ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ການນໍາພັກ-ລັດ ແຂວງເຊກອງ ວາງກະຕ່າດອກໄມ້ ທີ່ອະນຸສອນ ປະທານ ໄກສອນ ພົມວິຫານ

    ໃນຕອນເຊົ້າວັນທີ 22 ມີນາ 2017 ບັນດາຜູ້ນຳພັກ-ລັດແຂວງເຊກອງ ນຳໂດຍສະຫາຍ ຖາວອນ ພົມມະໄລລຸນ ຄະນະປະຈຳພັກແຂວງ, ຮອງເຈົ້າແຂວງເຊກອງ, ສະຫາຍ ສີດາ ສຸວັນນະສາຍ ຮອງເລຂາພັກແຂວງ, ຮອງເຈົ້າແຂວງເຊກອງ, ມີບັນດາສະຫາຍຄະນະປະຈຳພັກແຂວງ, ກຳມະການພັກແຂວງ, ຫົວໜ້າ-ຮອງພະແນກ, ຫ້ອງການ, ອົງການທຽບເທົ່າ ແລະ ບໍລິສັດລັດວິສາຫະກິດ ໄດ້ນຳເອົາກະຕ່າດອກໄມ້ມາວາງຢູ່ຕໍ່ໜ້າຮູບປັ້ນປະທານ ໄກສອນ ພົມວິຫານ ໃນໂອກາດວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 62 ປີ.
    ການວາງກະຕ່າດອກໄມ້ໃນຄັ້ງນີ້, ເພື່ອເປັນການສະແດງຄວາມຄຳນັບ, ຄວາມເຄົາລົບຮັກ ແລະ ສັນລະເສີນເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິຕົນຕະຫຼອດຊີວິດ ເພື່ອປະເທດຊາດ ເພື່ອປະຊາຊົນ, ນຳພາປະຊາຊົນລາວບັນດາເຜົ່າ ລຸກຮື້ຂຶ້ນຕໍ່ສູ້ຕ້ານພວກລ່າເມືອງຂຶ້ນທັງເກົ່າ ແລະ ໃໝ່ ອັນໄດ້ເຮັດໃຫ້ຂະບວນການຕໍ່ສູ້ດັ່ງກ່າວ ໄດ້ຮັບໄຊຊະນະຢ່າງສົມບູນໃນວັນທີ 2 ທັນວາ 1975 ແລະ ສືບຕໍ່ນຳພາປະຊາຊົນລາວທຸກຖ້ວນໜ້າ ພ້ອມກັນສ້າງສາພັດທະນາປະເທດຊາດໃຫ້ມັ່ງຄັ່ງ, ເຂັ້ມແຂງ, ປະຊາຊົນມີຄວາມຜາສຸກ ສັງຄົມມີຄວາມສີວິໄລ ແລະ ຍຸຕິທຳ.
   ໃນໂອກາດດຽວກັນນີ້ ທ່ານຮອງເຈົ້າແຂວງໆເຊກອງ ກໍໄດ້ນຳເອົາພວງມາລາມາວາງຢູ່ຕໍ່ໜ້າອະນຸສາວະລີນັກຮົບນິລະນາມຂອງແຂວງ ເພື່ອສະແດງເຖິງຄວາມຮັກແພງ ແລະ ກະຕັນຍູຮູ້ບຸນຄຸນຕໍ່ ພະນັກງານ, ນັກຮົບ ແລະ ສະມາຊິກພັກທີ່ໄດ້ເສຍສະຫຼະຊີວິດໃນພາລະກິດປະຕິວັດຊາດ, ປະຊາທິປະໄຕໃນເມື່ອກ່ອນ.

                                                                                ( ຂ່າວພາບ : ສັນຍາ ແກ້ວໄຊຍະວົງ )