ວັນອັງຄານ, 22 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ຮອງລັດຖະມົນຕີ ກະຊວງ ຖວທ ຢ້ຽມຢາມ ແລະ ເຮັດວຽກຢູ່ແຂວງເຊກອງ

  

   ວັນທີ 24 ກຸມພາ ນີ້, ທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ດ້ອມຄ້ວຍຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ, ໂດຍມີຄະນະພັກ-ຄະນະພະແນກ ຖວທ ແຂວງ, ຄະນະຫ້ອງການ ຖວທ ເມືອງ ພ້ອມດ້ວຍພະນັກງານ-ລັດຖະກອນ ພາຍໃນພະແນກ ດັ່ງກ່າວ ໃຫ້ການຕ້ອນຮັບຢ່າງອົບອຸ່ນ.

   ທ່ານ ບູ່ໄຊ ໄຊຍະເສນ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຖວທ ແຂວງເຊກອງ ໄດ້ລາຍງານສະພາບລວມ ການຈັດຕັ້ງປະຕິບັດວຽກງານ ຖວທ ຢູ່ແຂວງເຊກອງ ໄລຍະ 1 ປີຜ່ານມາ, ເຊິ່ງໄດ້ຍົກໃຫ້ເຫັນດ້ານດີ ແລະ ຜົນສໍາເລັດ; ດ້ານອ່ອນ-ຂໍ້ຄົງຄ້າງ ແລະ ຂໍ້ສະເໜີຈໍານວນໜື່ງເພື່ອໃຫ້ຂັ້ນເທິງຊ່ວຍປັບປຸງແກ້ໄຂວຽກງານງານທີ່ຄ້າງຄາ ເພື່ອເຮັດໃຫ້ວຽກງານ ຖວທ ຢູ່ແຂວງເຊກອງໄດ້ຮັບການພັດທະນາດີຂື້ນກວ່າເກົ່າ, ຈາກນັ້ນ ທ່ານ ຮອງລັດຖະມົນຕີກະຊວງ ຖວທ ທ່ານ ສະຫວັນຄອນ ຣາຊະມົນຕີ ໄດ້ໂອ້ລົມ ໂດຍໄດ້ແຈ້ງສະພາບລວມ ການພັດທະນາວຽກງານ ຖວທ ຢູ່ໃນຂອບເຂດທົ່ວປະເທດ ໄລຍະຜ່ານມາ ເຊິ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນ ແລະ ຜົນສໍາເລັດໃນຫຼາຍດ້ານ ພ້ອມນັ້ນ ກໍ່ໄດ້ຍົກໃຫ້ເຫັນຂໍ້ຫຍຸ້ງຍາກ-ສິ່ງທ້າຍທາຍຕໍ່ການພັດທະນາ ວຽກງານ ຖວທ ລວມທັງແຈ້ງທິດທາງແຜນພັດທະນາວຽກງານ ທີ່ເປັນບູລິມະສິດ ຈະຕ້ອງໄດ້ສຸມໃສ່ຈັດຕັ້ງປະຕິບັດໃນຊຸມປີຕໍ່ໜ້າ, ຂະນະດຽວກັນນີ້ ບັນດາຫົວໜ້າກົມ-ຮອງກົມກໍ່ໄດ້ມີຄໍາເຫັນແລກປ່ຽນ ແລະ ຊີ້ນໍາວຽກງານຈໍານວນໜື່ງທີ່ກ່ຽວຂ້ອງກັບບັນດາຂະແໜງການ ເພື່ອສ້າງຄວາມເຂົ້າໃຈ ແລະ ມີຄວາມເປັນເອກະພາບໃນການຈັດຕັ້ງປະຕິບັດ ໜ້າທີ່ວຽກງານ ໃຫ້ໄປໃນທິດທາງດຽວກັນ ທັງເພື່ອຮັບປະກັນໃຫ້ວຽກງານມີຜົນສໍາເລັດ ແລະ ມີປະສິດທິຜົນສູງ.

   ໂອກາດດັ່ງກ່າວ, ທ່ານ ບູ່ໄຊ ໄຊຍະເສນ ຕາງໜ້າໃຫ້ແກ່ຄະນະພັກ, ຄະນະພະແນກ ແລະ ພະນັກງານວິຊາການທັງໝົດທົ່ວພະແນກ ຖວທ ແຂວງເຊກອງ ກໍ່ໄດ້ສະແດງຄວາມຂອບໃຈ ຕໍ່ທ່ານ ຮອງລັດຖະມົນຕີ ກະຊວງ ຖວທ ພ້ອມດ້ວຍຄະນະ ທີ່ໄດ້ລົງມາຢ້ຽມຢາມ ແລະ ເຮັດວຽກຢູ່ແຂວງເຊກອງໃນຄັ້ງນີ້ ແລະ ໄດ້ມອບຂອງຂັວນ ໃຫ້ແກ່ຄະນະດັ່ງກ່າວ ໂດຍແມ່ນ ທ່ານ ສະຫວັນຄອນ ຣາຊະມົນຕີ ເປັນຜູ້ກ່າວຮັບ.

                                                                                 ຂ່າວ-ພາບ: ສົມບູນ