ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ປອ ບຸນທອງ ຈິດມະນີ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ

   

   ໃນວັນທີ 18 ມັງກອນ ນີ້ ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ ໂດຍການຕ້ອນຮັບຈາກທ່ານ ຄຳເຜີຍ ບຸດດາວຽງ ເລຂາພັກແຂວງ-ເຈົ້າແຂວງໆ ເຊກອງ ມີບັນດາຄະນະປະຈໍາພັກແຂວງ, ກຳມະການພັກແຂວງ ພ້ອມດ້ອຍອົງການທີ່ກ່ຽວຂ້ອງເຂົ້າຮ່ວມຕ້ອນຮັບຢ່າງອົບອຸ່ນ ແລະ ເຂົ້າຮ່ວມຮັບຟັງການໂອ້ລົມໃນຄັ້ງນີ້.

   ທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ-ເຈົ້າແຂວງໆ ເຊກອງ ໄດ້ລາຍງານການຈັດຕັ້ງປະຕິບັດ ການພັດທະນາເສດຖະກິດ-ສັງຄົມຂອງແຂວງເຊກອງ ໃຫ້ຮູ້ວ່າ: ໃນ 1 ປີຜ່ານມາ ສະພາບລວມຂອງແຂວງເຊກອງ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂອງແຂວງສຶບຕໍ່ຂະຫຍາຍຕົວ ດ້ວຍຈັງຫວະໝັ້ນທ່ຽງ, ລວມຍອດຜະລິດຕະພັນພາຍໃນ ຫຼື GDP ຂະຫຍາຍຕົວໃນລະດັບ 9,1% ສະເລ່ຍຕໍ່ຫົວຄົນບັນລຸໄດ້ 12,64 ລ້ານກີບ ຫຼືເທົ່າກັບ 1.580 ໂດລາສະຫະລັດ, ການຂຸດຄົ້ນລາຍຮັບເຂົ້າງົບປະມານຂອງລັດໝົດປີ ບັນລຸໄດ້ລື່ນແຜນການທີ່ວາງໄວ້, ການປະຕິບັດດ້ານລາຍຈ່າຍອັນເປັນພື້ນຖານ ແມ່ນຮັບປະກັນການເບີກຈ່າຍເງິນເດືອນ ໃຫ້ພະນັກງານ-ລັດຖະກອນ, ສອງກຳລັງປະກອບອາວຸດ, ພະນັກງານບໍານານ, ຄູອາຈານ ແລະ ຖັນແຖວແພດໝໍ ແມ່ນປະຕິບັກໄດ້ເປັນປົກກະຕິທຸກໆເດືອນ ຕິດພັນກັບການສົ່ງເສີມການປະຢັດ ແລະ ຕ້ານການຟຸມເຟືອຍງົບປະມານລັດຕາມຄໍາສັ່ງ 09/ນຍ ສາມາດເຮັດໃຫ້ຫຼຸດຜ່ອນການສິ້ນເປືອງງົບປະມານຂອງລັດໃນພາກລາຍຈ່າຍລົງຢ່າງຈະແຈ້ງ ຂະບວນການຜະລິດ, ການປູກ-ການລ້ຽງຂອງປະຊາຊົນສືບຕໍ່ຂະຫຍາຍຕົວເພີ່ມຂຶ້ນ ເຊິ່ງສາມາດເກັບກ່ຽວຜົນຜະລິດ ເຂົ້ານາປີ ໄດ້ທັງໝົດ 52.988 ໂຕນ ໃນເນື້ອທີ່ປັກດຳທັງໝົດ 12.808 ເຮັກຕາ, ເກັບກ່ຽວພືດສະບຽງອາຫານ (ບໍ່ລວມທັງເຂົ້າກິນ) ໄດ້ 56.912 ໂຕນ ໃນເນື້ອທີ່ 6.529 ເຮັກຕາ, ປູກພືດຜັກເປັນສິນຄ້າ ໃນເນື້ອທີ່ 22.551 ເຮັກຕາ, ຜົນຜະລິດ 192.807ໂຕນ ໃນນັ້ນ ເກັບກ່ຽວກາເຟໄດ້ 40.614 ໂຕນ ໃນເນື້ອທີ່ໃຫ້ໝາກ 11.363 ເຮັດຕາ ເທົ່າກັບ 88,53% ຂອງເນື້ອທີ່ປູກທັງໝົດ ແລະ ກີດຢາງພາລາ (ກ້ອນ+ນໍ້າ) ໄດ້ 4.890 ໂຕນ ໃນເນື່ອທີ່ກີດຢາງທັງໝົດ 3.702 ເຮັດຕາ,
