ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຖວທ ເຊກອງ ສະຫຼຸບວຽກງານປະຈຳປີ

 

  ໃນລະຫວ່າງວັນທີ 30-31 ມີນາ 2017 ນີ້ ພະແນກຖະແຫຼງຂ່າວ,ວັດ ທະນະທຳ ແລະ ທ່ອງທ່ຽວ (ຖວທ) ແຂວງເຊກອງ ໄດ້ຈັດກອງປະຊຸມ ເພື່ອເປັນການສະຫຼຸບຕີລາຄາການເຄື່ອນໄຫວປະຕິບັດວຽກງານ (ຖວທ) ທົ່ວແຂວງປະຈຳປີ 2016 ແລະ ວາງແຜນການປະຈຳປີ 2017 ໂດຍການເປັນປະທານຂອງທ່ານ ບູ່ໄຊ ໄຊຍະເສນ ຫົວໜ້າພະແນກ ຖວທ ແຂວງ, ມີຮອງຫົວໜ້າພະແນກ, ຫ້ອງການ ຖວທ ເມືອງ 4 ເມືອງ ແລະ ພະນັກງານວິຊາການເຂົ້າຮ່ວມ.

  ໃນວາລະກອງປະຊຸມທ່ານ ບຸນທົງ ຖິ່ນດອນໂຂງ ຮອງຫົວໜ້າພະແນກ ຖວທ ແຂວງໄດ້ຂຶ້ນລາຍງານການ-ປະຕິບັດວຽກງານຂອງພະແນກໃນໄລຍະໜຶ່ງປີຜ່ານມາ ຍາມໃດກໍໄດ້ຖືເອົາວຽກງານສຶກສາອົບ ຮົມການເມືອງ-ນຳພາແນວຄິດໃຫ້ບັນດາສະມາຊິກພັກ, ພະນັກງານລັດຖະກອນຢ່າງຕໍ່ເນື່ອງ ຊຶ່ງເຮັດໃຫ້ພະນັກງານມີຄວາມໜັກແໜ້ນ, ເຂັ້ມແຂງ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກ, ສາມາດປະຕິບັດໜ້າທີ່ວຽກງານຂອງຕົນໄດ້ຢ່າງເຕັມສ່ວນ.

  ດ້ານວຽກງານວິຊາສະເພາະ ໄດ້ສຸມໃສ່ເຮັດໜ້າທີ່ເປັນກະບອກສຽງໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມຂອງລັດ. ໄປຄຽຄູ່ກັບການສ້າງບ້ານ-ຄອບຄົວວັດທະນະທຳ ໂດຍປັດຈຸບັນທົ່ວແຂວງມີບ້ານວັດທະນະທຳ 121 ບ້ານເທົ່າກັບ 60,5% ແລະ ຄອບຄົວວັດທະນະທຳ 11.049 ຄອບຄົວເທົ່າກັບ 70,5% ຂອງຄອບຄົວທັງໝົດທົ່ວແຂວງ. ສ່ວນວຽກງານທ່ອງທ່ຽວ ແມ່ນໄດ້ໄດ້ປັບປຸງຂອດບໍລິການທ່ອງທ່ຽວໃຫ້ມີຄຸນນະພາບເປັນ ຕົ້ນ: ໂຮງແຮມ, ເຮືອນພັກ, ຮ້ານອາຫານ ແລະ ສົ່ງເສີມການຈັດງານເທສະການ, ງານບຸນປະເພນີ, ກິດຈະກຳສົ່ງເສີມການທ່ອງທ່ຽວ, ສ້າງຂະບວນການທ່ອງທ່ຽວພາຍໃນໃຫ້ຟົດຟື້ນກວ້າງຂວາງ ແລະ ຕອບສະໜອງໄດ້ຄວາມຕ້ອງການຂອງນັກທ່ອງທ່ຽວ ໂດຍໃນປີ 2016 ສາມາດດຶງດູດນັກທ່ອງທ່ຽວໄດ້ 34.022 ຄົນ, ສາມາດສ້າງລາຍຮັບໄດ້ເກືອບ 7 ລ້ານໂດລາສະຫະລັດ.

  ສຳລັບທິດທາງແຜນການໃນປີ 2017 ທ່ານຮອງຫົວໜ້າພະແນກ ຖວທ ແຂວງເຊກອງ ລະບຸວ່າ: ສຸມໃສ່ພັດທະນາວຽກງານຖະແຫຼງຂ່າວ-ສື່ມວນຊົນໃຫ້ກ້າວເຂົ້າສູ່ຄຸນນະພາບໃໝ່ວ່ອງໄວ, ຊັດເຈນ ແລະ ທັນເຫດການສາມາດເຂົ້າເຖິງໄດ້ທຸກພື້ນທີ່ໃນທົ່ວແຂວງ, ມີຄວາມຫຼາກຫຼາຍຄົບຖ້ວນດ້ານເນື້ອໃນ, ກາຍເປັນແຫຼ່ງສະໜອງຂໍ້ມູນ-ຂ່າວສານ ແລະ ໃຫ້ສາລະຄວາມຮູ້ແກ່ປະຊາຊົນ; ສືບຕໍ່ອະນຸລັກ-ປົກປັກຮັກສາຟື້ນຟູ, ເສີມຂະຫຍາຍມູນເຊື້ອ ແລະ ຄຸນຄ່າວັດທະນະທຳອັນດີງາມຂອງຊາດ, ຂອງເຜົ່າໃຫ້ມີຄວາມຍືນຍົງ; ພັດທະນາການທ່ອງທ່ຽວໃຫ້ມີຄວາມຍືນຍົງຕາມທິດສົ່ງເສີມການທ່ອງທ່ຽວແບບທຳມະຊາດ, ປະຫວັດ ສາດ ແລະ ວັດທະນະທຳ ເຮັດໃຫ້ແຂວງເຊກອງກາຍເປັນຈຸດແວ່ພັກເຊົາຂອງນັກທ່ອງທ່ຽວ.
                                                                           ( ຂ່າວ : ສັນຍາ ແກ້ວໄຊຍະວົງ )