ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ພະແນກວິທະຍາສາດເຕັກໂນໂລຊີແຂວງລົງກວດທຽບມາດຖານ ໝໍ້ນັບກະແສໄຟຟ້າ ແລະ ໝໍ້ແທກນໍ້າປະປາ ຢູ່ເມືອງທ່າແຕງ

 

  ໃນວັນທີ 25 ເມສາ 2017 ນີ້, ທ່ານ ນົງວິຊຽນ ສຸວັນນາ ຫົວໜ້າຂະແໜງຊັບສິນທາງປັນຍາ ແລະ ວັດແທກ ພະແນກວິທະຍາສາດ ແລະ ເຕັກໂນໂລຊີແຂວງເຊກອງ ພ້ອມດ້ວຍ ຄະນະກໍາມະການຂັ້ນແຂວງ, ຮ່ວມກັບຫ້ອງການ ວຕ ເມືອງທ່າແຕງ, ໄດ້ສົມທົບກັບລັດວິສາຫະກິດໄຟຟ້າ ແລະ ລັດວິສາຫະກິດນ້ຳປະປາ ສາຂາແຂວງເຊກອງ ໄດ້ລົງເຄື່ອນໄຫວຕິດຕາມກວດກາ, ກວດທຽບໝໍ້ນັບໄຟຟ້າ ແລະ ໝໍ້ແທກນ້ຳປະປາໃນຈຳນວນ 53 ບ້ານ ບ້ານທົ່ວເມືອງທ່າແຕງ.
  ທ່ານ ນົງວິຊຽນ ສຸວັນນາ ຫົວໜ້າຂະແໜງຊັບສິນທາງປັນຍາ ແລະ ວັດແທກພະແນກວິທະຍາສາດ ແລະ ເຕັກໂນໂລຊີ ແຂວງເຊກອງໄດ້ເວົ້າວ່າ: ການລົງເຄື່ອນໄຫວຕິດຕາມກວດກາ, ກວດທຽບໝໍ້ນັບກະແສໄຟຟ້າ ແລະ ໝໍ້ແທກນ້ຳປະປາໃນຈຳນວນ 53 ບ້ານ ບ້ານທົ່ວເມືອງທ່າແຕງ ໃນຄັ້ງນີ້ ແມ່ນເປັນການກວດທຽບລະບົບປົກກະຕິປະຈຳປີ ແລະ ວິທີການກວດທຽບແມ່ນປະຕະບັດຕາມລະບຽບຂອງກະຊວງວິທະຍາສາດ ແລະ ເຕັກໂນໂລຊີ, ກົມມາດຕະຖານ ແລະ ການວັດແທກ, ເຊິ່ງໃນທົ່ວເມືອງທ່າແຕງມີໝໍ້ນັບກະແສໄຟຟ້າທັງໝົດ 5.969 ໜ່ວຍ ແລະ ມີໝໍ້ແທກນ້ຳປະປາຈຳນວນ 1.810 ໜ່ວຍ, ທັງນີ້ກໍ່ເພື່ອໃຫ້ມີຄວາມລະອຽດຊັດເຈນ ແລະ ຖືກຕ້ອງຕາມມາດຕະຖານ ແນໃສ່ການປົກປ້ອງສິດຜົນປະໂຫຍດ, ຊັບສິນຂອງຜູ້ຊົມໃຊ້ ແລະ ຜູ້ບໍລະການ ບໍ່ໃຫ້ມີການເອົາລັດເອົາປຽບກັນ.
 ທານຫົວໜ້າຂະແໜງຊັບສິນທາງປັນຍາ ແລະ ວັດແທກກ່າວຕື່ມວ່າ: ຜ່ານການຕິດຕາມກວດກາ ແລະ ກວດທຽບຕົວຈິງເຫັນວ່າ: ບັນດາໝໍ້ນັບກະແສໄຟຟ້າ ແລະ ໝໍ້ແທກນ້ຳປະປາທີ່ຕິດຕັ້ງຕາມສຳນັກງານອົງການຕ່າງໆ ແລະ ທີ່ຢູ່ອາໃສຂອງພໍ່ແມ່ປະຊາຊົນ ເຫັນວ່າບໍ່ມີການຂາດເຄື່ອນ ແລະ ຖືກຕ້ອງຕາມເຕັກນິກທຸກຢ່າງ ອັນໄດ້ເຮັດໃຫ້ພະນັກງານ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນ ມີຄວາມເຊື່ອໝັ້ນ ແລະ ໝັ້ນໃຈຕໍ່ການໃຫ້ບໍລິການດັ່ງກ່າວເປັນຢ່າງດີ.

                                                                          ຂ່າວພາບ: ນາລີວັນ