ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ກອງປະຊຸມເປີດກວ້າງ ຄະນະພັກຮາກຖານພະແນກສາທາລະນະສຸກແຂວງເຊກອງ

   

    ກອງປະຊຸມເປີດກ້ວາງຄົບຄະນະພັກຮາກຖານ ພະແນກສາທາລະນະສຸກ ແຂວງເຊກອງ ໄດ້ຈັດຂຶ້ນໃນວັນທີ 22 ມີນາ 2017 ນີ້ ທີ່ຫ້ອງປະຊຸມພະແນກດັ່ງກ່າວ ເປັນກຽດເຂົ້າຮ່ວມເປັນປະທານຂອງທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ, ຮອງເຈົ້າແຂວງ ຜູ້ຊີ້ນໍາຂົງເຂດວຽກງານວັດທະນະທໍາ-ສັງຄົມ ແລະ ທ່ານ ວິສັນ ອິນທະວົງ ເລຂາຄະນະພັກຮາກຖານ, ຫົວຫນ້າພະແນກສາທາລະນະສຸກແຂວງເຊກອງ, ມີຄະນະຫນ່ວຍພັກອ້ອມຂ້າງທີ່ຂຶ້ນກັບ ພ້ອມດ້ວຍສະມາຊິກພັກ ສົມບູນ-ສໍາຮອງ ພາຍໃນຫນ່ວຍເຂົ້າຮ່ວມ.

    ໃນກອງປະຊຸມໄດ້ສະຫລຸບລາຍງານ ການເຄື່ອນໄຫວວຽກງານພັກ ສົກປີຜ່ານມາ ແລະ ທິດທາງແຜນການປີ 2017 ຈາກທ່ານ ດຣ ຄໍາໄຫລ ສັນຕິພູມ ຮອງເລຂາຄະນະພັກຮາກຖານ, ຮອງຫົວຫນ້າພະແນກສາທາລະນະສຸກແຂວງເຊກອງ ເຊິ່ງໄດ້ຍົກໃຫ້ເຫັນວ່າ: ໄລຍະຜ່ານມາ ຄະນະພັກຮາກຖານ ໄດ້ຖືເອົາວຽກງານການສຶກສາອົບຮົມການເມືອງແນວຄິດ ເປັນກົກ ຖືເອົາການຕໍານິສົ່ງຂ່າວ ສ່ອງແສງລາຍງານ ເປັນບັນຫາສໍາຄັນ ຕິດພັນກັບການຊຸກຍູ້ ຕິດຕາມກວດກາ ຕີລາຄາປະເມີນຜົນ ຂອງສະມະຊິກພັກ ໃນການຈັດຕັ້ງປະຕິບັດ ບັນດາມະຕິກໍຄືຄໍາສັ່ງ ຂອງຂັ້ນເທິງ, ພ້ອມນັ້ນກໍ່ໄດ້ເອົາໃຈໃສ່ ຄົ້ນຄ້ວາ-ເຊື່ອມຊຶມ ເນື້ອໃນເອກະສານປະຫວັດສາດ, ມູນເຊື້ອຂອງການນໍາພັກ-ລັດ, ກົດລະບຽບຂອງພັກສະໄຫມທີ X, ເພື່ອເຮັດໃຫ້ສະມະຊິກພັກ, ພະນັກງານແພດຫມໍໃຫ້ຮັບຮູ້ເຂົ້າໃຈ ແນວທາງແຜນນະໂຍບາຍຂອງພັກ, ລະບຽບກົດຫມາຍຂອງລັດ, ໂດຍສະເພາະສຸມໃສ່ປະຕິບັດ 4 ບາດກ້າວບຸກທະລຸ ທີ່ຕິດພັນກັບວຽກງານ ສາທາລະນະສຸກ ທີ່ພັກວາງອອກ, ປະຕິບັດບັນດານະໂຍບາຍດ້ານສາທາລະນະສຸກ ຕາມ 8 ແຜນງານ 42 ແຜນງານຍ່ອຍ 97 ໂຄງການ ໂດຍຖືເອົາຕາມທິດນໍາທີ່ວ່າ “ຖືເອົາວຽກງານກັນພະຍາດສົ່ງເສີມສຸຂະພາບເປັນຕົ້ນຕໍ ແລະຖືກເອົາການປິ່ນປົວການສະໜອງການບໍລິການທີ່ມີຄຸນນະພາບໃຫ້ຖົ່ວເຖິງ” ສ້າງເປັນແຜນການແຜນງານ, ເປັນກິດຈະກໍາລະອຽດ ແລະໂຄງການຕ່າງໆ ສົມທົບແໜ້ນກັບນະໂຍບາຍ ແຜນລຶບລ້າງຄວາມທຸກຍາກ, ແຜນພັດທະນາຊົນນະບົດຂອງລັດ ກໍຄືເປົ້າໝາຍສະຫັດສະວັດ ຂອງການພັດທະນາ MDGs ຕິດພັນກັບວຽກງານ 3 ສ້າງ, ແນໃສ່ ເພື່ອບັນລຸເປົ້າໝາຍສະຫັດສະວັດຂອງການພັດທະນາ ຕາມທິດຍືນຍົງໃນປີ 2020 ແລະ ແຜນ 5 ປີຄັ້ງທີ VIII, ໄດ້ເອົາໃຈໃສ່ ປັບປຸງຍົກລະດັບໂຮງໝໍແຂວງ ຈາກ 45 ຕຽງ ເປັນ 75 ຕຽງ, ໄດ້ຍົກລະດັບການບໍລິການ ໂຮງໝໍເມືອງດາກຈຶງໃຫ້ສາມາດຜ່າຕັດໄດ້, ສ້າງ ແລະ ຂະຫຍາຍຕາໜ່າງບໍລິການ ຈາກສຸກສາລາ 24 ແຫ່ງມາເປັນ 28 ແຫ່ງ, ຊຸກຍູ້ຢ່າງແຂງແຮງ ວຽກງານໂຄສະນາສຸຂະສຶກສາ, ການຮັກສາສຸຂະພາບແມ່ ແລະ ເດັກ ຕິດພັນກັບການສ້າງຂະບວນການອະນາໄມ 3 ສະອາດຄື: ສ້າງບ້ານສາທາລະນະສຸກແບບຢ່າງໄດ້ 89 ບ້ານ, ບ້ານຊຸມຊົນເປັນເຈົ້າດ້ານສຸຂະອະນາໄມ 54 ບ້ານ ແລະ ສັກຢາ, ຢອດຢາກັນພະຍາດບັນລຸໄດ້ 95%, ໂຄສະນາຊຸກຍູ້ ການຫັນປ່ຽນພຶດຕິກໍາຂອງຊຸມຊົນ ໃນວຽກສຸຂາອະນາໄມ, ສ້າງບ້ານຊຸມຊົນເປັນເຈົ້າ ໃນການສ້າງວິດຖ່າຍໃສ່ວິດ, ໄດ້ປະກາດເມືອງທ່າແຕງ ເປັນເມືອງປອດຖ່າຍຊະຊາຍ, ໄດ້ແຈກຢາຍມຸ້ງຍ້ອມຢາຈໍານວນ 54,200 ດາງ ໃຫ້ປະຊາຊົນໃນ 4 ຕົວເມືອງ ທັງຊຸກຍູ້ໃຫ້ປະຊາຊົນ ນອນໃນມຸ້ງຍ້ອມຢາ ເພື່ອປ້ອງກັນບໍ່ໃຫ້ເປັນໄຂ້ຍຸງ ແລະ ຊຸກຍູ້ໃຫ້ປະຊາຊົນປະຕິບັດເນືອໃນ 5 ປໍຢ່າງຕັ້ງໜ້າ.
