດອງຂອງປະຊາຊົນບັນດາເຜົ່າໃຫ້ໜັກແໜ້ນ, ສ້າງ ແລະພັດທະນາຊັບພະຍາກອນມະນຸດໃຫ້ມີຄຸນນະພາບ, ປະຕິບັດວຽກງານປອ້ງກັນຊາດ- ປອ້ງກັນຄວາສະຫງົບໃຫ້ໜັກແໜ້ນ ເຂັ້ມແຂງ, ສ້າງໃຫ້ໄດ້ໜໍ່ແໜງສັງຄົມນິຍົມ ຢູ່ຮາກຖານເທື່ອລະກ້າວ, ຄຽງຄູ່ກັນນີ້ ກໍໃຫ້ເອົາໃຈໃສ່ການຈັດສັນງົບປະມານ ເຂົ້າໃສ່ການພັດທະນາເສດຖະກິດ- ສັງຄົມ ດ້ານທີ່ມີຄວາມຈໍາເປັນ ຕາມເງື່ອນໄຂຕົວຈິງ, ອຳນວຍຄວາມສະດວກ ໃຫ້ບັນດາຫົວໜວ່ຍທຸລະກິດທັງພາຍໃນ ແລະ ຕ່າງປະເທດ ເຂົ້າມາລົງທຶນຢູ່ແຂວງຕົນ ໃຫ້ນັບມື້ນັບຫຼາຍຂື້ນ ເພື່ອສ້າງໃຫ້ປະຊາຊົນມີວຽກເຮັດງານທຳ ພັດທະນາຄອບຄົວຂອງຕົນ ໃຫ້ມີຄວາມຢູ່ດີກິນດີເທື່ອລະກ້າວ.
                                                                                                                     ຂ່າວ-ພາບໂດຍ: ພຸດທະສອນ