ວັນຈັນ, 15 ຕຸລາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ນາງ ເອະດາວັນ ພັນທະວົງ ໄດ້ຮັບຕຳແໜ່ງນາງສາວເຊກອງ 2018

 

       ນາງ ເອະດາວັນ ພັນທະວົງ ອາຍຸ 18 ປິ, ຕົວແທນ ສາວງາມ ຈາກເມືອງ ທ່າແຕງ ໝາຍເລກ S18 ໄດ້ຮັບຕຳແໜງ ນາງສາວ ເຊກອງ ປະຈຳປີ 2018, ຂະນະທີ່ ຮອງຊະນະເລີດ ອັນດັບທີໜຶ່ງ ແມ່ນໝາຍເລກ S17 ນາງ ອໍາໄພວອນ ຈັນສີປະເສີດ ຕົວແທນ ສາວງາມ ຈາກ ບໍລິສັດ ຄູນມີໄຊ ສົ່ງ ເຂົ້າປະກວດ ໄດ້ຮອງຊະນະເລີດ ອັນດັບໜື່ງ ແລະ ນາງ ຫຼີງສະໄໝ ວົງສີຂຽວ ຕົວແທນ ຈາກ ເມືອງລະມາມ ໄດ້ ຮອງຊະນະເລີດ ອັນດັບສອງ.
       ງານປະກວດ ນາງສາວເຊກອງ ປະຈຳປີ 2018 ໄດ້ມີຂຶ້ນ ຢ່າງຄຶກຄື້ນ ມ່ວນຊື່ນ ໃນຄ່ຳຄືນ ວັນທີ 10 ເມສາ 2018 ທີ່ສະໂມສອນໃຫຍ່ ຫ້ອງວ່າການແຂວງ ໂດຍມີ ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ພ້ອມດ້ວຍພັນລະຍາ, ມີການນຳ ຂອງແຂວງ-ເມືອງ, ພາກສ່ວນ ກ່ຽວຂ້ອງ ແລະ ມວນຊົນ ເຂົ້າຮ່ວມຢ່າງຫຼວງຫຼາຍ.

 

 

 


            ໃນພິທີ ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ຮອງປະທານ ຄະນະກຳມະການ ຈັດງານ ປະກວດນາງສາວ ເຊກອງ ກ່າວວ່າ: ການຈັດງານ ປະກວດນາງສາວ ເຊກອງປະຈຳປີ 2018 ແມ່ນກິດຈະກຳໜຶ່ງ ທີ່ສຳຄັນ ຊຶ່ງ ຈັດຂຶ້ນ ເພື່ອສ້າງຄວາມ ເບີກບານ ມ່ວນຊື່ນ ໃຫ້ແກ່ ການສະເຫຼີມ ສະຫຼອງ ປີທ່ອງທ່ຽວລາວ ກໍ່ຄື ສະຫຼອງ ບຸນປີໃໝ່ລາວ ພສ 2561 ພ້ອມດຽວກັນນັ້ນ ກໍເພື່ອສົ່ງເສີມ ຄວາມສາມາດ ຂອງ ແມ່ຍິງ ຕິດພັນ ກັບການອະນຸລັກ ມູນເຊື້ອ ວັດທະນະທຳ, ຮີດຄອງ ປະເພນີ ອັນດີງາມ ຂອງຊາດ, ຂອງເຜົ່າ ໃຫ້ຍືນຍົງ ຄົງຕົວ ຄຽງຄູ່ ກັບຊາດລາວ-ຄົນລາວ ໂດຍສະເພາະ ຊາວແຂວງເຊກອງ ເຊິ່ງເປັນແຂວງ ທີ່ມີເອກະລັກ ຂອງເຜົ່າ ທີ່ຫຼາກຫຼາຍສີສັນ ແລະ ສວຍງາມ.
            ການປະກວດຄັ້ງນີ້ ມີຕົວແທນ ສາວງາມ ຈາກບັນດາເມືອງ, ບໍລິສັດ-ລັດວິສາຫະກິດ ຕ່າງໆ ໃນທົ່ວແຂວງ ເຂົ້າຮ່ວມທັງໝົດ 20 ຄົນ ໂດຍຈັດໃຫ້ມີການເດີນແບບ 10 ເຜົ່າ ພາຍໃນແຂວງ, ສະແດງ ຄວາມສາມາດ ໃນການຟ້ອນ ລຳວົງລາວ, ຟ້ອນບັດສະຫຼົບ, ການຕອບຄຳຖາມ ແລະ ກິດຈະກຳ ການສະແດງອື່ນໆ ຜ່ານການປະກວດ ແລະ ການຄັດເລືອກ ຂອງຄະນະກຳມະການ ໃນຮອບສຸດທ້າຍ ແມ່ນ ນາງ ເອະດາວັນ ພັນທະວົງ ຕົວແທນ ສາວງາມ ຈາກເມືອງ ທ່າແຕງ ໝາຍເລກ S18 ໄດ້ຮັບຕໍາແໜ່ງ ນາງສາວ ເຊກອງ ປະຈໍາປີ 2018; ນາງ ອໍາໄພວອນ ຈັນສີປະເສີດ ໝາຍເລກ S17 ຕົວແທນສາວງາມ ຈາກ ບໍລິສັດຄູນມີໄຊ ໄດ້ຮັບຕໍາແໜ່ງ ຮອງຊະນະເລີດ ອັນດັບໜື່ງ ແລະ ນາງ ຫຼີງສະໄໝ ວົງສີຂຽວ ໝາຍເລກ S7 ຕົວແທນ ຈາກເມືອງລະມາມ ໄດ້ຮອງຊະນະເລີດອັນດັບສອງ.
             ໃນພິທີອັນມີຄວາມໝາຍສຳຄັນ ທ່ານ ຄຳເຜີຍ ບຸດດາວຽງ ພ້ອມພັນລະຍາ, ທ່ານ ເຫຼັກໄຫຼ ສີວິໄລ ພ້ອມພັນລະຍາ ແລະ ການນຳຂອງແຂວງ ໄດ້ມອບມຸງກຸດ, ສາຍສະພາຍ, ຂອງຂວັນ ແລະ ຊໍ່ດອກ ໄມ້ໃຫ້ ນາງສາວ ຕາມລຳດັບ ທີໜຶ່ງໄດ້ ຮັບມຸງກຸດ, ສາຍສະພາຍ ພ້ອມເງິນສົດ 12 ລ້ານກີບ; ຮອງຊະນະເລີດ ອັນດັບໜື່ງ ໄດ້ຮັບສາຍສະພາຍ, ເງິນສົດ 10 ລ້ານກີບ, ຮອງຊະນະເລີດ ອັນດັບສອງ ໄດ້ຮັບສາຍສະພາຍ, ເງິນສົດ 8 ລ້ານກີບ ແລະ ຮອງຊະນະເລີດ ອັນດັບ 3 ຈໍານວນ 4 ນາງສາວ ໄດ້ຮັບ ສາຍສະພາຍ ພ້ອມດ້ວຍເງິນສົດ 5 ລ້ານກີບ, ພ້ອມນີ້ ຍັງມີລາງວັນຂັວນໃຈ ຊ່າງພາບ, ລາງວັນ ຂວັນໃຈມະຫາຊົນ ແລະ ລາງວັນ ຊົມເຊີຍ ອື່ນໆຈໍານວນໜື່ງ.

ລະຫັດຮູບ: 09,55,32,80