ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ໂຮງໝໍສູນກາງເທື່ອທຽນເຫວ້-ສາທາລະນະສຸກ ແຂວງເຊກອງ ລົງນາມຮ່ວມມືຂົງເຂດສາທາລະນະສຸກ

  ຄະນະຜູ້ແທນໂຮງໝໍສູນກາງ ແຫ່ງທີ 2 ແຂວງ ເທື່ອທຽນເຫວ້ ສສ ຫວຽດນາມ ກັບພະແນກສາທາລະນະສຸກ ແຂວງເຊກອງ ສປປ ລາວ ໄດ້ສະຫຼຸບຕີລາຄາຄືນວຽກງານສາທາລະນະສຸກໃນໄລຍະຜ່ານມາ ແລະເຊັນບົດບັນທຶກຊ່ວຍຈໍາ ເພື່ອຮ່ວມມືກັນດ້ານຂົງເຂດສາທາລະນະສຸກ.
  ພິທີດັ່ງກ່າວໄດ້ຈັດຂຶ້ນ ໃນໂອກາດທີ່ຄະນະຜູ້ແທນໂຮງໝໍສູນກາງ ແຫ່ງທີ 2 ແຂວງເທື່ອທຽນເຫວ້ ສສ ຫວຽດນາມ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ແຂວງແຂວງເຊກອງ ໃນຕອນເຊົ້າວັນທີ 06 ເມສາ 2017 ຜ່ານມາ ຢູ່ພະແນກສາທາລະນະສຸກແຂວງເຊກອງ, ເຊິ່ງນໍາໂດຍທ່ານ ຝ້າມຍືຫຽບ ສະມາຊິກສະພາແຫ່ງຊາດ ອໍານວຍການໂຮງໝໍສູນກາງ ແຂວງເທື່ອທຽນເຫວ້ ສສ ຫວຽດນາມ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
  ການເຮັດວຽກຮ່ວມກັນຄັ້ງນີ້ ກ່ອນອື່ນທັງສອງຝ່າຍກໍໄດ້ລາຍງານສະພາບທີ່ຕັ້ງ, ຈຸດພິເສດ, ພູມສັນຖານ ແລະ ການຈັດຕັ້ງປະຕິບັດວຽກງານ ສາທາລະນະສຸກຂອງແຂວງ ໃຫ້ກັນຮັບຊາບໂດຍຫຍໍ້. ຈາກນັ້ນທັງສອງຝ່າຍ ກໍໄດ້ພ້ອມກັນສັງເກດຕີລາຄາຄືນ ບັນດາຜົນງານ, ຜົນສໍາເລັດ ແລະ ຂໍ້ຄົງຄ້າງໃນການຈັດຕັ້ງປະຕິບັດ ບົດບັນທຶກຊ່ວຍຈໍາການຮ່ວມມື ເພື່ອການພັດທະນາ ທີ່ສອງຝ່າຍໄດ້ລົງນາມຮ່ວມກັນໃນໄລຍະຜ່ານມາ. ຈາກນັ້ນ, ຄະນະຜູ້ແທນທັງສອງຝ່າຍກໍ່ໄດ້ປຶກສາຫາລືຄົ້ນຄ້ວາ ພ້ອມທັງກໍານົດທິດທາງ ແລະ ເຊັນບົດບັນທຶກຊ່ວຍຈໍາຮ່ວມກັນ ເພື່ອເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານໃນຂົງເຂດສາທາລະນະສຸກ ລະຫວ່າງ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະແມ່ນລະຫວ່າງໂຮງໝໍສູນກາງແຫ່ງທີ 2 ແຂວງເທື່ອທຽນເຫວ້ ສສ ຫວຽດນາມ ແລະ ພະແນກສາທາລະນະສຸກແຂວງເຊກອງ ສປປ ລາວ ກ່ຽວກັບວຽກງານກໍ່ສ້າງ ແລະ ຖ່າຍທອດເຕັກນິກໃນຂົງເຂດສາທາລະນະສຸກ.
  ພ້ອມດຽວກັນນີ້, ທັງສອງຝ່າຍກໍໄດ້ພ້ອມກັນລົງນາມ ເຊັນບົດບັນທຶກຊ່ວຍຈໍາ ຝ່າຍໂຮງໝໍສູນກາງແຫ່ງທີ 2 ແຂວງເທື່ອທຽນເຫວ້ ລົງນາມໂດຍ ທ່ານ ຮ.ສ.ຈ ປອ. ຫວຽນ ຢຸຍທັງ ຮອງອໍານວຍການໂຮງໝໍສູນກາງແຫ່ງທີ 2 ແຂວງເທື່ອທຽນເຫວ້ ແລະ ຝ່າຍພະແນກສາທາລະນະສຸກແຂວງເຊກອງ ໂດຍແມ່ນທ່ານ ຄໍາໄຫຼ ສັນຕິພູມ ຮອງຫົວໜ້າພະແນກສາທາລະນະສຸກ ແຂວງເຊກອງ, ມີບັນດາຄະນະຜູ້ແທນທັງສອງຝ່າຍ ເຂົ້າຮ່ວມເປັນສັກຂີພະຍານ.
                                                                           ຂ່າວ-ພາບ: ນາລີວັນ