ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ລະມາມ ຍົກລະດັບຄວາມຮູ້ວຽກງານຕ້ານການຄ້າມະນຸດຢູ່

 

   ໃນລະຫວ່າງວັນທີ 20-21 ກຸມພາ 2017 ນີ້; ກົມກົດໝາຍ ກະຊວງຍຸຕິທຳ ໄດ້ຝຶກອົບຮົມກ່ຽວກັບວຽກງານ ສ້າງຄວາມເຂັ້ມແຂງໃຫ້ແກ່ລະບົບຍຸຕິທຳທາງອາຍາ ເພື່ອສະກັດກັ້ນ ແລະ ຕ້ານການຄ້າມະນຸດ ໃຫ້ແກ່ພະນັກງານການນໍາ; ພະນັກຫຼັກແຫຼ່ງ ເມືອງລະມາມ ຂຶ້ນທີ່ສະໂມສອນຂອງເມືອງດັ່ງກ່າວ ໂດຍມີຂອງທ່ານ ປອ ແພງສີ ສີລາວີ ກໍາມະການພັກແຂວງ ເລຂາພັກເມືອງ ເຈົ້າເມືອງລະມາມ, ທ່ານ ສົມບູນ ວົງພະຈັນ ຮອງຫົວໜ້າກົມກົດໝາຍ ກະຊວງຍຸຕິທໍາ, ມີບັນດາຫົວໜ້າ, ຮອງຫົວຫ້ອງການ ແລະ ນັກສຳມະນາກອນ ຈາກບັນດາຫ້ອງການອ້ອມຂ້າງເມືອງ ເຂົ້າຮ່ວມ.
   ໃນຊຸດຝຶກອົບຮົມເທື່ອນີ້; ບັນດານັກສໍາມະນາກອນໄດ້ຮຽນຮູ້ ແລະ ສຶກສາຂໍ້ມູນ ກ່ຽວກັບການເຄື່ອນໄຫວວຽກງານຕ້ານ ການຄ້າມະນຸດຢູ່ລາວ ເຊິ່ງມີ 4 ຫົວຂໍ້ໃຫຍ່ຄື: ສົນທິສັນຍາ ທີໂອຊີ (TOC) ແລະ ອານຸສັນຍາກ່ຽວກັບການຄ້າບຸກຄົນ; ນິຕິກຳລາວວ່າດ້ວຍການຄ້າມະນຸດ (ນະໂຍບາຍແຫ່ງຊາດ ວ່າດ້ວຍການຕ້ານການຄ້າມະນຸດ); ຄວາມສໍາຄັນຂອງການລະບຸຕົວບຸກຄົນ ທີ່ຖືກເຄາະຮ້າຍຈາກການຄ້າມະນຸດ ແລະ ການຮ່ວມມືລະຫວ່າງຊາດ ເພື່ອປ້ອງກັນການຄ້າມະນຸດ. ໂດຍນັກສຳມະນາກອນ ຈະໄດ້ພ້ອມກັນ ສັງເກດ, ຕີລາຄາ ດ້ານດີ-ດ້ານອ່ອນ ພ້ອມທັງຄົ້ນຄວ້າປຶກສາຫາລື ແລກປ່ຽນຄຳຄິດເຫັນ ເພື່ອສ້າງຄວາມເປັນເອກະພາບ ທາງດ້ານທິດສະດີ, ເນື້ອໃນ ແລະ ມາດຕະການຕ່າງໆ ໃນການເຄື່ອນໄຫວວຽກງານຕ້ານ ແລະ ສະກັດກັ້ນການຄ້າມະນຸດໃຫ້ມີຄວາມໜັກແໜ້ນເຂັ້ມແຂງສາມາດບັນລຸເປົ້າໝາຍໄດ້ເປັນຢ່າງສູງ.
   ໃນໂອກາດນີ້; ທ່ານ ປອ ແພງສີ ສີລາວີ ກຳມະການພັກແຂວງ ເລຂາພັກເມືອງ ເຈົ້າເມືອງລະມາມ ໄດ້ໂອ້ລົມ ແລະ ໄດ້ຮຽກຮ້ອງໃຫ້ບັນດານັກສຳມະນາກອນ ທີ່ເຂົ້າຮ່ວມຝຶກອົບຮົມໃນຊຸດນີ້ ຈົ່ງໄດ້ພ້ອມກັນສຸ່ມໃສ່ຄົ້ນຄວ້າ, ປະກອບຄຳເຫັນ, ຊອກໃຫ້ເຫັນດ້ານອັນດີ-ດ້ານອ່ອນ, ຜົນກະທົບ ແລະ ມີວິທີແກ້ໄຂທີ່ເໝາະສົມ, ທັງນີ້ກໍ່ເພື່ອເຮັດໃຫ້ວຽກງານຕ້ານ ແລະ ສະກັດກັ້ນການຄ້າມະມຸດຢູ່ ສປປ ລາວ ກໍ່ຄືຢູ່ເມືອງລະມາມມີຄວາມເຂັ້ມແຂງ ແລະ ໜັກແໜ້ນ.
                                                                     ຂ່າວ : ດາວສະຫວັນ ໄຊລາສອນ