   ໂອກາດດັ່ງກ່າວ ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ໄດ້ເນັ້ນໃຫ້ຄະນະນຳແຂວງເຊກອງ ສືບຕໍ່ເອົາໃຈໃສ່ບາງບັນຫາສຳຄັນເປັນຕົ້ນ: ວຽກງານປ້ອງກັນຊາດ-ປ້ອງກັນຄວາມສະຫງົບ ຖືເປັນວຽກງານພື້ນຖານຍາວນານ ຊຶ່ງເປັນໜ້າທີ່ຂອງຄະນະພັກແຕ່ລະຂັ້ນ ເພື່ອຕ້ານກົນອຸບາຍ ຂອງອີດທິກຳລັງປໍລະປັກ ແລະ ກຸ່ມຄົນບໍ່ດີ ທີ່ຫວັງມ້າງເພທຳລາຍພັກເຮົາ ດ້ວຍການຫັນລົງຮາກຖານ ເພື່ອປຸກລະດົມຈິດໃຈປະຊາຊົນ ໃຫ້ມີສະຕິລະວັງຕົວສູງຂຶ້ນຕື່ມ ພ້ອມທັງເອົາໃສ່ ສະກັດກັ້ນປະກົດການຫຍໍ້ທໍ້ໃນສັງຄົມ ໃຫ້ຫຼຸດນ້ອຍຖອຍລົງເທື່ອລະກ້າວ; ສືບຕໍ່ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງ, ປຸກລະດົມປະຊາຊົນ ເອົາໃຈໃສ່ການປູກ-ການລ້ຽງ ໃຫ້ມີປະສິດທິຜົນກວ່າເກົ່າ ດ້ວຍການຫັນຈາກການຜະລິດແບບຄອບຄົວ ມາຜະລິດແບດປັນກຸ່ມ-ເປັນຟາມ, ຈັດສັນພູມລຳເນົາ, ພື້ນທີ່ທຳການຜະລິດ, ທີ່ຢູ່ອາໃສ ແລະ ຈັດສັນອາຊີບຄົງທີ່ ໃຫ້ປະຊາຊົນຢ່າງລະອຽດ ເພື່ອກ້າວໄປສູ່ຄອບຄົວພົ້ນທຸກ ເທື່ອລະກ້າວ; ວຽກງານ 3 ສ້າງ ໃຫ້ເອົາໃຈໃສ່ສະຫຼຸບຕີລາຄາຄືນ ບ່ອນທີ່ເປັນຈຸດສຸມຂອງແຂວງ, ຂອງເມືອງ ໃນແຕ່ລະເມືອງ ເພື່ອເປັນຕົວແບບ ຂະຫຍາຍໄປສູ່ເຂດອື່ນໆ ເພື່ອສົມທຽບການພັດທະນາຂອງບ້ານ ທີ່ເປັນບ້ານ 3 ສ້າງ ແລະ ບ້ານທີ່ບໍ່ແມ່ນບ້ານ 3 ສ້າງ ມີຄວາມແຕກຕ່າງກັນ ໜ້ອຍຫຼາຍປານໃດ? ແລະ ມີຈັກເມືອງທີ່ບໍ່ເປັນຫົວໜ່ວຍເຂັ້ມແຂງຮອບດ້ານ ຈຶ່ງຮູ້ວ່າສຳເລັດໜ້ອຍຫຼາຍປານໃດ? ນອກນີ້ການແບ່ງງານ, ແບ່ງຂັ້ນຄຸ້ມຄອງ, ແບ່ງສິດ, ແບ່ງຄວາມຮັບຜິດຊອບລະຫວ່າງແຂວງກັບເມືອງ ມີຄວາມເໝາະສົມກັບວຽກງານຕົວຈິງແລ້ວບໍ?; ພ້ອມທັງເອົາໃຈໃສ່ປະຕິບັດຄໍາສັ່ງເລກທີ 15/ນຍ ໃຫ້ເຂັ້ມງວດ ໂດຍສະເພາະຢູ່ລຽບຕາມຊາຍແດນ ກ່ຽວກັບການຄຸ້ມຄອງຊັບພະຍາກອນ ທໍາມະຊາດ ເຄື່ອງປ່າຂອງດົງ ແລະ ອື່ນໆໃຫ້ເຂັ້ມງວດ; ນອກນີ້ວຽກງານພັກ ໃຫ້ສືບຕໍ່ຜັນຂະຫຍາຍຜົນສຳເລັດ ການດຳເນີນຊີວິການເມືອງ ປັບປຸງປົວແປງພາຍໃນພັກ ລົງເລິກຕື່ມ ໃນການສຶກສາອົບຮົມ ເພື່ອໃຫ້ມີການຫັນປ່ຽນ, ການກໍ່ສ້າງການຂະຫຍາຍພັກ ໃຫ້ໄດ້ຈັດຕັ້ງເຜີຍແຜ່ບັນດາຄຳສັ່ງ, ນິຕິກໍາຕ່າງໆທີ່ກ່ຽວຂ້ອງ (ທີ່ເປັນສະບັບປັບປຸງໃໝ່) , ວຽກງານພະນັກງານ ໃຫ້ສືບຕໍ່ກໍ່ສ້າງພະນັງງານສືບທອດ ປ່ຽນແທນແຕ່ລະຂັ້ນ ຢ່າງເປັນປົກກະຕິ, ວຽກງານກວດກາ ໃນນີ້ການກວດກາພາຍໃນພັກ ໃຫ້ເອົາໃຈໃສ່ຕິດຕາມ ການປະຕິບັດກົດລະບຽບຂອງພັກ, ການກວດກາລັດ ກວດກາການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ, ການປະຕິບັດລະບຽບກົດ ໝາຍທີ່ລັດວາງອອກ, ການປະຕິບັດລາຍ-ຮັບລາຍຈ່າຍງົບປະມານ, ການຄຸ້ມຄອງ ແລະ ນໍາໃຊ້ຊັບພະຍາກອນ ແລະ ການຕ້ານການສໍ້ລາດບັງຫຼວງຂອງພັກ-ລັດເຮົາ ເຫຼົ່ານີ້ເປັນຕົ້ນ.
                                                                                                                          ພາບ-ຂ່າວໂດຍ: ພຸດທະສອນ.