ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ກະລຶມສືບຕໍ່ປັບປຸງກົງຈັກການຈັດຕັ້ງບາງຂະແໜງການຂອງລັດ

   ເພື່ອເຮັດໃຫ້ການມອບໂອນ ບາງວຽກງານໃນກົງຈັກລັດໃຫ້ສຳເລັດ ຕາມແຜນການ ວາງໄວ້ ໃນຕົ້ນເດືອນ ກຸມພາ 2017 ນີ້ ເມືອງກະລຶມ ແຂວງເຊກອງ ໄດ້ສືບຕໍ່ມອບ-ໂອນບາງວຽກງານ ພ້ອມທັງສັບຊ້ອນພະນັກງານຫຼາຍສິບຄົນໄປຈັດຕັ້ງປະຕິບັດໜ້າທີ່ຕາມວິຊາສະເພາະ ແລະ ຄວາມເໝາະສົມ, ຊຶ່ງໄດ້ຈັດຂຶ້ນຢູ່ທີ່ສະໂມສອນຂອງເມືອງ ໂດຍມີ ທ່ານ ບຸນໄຫຼ ບຸດຕະວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງກະລຶມ ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.
  ທ່ານ ສອນເພັດ ສອນສຸພັນ ກຳມະການພັກເມືອງ ຫົວໜ້າຫ້ອງການພາຍໃນເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງກະລຶມ ສະບັບເລກທີ 302 ແລະ 303/ຈມ, ລົງວັນທີ 6 ກຸມພາ 2017 ວ່າດ້ວຍ ການມອບໂອນຫ້ອງການສົ່ງເສີມຄວາມກ້າວໜ້າຂອງແມ່ຍິງ ແລະ ເດັກນ້ອຍ ພ້ອມດ້ວຍພະນັກງານຈຳນວນ 5 ສະຫາຍ, ຍິງ 3 ສະຫາຍ ໄປຂື້ນກັບ ແລະ ປະຈຳການຢູ່ຫ້ອງການສະຫະພັນແມ່ຍິງເມືອງ, ມອບໂອນອົງການກາແດງເມືອງ ພ້ອມດ້ວຍພະນັກງານຈຳນວນ 5 ສະຫາຍ, ຍິງ 1 ສະຫາຍ ໄປຂື້ນກັບຫ້ອງການແຮງງານ ແລະ ສະຫວັດດີການສັງຄົມ ເຊິ່ງໄດ້ມີການສະຫຼຸບລາຍງານ ວຽກງານ ແລະມອບ-ຮັບໜ້າທີ່ ຢ່າງເປັນທາງການ.
  ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ບຸນໄຫຼ ບຸດຕະວົງ ເຈົ້າເມືອງກະລຶມ ເຊິ່ງກ່ອນອື່ນທ່ານ ກໍໄດ້ຍ້ອງຍໍຊົມເຊີຍຜົນງານທີ່ຍາດມາໄດ້ໄລຍະຜ່ານມາ ພ້ອມທັງເນັ້ນໃຫ້ສືບຕໍ່ຈັດຕັ້ງປະຕິບັດວຽກງານ ຕາມພາລະບົດບາດຂອງຕົນໃຫ້ມີຜົນສໍາເລັດ, ມີຄວາມສາມັກຄີເປັນເອກະພາບ ເຄົາລົບນັບຖືການຈັດຕັ້ງ, ປະຕິບັດລະບຽບກົດໝາຍຂອງພັກ-ລັດ ວາງອອກຢ່າງເຂັ້ມງວດ.
                                                                 ຂ່າວ: ທ ອັດສະວິນ ແສງສີຈັນ ນັກຂ່າວ ເມືອງກະລຶມ ແຂວງເຊກອງ