ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ ຍົກລະດັບສີມືແຮງງານໃຫ້ແກ່ຊາວຊ່າງຫັດຖະກໍາຕໍ່າແຜ່ນ

    ຕອນເຊົ້າວັນທີ 28 ກຸມພາ 2017 ນີ ຢູ່ທີ່ພະແນກອຸດສາຫະກໍາ ແລະ ການຄ້າແຂວງເຊກອງ ໄດ້ສືບຕໍ່ຝຶກອົບຮົມສີມືແຮງງານ ໃຫ້ແກ່ຊາວຊ່າງຫັດຖະກໍາຕໍ່າແຜ່ນ ໂດຍມີຜູ້ເຂົ້າຮ່ວມ ຈາກຊາວຊ່າງຫັດຖະກໍາ 4 ຕົວເມືອງ ຄື: ເມືອງລະມາມ, ທ່າແຕງ, ກະລຶມ ແລະ ດາກຈຶງ ທັງໝົດ 10 ກວ່າຄົນ.
    ທ່ານ ນາງ ຈັນຖະໜອມ ສຸຂະເສີມ ຮອງຫົວໜ້າພະແນກຫັດຖະກໍາ ກົມອຸດສະຫະກໍາ ແລະ ຫັດຖະກໍາ ກ່າວວ່າ: ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອເປັນການຍົກລະດັບສີມືແຮງງານ ໃຫ້ແກ່ຊາວຊ່າງຫັດຖະກໍາຢູ່ພາຍໃນແຂວງເຊກອງ ໂດຍການນໍາໃຊ້ເຕັກນິກວິທະຍາສາດ ໃນການຍ້ອມເສັ້ນໄໝ ແລະ ເສັ້ນຝ້າຍ ໃຫ້ມີຄຸນນະພາບຕາມຄວາມຕ້ອງການ ຂອງຜູ້ບໍລິໂພກ ແລະ ຕອບສະໜອງ ຕະຫຼາດພາຍໃນ ແລະ ຕ່າງປະເທດ. ນອກນີ້, ກໍ່ເພື່ອເປັນການຊ່ວຍສ້າງ ວຽກເຮັດງານທໍາ, ສ້າງອາຊີບໃຫ້ປະຊາຊົນ ກໍຄື ຊາວຊ່າງຫັດຖະກໍາ ທັງຍັງເປັນການພັດທະນາຜະລິດຕະພັນ ສິ້ນໄໝ, ສິ້ນຝ້າຍ ຂອງຊາວຊ່າງຫັດຖະກໍາ ແຂວງເຊກອງ ໃຫ້ມີຜະລິດຕະພັນເຫຼົ່ານັ້ນດີຂື້ນກວ່າ ແຕ່ກ່ອນ, ໂດຍຕິດພັນກັບວັດທະນະທໍາ ທີ່ເປັນເອກະລັກອັນດັ້ງເດີມຂອງເຜົ່າ ເຊິ່ງຄາດວ່າ ການຝຶກອົບຮົມຄັ້ງນີ້ ຈະສາມາດເຮັດໃຫ້ຊາວຊ່າງຫັດຖະກໍາ ນໍາເອົາຄວາມຮູ້-ຄວາມສາມາດອັນໃໝ່ໆ ໄປນໍາໃຊ້ໄດ້ເລີຍ ພ້ອມທັງສາມາດເຜີຍແຜ່, ອົບຮົມໃຫ້ຄົນອື່ນໆ ຕໍ່ໄປໄດ້.
    ທ່ານ ນາງ ຈັນຖະໜອມ ກ່າວຕື່ມອີກວ່າ: ການຝຶກອົບຮົມໃຫ້ແກ່ຊາວຊ່າງຫັດຖະກໍາ ຢູ່ແຂວງເຊກອງຄັ້ງນີ້ແມ່ນເປັນຄັ້ງທໍາອິດ ເຊິ່ງດໍາເນີນມາແຕ່ວັນທີ 27 ກຸມພາ ຜ່ານມາ ແລະ ຈະດໍາເນີນຈົນຮອດວັນທີ 3 ມີນາ 2017 ນີ້ ຈຶ່ງຈະສໍາເລັດ, ສໍາລັບບົດຮຽນທີ່ນໍາມາສິດສອນຫຼັກໆ ແມ່ນ ວິທີການ, ຂັ້ນຕອນການຍ້ອມສີ ທໍາມະຊາດ ແລະ ເຕັກນິກວິທີການຕໍ່າແຜ່ນແພ, ໂດຍອາຈານທີ່ມີຄວາມຮູ້, ຄວາມຊໍານານ ດ້ານການຍ້ອມສີທໍາມະຊາດ ແລະ ການຕໍ່າແຜ່ນ ຈາກກົມອຸດສາຫະກໍາ ແລະ ຫັດຖະກໍາ ກະຊວງອຸດສະຫະກໍາ ແລະ ການຄ້າ ແລະ ສູນຫັດຖະກໍາຫ້ວຍຫົງ ນະຄອນຫຼວງວຽງຈັນ
                                                                                    ຂ່າວ-ພາບ: ນາລີວັນ