    ທິດທາງແຜນການໃນຕໍ່ໜ້າ ຈະໄດ້ສືບຕໍ່ຢຶດໝັ້ນການປະຕິບັດ ນະໂຍບາຍ ດ້ານວຽກງານສາທາລະນະສຸກທັງປວງຊົນ ຕາມທິດຖືເອົາການອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ຖືເອົາການປິ່ນປົວ ແລະ ສະໜອງບໍລິການສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທໍາ ແລະສະເໝີພາບເປັນສໍາຄັນ, ປະຕິຮູບສາທາລະນະສຸກຢ່າງຮອບດ້ານ, ສ້າງລະບົບບໍລິການສຸຂະພາບທີ່ດີ ຖືເອົາຄົນເຈັບເປັນໃຈກາງ ໂດຍບໍລິການທີ່ມີຄຸນນະພາບ, ມີຈັນຍາບັນ, ຈັນຍາທໍາ, ເອົາໃຈໃສ່ດູແລທັງຮ່າງກາຍ ແລະ ຈິດໃຈ ແລະ ສິ່ງແວດລ້ອມ; ສ້າງລະບົບການປົກປ້ອງສັງຄົມດ້ານສຸຂະພາບທີ່ທົ່ວເຖິງ ເພື່ອໃຫ້ສັງຄົມເຂັ້ມແຂງສາມາດຊ່ວຍເຫຼືອເຊິ່ງກັນ ແລະກັນດ້ວຍຫຼັກປະກັນສຸຂະພາບທົ່ວປວງຊົນ ປົກປ້ອງທຸກຄົນທັງດ້ານກັນພະຍາດ, ສົ່ງເສີມສຸຂະພາບ ແລະການປິ່ນປົວແນໃສ່ເຮັດໃຫ້ປະຊາຊົນບັນດາເຜົ່າ ມີສຸຂະພາບດີ, ເນັ້ນໃສ່ສ້າງຮາກຖານທີ່ເຂັ້ມແຂງ ຈາກແບບແຜນການດໍາລົງຊີວິ ດປາສະຈາກປັດໄຈສ່ຽງຕໍ່ສຸຂະພາບ ແລະ ປູກຈິດສໍານຶກຄວາມເປັນເຈົ້າການ ໃນການຮັກສາສຸຂະພາບຂອງຕົນເອງ, ຄອບຄົວ ແລະຊຸມຊົນ ໂດຍຫັນວຽກງານສາທາລະນະສຸກ ໃຫ້ເປັນຂອງປວງຊົນ. ນອກນີ້ຍັງໄດ້ເອົາໃຈໃສ່ ໃນການກໍານົດສ້າງພະນັກງານ ສາຍວິຊາການແຕ່ລະດ້ານ, ພະນັກງານສືບທອດນໍາພາໃນອະນາຄົດ ເປັນຕົ້ນສຸມໃສ່ສ້າງພະນັກງານ ໃຫ້ມີລະດັບທາງດ້ານທິດສະດີການເມືອງ-ແນວຄິດ, ມີຄວາມຮູ້ຄວາມສາມາດ ດ້ານການບໍລິຫານຄຸ້ມຄອງ, ມີຄວາມຮູ້ດ້ານວິຊາສະເພາະ, ວິທະຍາສາດເຕັກໂນໂລຊີທີ່ທັນສະໄຫມຕື່ມອີກ.
    ພະແນກສາທາລະນະສຸກແຂວງເຊກອງ ເປັນຫນ່ວຍພັກຮາກຖານ ທີ່ຂຶ້ນກັບຄະນະພັກຂັ້ນແຂວງປະກອບມີ 3 ຫນ່ວຍພັກຂຶ້ນກັບ ມີສະມາຊິກພັກທັງຫມົດ 88 ສະຫາຍ, ຍິງ 35 ສະຫາຍ, ສະມາຊິກພັກສົມບູນ 71 ສະຫາຍ, ສໍາຮອງ 17 ສະຫາຍ. ສະມາຊິກພັກສົມບູນໄດ້ຮັບບັດແດງ 63 ສະຫາຍ, ຍິງ 33 ສະຫາຍ. ຜ່ານມາໄດ້ ຈັດສົ່ງພະນັກງານຫລັກແຫລ່ງ ໄປຍົກລະດັບ ທິດສະດີການເມືອງ-ການປົກຄອງຊັ້ນກາງ-ສູງ 2 ສະຫາຍ, ຍົກລະດັບວິຊາສະເພາະລະດັບຊ່ຽວຊານ 3 ສະຫາຍ, ລະດັບປະລິນຍາຕີ 1 ສະຫາຍ, ຊັ້ນສູງ 5 ສະຫາຍ, ໄລຍະສັ້ນ 3-6 ເດືອນ 17 ສະຫາຍ, ໄລຍະ 6 ເດືອນ ຫາ 1 ປີ 3 ສະຫາຍ.

                                                                                      ຂ່າວ-ພາບ: ນາລີວັນ