ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເມືອງທ່າແຕງ: ເປີດຊອງປະມູນໂຄງການກໍ່ສ້າງສະໜາມຂີ້ເຫຍື້ອ

   ໃນຕອນບ່າຍຂອງວັນທີ 22 ກຸມພາ 2017ຜ່ານມາ ຢູ່ທີ່ຫ້ອງປະຊຸມ ຫ້ອງຫານແຜນການ ແລະ ການລົງທືນເມືອງທ່າແຕງ ໄດ້ຈັດກອງປະຊຸມ ເປີດຊອງປະມູນ ໂຄງການກໍ່ສ້າງສະໜາມຂີ້ເຫຍື້ອ. ໂດຍການເປັນກຽດເຂົ້າຮ່ວມຂອງ ທ່ານ ຄໍາໄພ ສິມມາວັດ ຮອງເລຂາພັກເມືອງທ່າແຕງ, ມີຄະນະກໍາມະການປະມູນ ຈັດຊື້-ຈັດຈ້າງ ແລະ ພາກສ່ວນກ່ຽວຂ້ອງ ພ້ອມດ້ວຍບໍລິສັດເຂົ້າຮ່ວມ.
   ທ່ານ ສີຫາ ບຸດດາວົງ ຮອງຫົວໜ້າ ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ເມືອງ ທ່າແຕງ ກໍ່ໄດ້ຂື້ນຜ່ານຂໍ້ຕົກລົງ ຂອງທ່ານເຈົ້າເມືອງ,ສະບັບເລກທີ 153/ຈມ,ລົງວັນທີ 16 ກຸມພາ 2017 ວ່າດ້ວຍແຕ່ງຕັ້ງຄະນະກໍາມະການ ປະມູນຈັດຊື້-ຈັດຈ້າງໂຄງການກໍ່ສ້າງ ສະໜາມຖິ້ມຂີ້ເຫຍື້ອເມືອງ ທ່າແຕງ ໂດຍຖືກຕ້ອງຕາມກົດໝາຍ ວ່າດ້ວຍການລົງທືນຂອງລັດ( ສະບັບປັບປຸງ ) ເລກທີ 72/ສພຊ,ລົງວັນທີ 15 ທັນວາ 2015, ເຊິ່ງລວມມີຄະນະກໍາມະການທັງໝົດ 8 ສະຫາຍ,ກອງເລຂາຊ່ວຍວຽກມີ 3 ສະຫາຍ,ຂະນະດຽວກັນ ທ່ານ ແສງສຸບັນ ໄຊສະຫວັນ ຫົວໜ້າຫ້ອງການ ແຜນການແລະການລົງທືນ ເມືອງທ່າແຕງ ຄະນະກໍາມະການປະມູນ ຈັດຊື້-ຈັດຈ້າງ ກ່າວວ່າ: ການປະມູນ ແຂ່ງຂັນລາຄາ ແລະ ການຕັດສິນເອົາຜູ້ຊະນະການປະມູນຄັ້ງນີ້ ເພື່ອໃຫ້ຖືກຕ້ອງຕາມລະບຽບຫຼັກການ, ຮັບປະກັນຄວາມຖືກຕ້ອງ, ຊັດເຈນ, ມີຄວາມໂປ່ງໃສ່ ແລະ ມີຄວາມເປັນເອກະພາບ ເພື່ອຕັດສິນເອົາຜູ້ຊະນະການປະມູນ ທີ່ມີມາດຖານຄົບຖ້ວນ ແລະ ລາຄາທີ່ສົມເຫດສົມຜົນ ກັບລາຄາທີ່ປະເມີນ ແລະ ຄາດຄະເນໄວ້ໃນເບື້ອງຕົ້ນ, ການເປີດຊອງປະມູນ ໂຄງການກໍ່ສ້າງສະໜາມຖິ້ມຂີ້ເຫຍື້ອ ໂດຍມີ 3 ບໍລິສັດເຂົ້າຮ່ວມຄື: ບໍລິສັດ ສອນ ກໍ່ສ້າງ ແລະ ສ້ອມແປງຂົວທາງ, ບໍລິສັດ ພອນປະເສີດ ກໍ່ສ້າງຂົວທາງ, ບໍລິສັດ ອຸດົມສັກ ກໍ່ສ້າງຂົວທາງ, ຊຶ່ງກອງປະຊຸມໄດ້ເປັນເອກະພາບ ຮັບຮອງເອົາ ບໍລິສັດ ສອນກໍ່ສ້າງ ແລະ ສ້ອມແປງຂົວທາງ ຈໍາກັດ ເປັນຜູ້ຊະນະການປະມູນລາຄາ ທີ່ມີມູນຄ່າ 3 ຕື້ 8 ຮ້ອຍກວ່າລ້ານກີບ, ເຊີ່ງທັງນີ້ເພື່ອເປັນການຮັກສະພາບແວດລ້ອມ ເປັນຕົົ້ນແມ່ນ ບໍ່ໃຫ້ມີການຈູດ ຫຼື ຖີ້ມຂີ່ເຫຍື່ອຊະຊາຍ ຕ້ອງໄດ້ຖີ້ມໃນສະໜາມຂີ່ເຫຍືອບ່ອນດຽວ ເພື່ອເປັນການຮັກສາອະນາໄມ ສາມສະອາດ.
   ໂອກາດນີ້ ທ່ານ ຄໍາໄພ ສິມມາວັດ ຮອງເລຂາພັກເມືອງທ່າແຕງ ໄດ້ມີຄຳເຫັນຕໍ່ກອງປະຊຸມ ທີ່ມີຄວາມສຳຄັນ ໃນການຈັດຕັ້ງປະຕິບັດ ເປີດຊອງປະມູນດ້ານລາຄາ ແລະ ການຕີລາຄາການປະມູນແຂ່ງຂັນ ລາຄາ ແລະ ການຕັດສິນເອົາຜູ້ຊະນະ ການປະມູນໃນຄັ້ງນີ້ ໃຫ້ຖືກຕ້ອງຕາມລະບຽບ ຫຼັກການ, ຮັບປະກັນຄວາມຖືກຕ້ອງ, ຊັດເຈນ, ມີຄວາມໂປ່ງໃສ ແລະ ມີຄວາມເປັນເອກະພາບ.ຊຶ່ງເມື່ອກ່ອນເມືອງ ທ່າແຕງ ບໍ່ມີສະໜາມຂີ້ເຫຍື້ອແບບຖາວອນ ໃນໄລຍະຜ່ານມາການເກັບມ້ຽນຂີ້ເຫຍື້ອ ຍັງຖິ້ມແບບຊະຊາຍ ມີຄວາມຈຳເປັນຮັບຮອງເອົາໂຄງການກໍ່ສ້າງສະໜາມຂີ້ເຫື້ຍອ. ເພື່ອເຮັດໃຫ້ເມືອງ ທ່າແຕງ ໄດ້ຫຼຸດພົ້ນຈາກຜົນກະທົບ ທາງສິ່ງແວດລ້ອມ-ສັງຄົມ ແລະ ທໍາມະຊາດໃຫ້ນັບມື້ນັບດີຂື້ນ.ພ້ອມນີ້ ທ່ານໄດ້ເນັ້ນໃຫ້ຄະນະກໍາມະການ ປະມູນຈັດຊື້-ຈັດຈ້າງ ທຸກສະຫາຍເປັນເຈົ້າການ ປະສານສົມທົບກັບຂະແໜ່ງການກ່ຽວຂ້ອງ ຢ່າງໜັກແໜ້ນ, ກວດກາ, ຕິດຕາມ, ວາງແຜນພ້ອມສ່ອງແສງລາຍງານ ໃຫ້ຂັ້ນເທິງເປັນປົກກະຕິຕໍ່ເນື່ອງ.
                                                          ຂ່າວ-ພາບ: ພອນ ບຸນອຸທິດ ເມືອງ ທ່າແຕງ ແຂວງ ເຊກອງ