ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຈົ້າແຂວງເນັ້ນໜັກ ເຊກອງເອົາໃຈໃສ່ເກັບລາຍຮັບໃຫ້ບັນລຸແຜນ

    ທ່ານເຈົ້າແຂວງໆ ເຊກອງ ໄດ້ກ່າວແນະນຳ ໃນກອງປະຊຸມເຜີຍແຜ່ແນະນຳ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2018 ອາທິດແລ້ວນີ້ ໂດຍເນັ້ນໃຫ້ຂະແໜງການເງິນ ເພີ່ມທະວີການຂຸດຄົ້ນ ແລະ ຄຸ້ມຄອງລາຍຮັບງົບປະມານປະຈຳປີ 2018 ໃຫ້ບັນລຸຕາມຄາດໝາຍ ຕິດພັນກັບການຄຸ້ມຄອງລາຍຈ່າຍ ໃຫ້ໄປຕາມແຜນການທີ່ວາງໄວ້.
    ທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆ ເຊກອງ ໄດ້ກ່າວໃນກອງເຜີຍແຜ່ແນະນຳ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2018 ໃນລະຫວ່າງ ວັນທີ 1-2 ກຸມພາ 2018 ຜ່ານມາ ທີ່ສະໂມສອນໃຫຍ່ຂອງແຂວງ ໂດຍໄດ້ເນັ້ນໃຫ້ຂະແໜງແຜນການ ແລະ ການເງິນເອົາໃຈໃສ່ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2018 ດ້ວຍຈິດໃຈບຸກທະລຸ ເພື່ອຍົກສູງ ປະສິດທິພາບຜົນການຜະລິດ, ການລົງທຶນ, ການນຳໃຊ້ຊັບພະຍາກອນທຳມະຊາດ ຢ່າງສົມເຫດສົມຜົນ, ສົ່ງເສີມການປະດິດສ້າງໃໝ່ ແລະ ການນຳໃຊ້ວິທະຍາສາດເຕັກໂນໂລຊີທີ່ທັນສະໄໝ ເຂົ້າໃນການຄຸ້ມຄອງເສດຖະກິດ-ການເງິນ ໂດຍສະເພາະພາກລາຍຮັບ ເພື່ອອັດຊ່ອງວ່າງການສວຍໃຊ້ ແລະ ການຮົ່ວໄຫຼໃຫ້ຫຼຸດລົງ.
     ໂດຍລວມແລ້ວ ແຂວງເຊກອງ ແມ່ນມີສະຖຽນລະພາບ ທາງດ້ານການເມືອງໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ໄດ້ເອົາໃຈໃສ່ຊຸກຍູ້ການຜະລິດ ຂອງປະຊາຊົນໃຫ້ເປັນສິນຄ້າ ເພື່ອແກ້ໄຂຄວາມທຸກຍາກໃຫ້ຫຼຸດລົງ, ພ້ອມດຽວກັນນີ້ ກໍສູ້ຊົນ ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2018 ໂດຍສະເພາະພາກລາຍຮັບ ໃຫ້ບັນລຸຕາມແຜນການທີ່ວາງໄວ້. ແຕ່ບັນຫາດັ່ງກ່າວນີ້ ບັນດາພະແນກ, ຫ້ອງການຂັ້ນແຂວງ ແລະ ເມືອງ ໂດຍສະເພາະພະນັກງານ-ລັດຖະກອນ ໃນຂະແໜງແຜນການ-ການເງິນ ຕ້ອງມີຈິດໃຈໂປ່ງໃສ, ມີຄວາມຮັບຜິດຊອບ ແລະ ປະຕິບັດ 10 ຂໍ້ຫ້າມ ກ່ຽວກັບວິໄນແຜນການ-ການເງິນ, ສະກັດກັ້ນ ອັດຊ່ອງວ່າງການຕົກເຮ່ຍເສຍຫາຍ ຂອງລາຍຮັບ ແລະ ລາຍຈ່າຍງົບປະມານ, ປະຕິບັດມາດຕະການຕໍ່ຜູ້ລະເມີດໃຫ້ເດັດຂາດ ແລະ ທັນການ.
      ທ່ານ ຄຳເຜີຍ ບຸດດາວຽງກ່າວອີກວ່າ: ລັດສຸມໃສ່ ປະຕິບັດບົດບາດຄຸ້ມຄອງມະຫາພາກດ້ວຍກົດໝາຍ, ນະໂຍບາຍ ແລະ ມາດຕະການອື່ນໆ ເພື່ອອຳນວຍຄວບຄຸມເສດຖະກິດ ໃຫ້ມີຄວາມເຕີບໂຕຢ່າງໝັ້ນທ່ຽງ ໂດຍສະເພາະແມ່ນ ປັດໄຈດ້ານບຸກຄະລາກອນ ຕ້ອງມີຄວາມຮັບຜິດຊອບຖືຜົນປະໂຫຍດລວມໝູ່ ແລະ ຂອງຊາດ ເປັນພື້ນຖານ; ປັບປຸງລະບົບການຄຸ້ມຄອງພາສີ ແລະ ການເກັບລາຍຮັບ ໄປສູ່ຄວາມທັນສະໄໝເທື່ອລະກ້າວ, ຄຸ້ມຄອງເສດຖະກິດມະຫາພາກ ໃຫ້ມີສະຖຽນລະພາບ ແລະ ຍືນຍົງ; ຄຸ້ມຄອງໜີ້ສາທາລະນະ ໃຫ້ຢູ່ໃນຂອບເຂດທີ່ຄວບຄຸມໄດ້ ເພື່ອສ້າງຄວາມໄວ້ວາງໃຈໃນການລົງທຶນ ຂອງພາກທຸລະກິດ ແລະ ສ້າງບັນດາປະຖົມປັດໄຈດ້ານທຶນຮອນ, ວັດຖຸເຕັກນິກ ແລະ ວິທະຍາສາດເຕັກໂນໂລຊີ, ຂໍ້ມູນຂ່າວສານ ລວມທັງບຸກຄະລາກອນ, ຜູ້ປະກອບການ ແລະ ສ້າງກໍາລັງແຮງງານ ທີ່ມີສີມື ເພື່ອຮອງຮັບການພັດທະນາ ໃຫ້ໄປຕາມແຜນການທີ່ກຳນົດໄວ້. 
                                                                                                                                          ຂ່າວ-ພາບໂດຍ : ສັນຍາ