ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ ເຄື່ອນໄຫວກວດສອບຄຸນນະພາບຂອງນໍ້າມັນເຊື້ອໄຟ

   ວັນທີ 17 ຕຸລາ 2017 ຜ່ານມາ ພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ ຮ່ວມກັບກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໄດ້ລົງກວດກາຄຸນນະພາບນໍ້າມັນເຊື້ອໄຟຢູ່ປໍ້າຂອງທ່ານ ສຸກສະຫວັນ (ປໍ້າ PETRO LAO) ຕັ້ງຢູ່ບ້ານໂມ ເມືອງລະມາມ ແຂວງເຊກອງ.
   ການເຄື່ອນໄຫວກວດສອບໃນຄັ້ງນີ້, ນໍາໂດຍທ່ານ ສຸລະພົນ ໝື່ນວິເສດ ຫົວໜ້າພະແນກວິທະຍາສາດ ແລະເຕັກໂນໂລຊີແຂວງເຊກອງ, ໃຫ້ກຽດເຂົ້າຮ່ວມມີທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ, ຮອງເຈົ້າແຂວງ ຜູ້ຊີ້ນໍາຂົງເຂດວຽກງານເສດຖະກິດຂັ້ນແຂວງ, ມີບັນດາກໍາມະການກວດກາຈາກກົມມາດຕະຖານ ແລະ ວັດແທກ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
   ທ່ານ ສຸລະພົນ ໝື່ນວິເສດ ກ່າວວ່າ: ຈຸດປະສົງຂອງການລົງກວດກາໃນຄັ້ງນີ ກໍເພື່ອເປັນການກວດກາຄຸ້ມຄອງ, ຄວບຄຸມຄຸນນະພາບຂອງນໍ້າມັນເຊື້ອໄຟ ວ່ານໍ້າມັນຢູ່ປໍ້າດັ່ງກ່າວໄດ້ຮັບມາດຕະຖານດີຫຼືບໍ່ ແລະ ທັງຮັບປະກັນການປະຕິບັດໜ້າທີ່ໃຫ້ຖືກຕ້ອງຕາມລະບຽບການ, ມາດຕະຖານ ແລະ ຂັ້ນຕອນການກວດສອບ ການເຄື່ອນໄຫວກວດສອບໃນຄັ້ງນີ້ແມ່ນ ຈະໄດ້ມີການກວດສອບຫານໍ້າ ແລະ ສານປົນເປື້ອນໃນນໍ້າມັນ, ປະລິມານຄວາມໜຽວເຈືອປົນໃນນໍ້າມັນ, ປະລິມານທາດຊືນ, ປະລິມານເຖົ່າ, ສີ, ລັກສະນະທີ່ເປັນກົດ, ຈຸດຂຸ້ນໄສ, ການກັ່ນອຸນຫະພູມຕ່າງໆ.
   ຈາກຜົນການກວດກາຄຸນນະພາບນໍ້າມັນເຊື້ອໄຟ ຕົວຈິງ ຢູ່ ໃນປໍ້າດັ່ງກ່າວເຫັນວ່າ: ຜົນການກວດກາຄຸນນະພາບນໍ້າມັນກາຊວນ ( Diesel ) ແລະນໍ້າມັນແອັດຊັງ ( Gasoline) ແມ່ນຢູ່ໃນເກນທໍາມະດາ ໄດ້ມາດຕະຖານດີ (ຜ່ານ) ບໍ່ພົບສານປົນເປື້ອນໃດໆ. ດັ່ງນັ້ນ ບັນດາຄະນະກໍາມະການກວດກາຄຸນນະພາບນໍ້າມັນເຊື້ອໄຟ ຈິ່ງໄດ້ເຮັດບົດບັນທຶກຮ່ວມກັບທ່ານ ສຸກສະຫວັນ ຕາງໜ້າເຈົ້າຂອງປໍ້ານໍາມັນ PETRO LAO ເພື່ອເປັນຫຼັກຖານຢັ້ງຢືນ ແລະ ເປັນບ່ອນອີງໃນການດໍາເນີນກິດຈະການໃນຂັ້ນຕໍ່ໄປ.
                                                                                                         ຂ່າວ-ພາບໂດຍ: ນາລີວັນ