ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ການນຳກະຊວງແຮງງານເຄື່ອນໄຫວຊຸກຍູ້ວຽກງານ ຄກລ ຢູ່ແຂວງເຊກອງ

   ໃນວັນທີ 21 ກໍລະກົດ 2017 ຜ່ານມາ ທ່ານ ຄຳແກ້ວ ສານບຸນຄຸນໄຊ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມຄະນະ ໄດ້ລົງເຄື່ອນໄຫວ ຊຸກຍູ້ວຽກງານ ໂຄງການເກັບກູ້ລະເບີດ (ຄກລ) ຢູ່ ແຂວງເຊກອງ ຊຶ່ງໃນໂອກາດດັ່ງກ່າວ ທ່ານກໍໄດ້ພົບປະ ແລະ ໂອ້ລົມພະນັກງານ ຄກລ ປະຈຳແຂວງເຊກອງ ໂດຍໃຫ້ການຕ້ອນຮັບຢ່າງອົບອຸ່ນຂອງທ່ານ ສຸວັນຄຳ ຄຳຄູນເມືອງ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງເຊກອງ.
   ໃນພິທີທ່ານ ບຸນເຄນ ພະລັງສີ ຫົວໜ້າຜູ້ປະສານງານ ໂຄງການເກັບກູ້ລະເບີດ ປະຈຳແຂວງເຊກອງ ກໍໄດ້ລາຍງານສະພາບການຈັດຕັ້ງປະຕິບັດວຽກງານ ໃນໄລຍະຜ່ານມາວ່າ: ເຊກອງ ກໍເປັນອີກແຂວງໜຶ່ງຂອງ ສປປ ລາວ ໄດ້ຮັບຜົນກະທົບຈາກລູກລະເບີດ ທີ່ບໍ່ທັນແຕກ ໂດຍສ່ວນໃຫຍ່ ແມ່ນກວມຢູ່ໃນເຂດພື້ນທີ່ທຳການບຸກເບີກ ເພື່ອທຳການຜະລິດ ດ້ານກະສິກຳຂອງພໍ່-ແມ່ປະຊາຊົນ ຊຶ່ງໃນໄລຍະຜ່ານມາ ໂດຍສະເພາະແມ່ນ 6 ເດືອນຕົ້ນປີນີ້ ພະນັກງານ ຄກລ ປະຈຳແຂວງເຊກອງ ກໍໄດ້ເອົາໃຈໃສ່ ປະຕິບັດໜ້າທີ່ວຽກງານວິຊາການ-ວິຊາສະເພາະຂອງຕົນ ດ້ວຍຄວາມຮັບຜິດຊອບສູງ ແລະ ຍາດໄດ້ຜົນສຳເລັດຫຼາຍໆດ້ານຄື: ເຄື່ອນໄຫວໂຄສະນາ ສຶກສາຄວາມສ່ຽງ ຂອງລູກລະເບີດບໍ່ທັນແຕກໄດ້ທັງໝົດ 23 ບ້ານ, ມີຜູ້ເຂົ້າຮ່ວມ 3.364 ເທື່ອຄົນ; ເຄື່ອນໄຫວສຳຫຼວດຂໍ້ມູນ ແລະ ວິເຄາະຂໍ້ມູນຈຸດຫຼັກຖານລູກລະເບີດໄດ້ 11 ບ້ານເກັບກູ້ລູກລະເບີດໄດ້ 237 ໜ່ວຍ; ວຽກທຳລາຍເຄື່ອນທີ່ໄດ້ 12 ບ້ານ ທຳລາຍລູກລະເບີດໄດ້ 105 ໜ່ວຍ; ກວດກູ້ພື້ນທີ່ໄດ້ 1.105.284 ຕາແມັດ ພົບລູກລະເບີດ 2.991 ໜ່ວຍ; ສຳຫຼວດຂໍ້ມູນ ເພື່ອກຳນົດພື້ນທີ່ CHA ໄດ້ 4.565.000 ຕາແມັດ, ກຳນົດພື້ນທີ່ CHA ໄດ້ 354.787 ຕາແມັດພົບລູກລະເບີດທັງໝົດ 511 ໜ່ວຍ ແລະ ວຽກງານກົນຈັກຕັດຫຍ້າ ສາມາດອະນາໄມພື້ນທີ່ໄດ້ 587.912 ຕາແມັດ, ກວດກູ້ພື້ນທີ່ໄດ້ 37.486 ເຮັກຕາພົບລູກລະບີດ 6 ໜ່ວຍ, ເຊີ່ງທັງນີ້ແມ່ນແນໃສ່ ເພື່ອຫຼຸດຜ່ອນຄວາມສ່ຽງຕໍ່ຊີວິດ ແລະ ຊັບສີນຂອງປະຊາຊົນບັນດາເຜົ່າ ທີ່ຢູ່ເຂດຫ່າງໄກສອກຫຼີກ.
   ໂອກາດດຽວກັນນີ້ ທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກໍໄດ້ມີການເຈາະຈີ້ມ ໃນຫຼາຍໆບັນຫາທີ່ເປັນອຸປະສັກ ທ້າທາຍ ແລະ ຂີດຂວາງຕໍ່ການປະຕິບັດ ໜ້າທີ່ວຽກງານ ເພື່ອນຳໄປປຶກສາຫາລືກັນ ແລະ ແກ້ໄຂຕໍ່ໄປ ພ້ອມກັນນີ້ ທ່ານ ກໍໄດ້ເນັ້ນໃຫ້ ຄກລ ແຂວງສືບຕໍ່ເອົາໃຈໃສ່ ການນຳໃຊ້ວັດຖຸ, ອຸປະກອນ ແລະ ພາຫະນະຕ່າງໆ ໃຫ້ເກີດປະໂຫຍດສູງສຸດ ແລະ ນຳໃຊ້ໄດ້ຢ່າງຍາວນານ; ເອົາໃຈໃສ່ຕໍ່ການປະຕິບັດໜ້າທີ່ວຽກງານ ຕາມພາລະບົດບາດ, ສິດ, ໜ້າທີ່ຂອງຕົນ, ເຮັດຕາມບົດຮຽນ ເພື່ອຫຼີກລຽງຂໍ້ຜິດພາດ ທີ່ອາດຈະເກີດຂຶ້ນ; ເກັບກູ້ຄືນພື້ນທີ່ມີຄວາມສ່ຽງຕໍ່ລະເບີດບໍ່ທັນແຕກ ເພື່ອໃຫ້ພໍ່ແມ່ປະຊາຊົນນຳໃຊ້ເນື້ອທີ່ເຂົ້າໃນການຜະລິດ, ທີ່ຢູ່ອາໄສ ແລະ ອື່ນໆ ເພື່ອແນໃສ່ ສ້າງເງື່ອນໄຂໃນການພັດທະນາຄຸນນະພາບຊີວິດ ແລະ ການເປັນຢູ່ຂອງປະຊາຊົນບັນດາເຜົ່າໃຫ້ມີຄວາມປອດໄພ ຈາກລູກລະເບີດທີ່ບໍ່ທັນແຕກ ໃຫ້ນັບມື້ດີຂຶ້ນເທື່ອລະກ້າວ.

                                                                       ( ຂ່າວ-ພາບ : ສັນຍາ ແກ້ວໄຊຍະວົງ )