ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ-ກວາງນາມ ຫາລືກ່ຽວກັບວຽກງານການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ

  ຕອນເຊົ້າວັນທີ 11 ເມສາ 2017 ນີ້ ຄະນະຜູ້ແທນແຂວງເຊກອງ ສປປ ລາວ ແລະ ຄະນະຜູ້ແທນ ແຂວງ ກວາງນາມ ສສ ຫວຽດນາມ ໄດ້ຈັດກອງປະຊຸມປຶກສາຫາລືກ່ຽວກັບວຽກງານການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກຕ້ອງຕາມລະບຽບກົດໝາຍ ຢູ່ຕາມບໍລິເວນຊາຍແດນລາວ-ຫວຽດນາມ ຂຶ້ນທີ່ຫ້ອງປະຊຸມຫ້ອງວ່າການປົກຄອງແຂວງເຊກອງ ສປປ ລາວ ໂດຍມີທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ທ່ານ ເຈິ້ນ ດິ້ງ ຕຸງ ຮອງປະທານຄະນະກໍາມະການປະຊາຊົນແຂວງກວາງນາມ ສສ ຫວຽດນາມ, ມີຄະນະຜູ້ແທນທັງສອງຝ່າຍ ເຂົ້າຮ່ວມ.
  ການປະຊຸມຄັ້ງນີ້ ໄດ້ຄົ້ນຄ້ວາ, ແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາ ແລະ ແຕ່ງດອງບໍ່ຖືກກົດຫມາຍຢູ່ຕາມຂົງເຂດຊາຍແດນ ຂອງສອງແຂວງ ເຊກອງ-ກວາງນາມ ເພື່ອປຶກສາຫາລືວິທີການຈັດຕັ້ງປະຕິບັດ ໃຫ້ມີຜົນສໍາເລັດຕາມລະດັບຄາດຫມາຍທີ່ວາງໄວ້ ແລະ ທັງເພື່ອເປັນການຈັດຕັ້ງຜັນຂະຫຍາຍເນື້ອໃນຂໍ້ຕົກລົງລະຫວ່າງສອງລັດຖະບານລາວ-ຫວຽດນາມ ທີ່ໄດ້ລົງນາມເຊັນສັນຍາກ່ຽວກັບການແກ້ໄຂບັນຫາ ຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກລະບຽບ ຢູ່ບໍລິເວນຊາຍແດນ ລາວ-ຫວຽດນາມ ກໍຄືສອງແຂວງ ເຊກອງ-ກວາງນາມ ໃຫ້ປະກົດຜົນເປັນຈິງ, ພ້ອມທັງເສີມສ້າງສາຍພົວພັນຮ່ວມມື-ມິດຕະພາບ, ຄວາມສາມັກຄີແບບພິເສດ ທີ່ເປັນມູນເຊື້ອຂອງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ສອງແຂວງເຊກອງ-ກວາງນາມ ໃຫ້ເພີ່ມພູນຄູນສ້າງ ແລະ ກ້າວຂຶ້ນສູ່ລວງເລິກເລື້ອຍໆ.

 ການຄົ້ນຄ້ວາ ປຶກສາຫາລື ທັງສອງຝ່າຍໄດ້ຜັດປ່ຽນກັນ ລາຍງານກ່ຽວສະພາບການຈັດຕັ້ງປະຕິບັດຂໍ້ຕົກລົງ ໃນການແກ້ໄຂບັນຫາການຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກລະບຽບ ຢູ່ຕາມບໍລິເວນຊາຍແດນ ລາວ-ຫວຽດນາມ ກໍຄືສອງແຂວງເຊກອງ-ກວາງນາມ ໃນໄລຍະຜ່ານມາ ແລະ ໄດ້ພ້ອມກັນປະກອບຄໍາເຫັນ ໃສ່ຮ່າງບົດບັນທຶກສັນຍາ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ໃນຕໍ່ໜ້າ ມີລະບົບກົນໄກຄຸ້ຄອງທີ່ດີຂຶ້ນກວ່າເກົ່າ, ຈາກນັ້ນກໍໄດ້ລົງນາມເຊັນບົດບັນທຶກສອງຝ່າຍ, ຕ່າງ ຫນ້າຄະນະຜູ້ແທນຝ່າຍ ແຂວງເຊກອງ ໂດຍ ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ແລະ ຕາງຫນ້າຄະນະຜູ້ແທນຝ່າຍ ແຂວງກວາງນາມໂດຍ ທ່ານ ເຈິນດິ້ງຕຸງ ຮອງປະທານຄະນະກໍາມະການປະຊາຊົນແຂວງກວາງນາມ, ເຊິ່ງມີຄະນະຜູ້ແທນສອງຝ່າຍຮ່ວມເປັນສັກຂີພິຍານ.  

                                                                                    ຂ່າວ-ພາບ: ນາລີວັນ