ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ສຄອ ສ້າງຄວາມເຂັ້ມແຂງໃຫ້ພາກທຸລະກິດຂັ້ນແຂວງ

  ສະພາການຄ້າ ແລະອຸດສະຫະກໍາ (ສຄອ) ແຫ່ງຊາດ ຮ່ວມກັບ ໂຄງການສະຫນັບສະຫນູນພາກທຸລະກິດລຸ່ມແມ່ນໍ້າຂອງ ( Mekong Business Initiative ) ຈັດກອງປະຊຸມປືກສາຫາລື ເພື່ອສ້າງຄວາມເຂັ້ມແຂງໃຫ້ພາກທຸລະກິດຂອງແຂວງເຊກອງ ຂຶ້ນໃນຕອນເຊົ້າວັນທີ 17 ພຶດສະພາ 2017 ນີ້ ທີ່ ສະໂມສອນໃຫຍ່ຫ້ອງວ່າການງແຂວງ ໂດຍການເປັນປະທານຮ່ວມ ຂອງທ່ານ ວັນທອງ ສິດທິກູນ ຮອງປະທານ (ສຄອ) ແຫ່ງຊາດ, ທ່ານ ພັນສອນ ແສນສົ່ງເສີມ ຫົວຫນ້າພະແນກອຸດສະຫະກໍາ-ການຄ້າແຂວງ ແລະ ທ່ານ ວິໄຊ ໄຍຍາສານ ປະທານ ສຄອ ແຂວງ, ມີບັນດາຫົວຫນ່ວຍທຸລະກິດ, ພາກເອກະຊົນພາຍໃນແຂວງ ເຂົ້າຮ່ວມ.
   ທ່ານ ວັນທອງ ສິດທິກູນ ຮອງປະທານ ສຄອ ແຫ່ງຊາດ ກ່າວວ່າ: ຈຸດປະສົງຂອງການຈັດກອງປະຊຸມໃນຄັ້ງນີ້ ກໍເພື່ອເລັ່ງໃສ່ສ້າງສາຍພົວພັນແຮງງານທີ່ດີ ໃນນາມອົງການຈັດຕັ້ງຕາງຫນ້າທຸລະກິດ, ຕາງຫນ້າຜູ້ໃຊ້ແຮງງານ ແລະ ພັດທະນາແວດລ້ອມທຸລະກິດ ໄດ້ມີສ່ວນຮ່ວມໃນການປະກອບຄໍາເຫັນຕໍ່ການປັບປຸງ ການສ້າງນິຕິກໍາ ແລະ ລະບຽບກົດຫມາຍ ໃນເວທີປຶກສາຫາລື ລະຫວ່າງ ພາກລັດ-ພາກເອກະຊົນ ແລະ ກອງປະຊຸມປຶກສາຫາລືໃນແຕ່ລະໄລຍະ; ທັງສ້າງຄວາມເຂັ້ມແຂງຂອງທຸລະກິດ ຂະຫນາດນ້ອຍ-ກາງ ພ້ອມທັງຂະຫຍາຍການຜະລິດທຸລະກິດ ທີ່ຖືກຕ້ອງຕາມລະບຽບກົດຫມາຍ ໃຫ້ຫລາຍຂຶ້ນກວ່າເກົ່າ ໂດຍການສ້າງສູນທຸລະກິດຂະຫນາດນ້ອຍ-ກາງ ແລະ ສູນຂໍ້ມູນທຸລະກິດ ຢູ່ ສຄອ ແຫ່ງຊາດລາວ. ພ້ອມນີ້, ກໍ່ເພື່ອສ້າງຖານຂໍ້ມູນທຸລະກິດ ຖືເປັນວຽກທີ່ສໍາຄັນ ທີ່ຕ້ອງລະດົມໃຫ້ເຂົ້າເປັນສະມາຊິກ ເພື່ອໃຫ້ເຂົ້າເຖິງຂໍ້ມູນຂ່າວສານ ແລະ ມີສ່ວນຮ່ວມໃນການດັດປັບນິຕິກໍາ ທີ່ຕິດພັນກັບຂົງເຂດທຸລະກິດຕົນ ແລະ ກິດຈະກໍາຫລາຍໆຢ່າງ ເປັນຕົ້ນງານວາງສະແດງສິນຄ້າ ແລະ ພົບປະນັກທຸລະກິດທັງພາຍໃນ ແລະ ຕ່າງປະເທດ, ຫລາຍກິດຈະກໍາທີ່ຕ້ອງສ້າງຄວາມເຂັ້ມແຂງໃຫ້ ສຄອ ແຂວງ ແລະ ພາກທຸລະກິດແຂວງເຊີ່ງທັງນີ້ ເພື່ອເປັນການແລກປ່ຽນບົດຮຽນ ດ້ານການພັດທະນາທຸລະກິດ ໃຫ້ມີຄວາມກ້າວໜ້າໃນອະນາຄົດ.
   ທ່ານ ວັນທອງ ສິດທິກູນ ກ່າວຕື່ມອີກວ່າ: ກອງປະຊຸມຈະດໍາເນີນເປັນເວລາເຄິ່ງວັນ ໂດຍຈະໄດ້ເຜີຍແຜ່ບັນດາເອກະສານຕ່າງໆທີ່ກ່ຽວຂ້ອງ ພ້ອມທັງປຶກສາຫາລືແລກປ່ຽນບົດຮຽນ ດ້ວຍການຕອບແບບສອບຖາມກ່ຽວກັບ ດັດສະນີການສ້າງສິ່ງອໍານວຍຄວາມສະດວກ ທາງດ້ານການຄ້າ-ການລົງທຶນຂັ້ນແຂວງ ແລະ ຊອກວິທີທາງຮ່ວມກັນ ເພື່ອບັນລຸຈຸດປະສົງ ແລະເປົ້າໝາຍທີ່ວາງໄວ້.

                                                                             ຂ່າວ-ພາບ: ນາລີວັນ