ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານຮອງນາຍົກລັດຖະມົນຕີ ສືບຕໍ່ເຄື່ອນໄຫວຢ້ຽມຢາມແຂວງເຊກອງ

ທ່ານຮອງນາຍົກລັດຖະມົນຕີ ສືບຕໍ່ເຄື່ອນໄຫວຢ້ຽມຢາມແຂວງເຊກອງ.

   ພາຍຫຼັງສຳເລັດການເຄື່ອນໄຫວຢ້ຽມຢາມແຂວງສາລະວັນ ຄະນະຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ໄດ້ສືບຕໍ່ເຄື່ອນໄຫວຢ້ຽມຢາມ ແລະ ພົບປະພະນັກງານຫຼັກແຫຼ່ງ ແຂວງເຊກອງ ໃນລະຫວ່າງວັນທີ 07-08 ກຸມພາ 2017 ໂດຍມີ ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ພ້ອມດ້ວຍຄະນະນຳ ແລະ ພະນັກງານຫຼັກແຫຼ່ງຂອງແຂວງ ໃຫ້ການຕ້ອນຮັບ.

   ພາຍຫຼັງຮັບຟັງການລາຍງານ ສະພາບການພັດທະນາເສດຖະກິດ-ສັງຄົມຮອບດ້ານ ພາຍໃນແຂວງ ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການຊີ້ນຳ-ນຳພາ ການບໍລິຫານການປົກຄອງຂັ້ນແຂວງ-ເມືອງ ທີ່ໄດ້ເອົາໃຈໃສ່ການຜັນຂະຫຍາຍ ແລະ ຈັດຕັ້ງປະຕິບັດ ມະຕິ X ຂອງພັກ, ປີທຳອິດ ຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຈົນເຮັດໃຫ້ແຂວງມີຜົນສໍາເລັດຫຼາຍດ້ານ, ແນວໃດກໍ່ດີ ໃນໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ຊີ້ນໍາ ແລະ ເນັ້ນໜັກໃຫ້ການນໍາແຂວງ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ:
(1) ສືບຕໍ່ຄຸ້ມຄອງເສດຖະກິດມະຫາພາກ ໃຫ້ມີສະຖຽນລະພາບໝັ້ນທ່ຽງ ເພື່ອຮັບປະກັນໃຫ້ເສດຖະ ກິດທົ່ວປະເທດ ມີການຂະຫຍາຍຕົວບໍ່ຫຼຸດ 7% ໂດຍສືບຕໍ່ຍູ້ແຮງການຜະລິດເປັນ ສິນຄ້າ, ການບໍລິການ, ສົ່ງເສີມການລົງທຶນ, ຍົກປະສິດທິພາບຂອງແຮງງານ ແລະ ຄຸ້ມຄອງລັດ ໃຫ້ມີປະສິດທິພາບ ໂດຍສະເພາະ ການຈັດຕັ້ງປະຕິບັດບັນດານິຕິກຳ ທີ່ພັກ ແລະ ລັດຖະບານວາງອອກ ໃນແຕ່ລະໄລຍະ.
(2) ສືບຕໍ່ປັບປຸງຄຸ້ມຄອງລະບົບການເງິນ-ງົບປະມານ ໃຫ້ແຂງແຮງ, ປະຕິຮູບກົນໄກການເກັບລາຍຮັບ ໃຫ້ເຂົ້າສູ່ລະບົບທັນສະໄໝ-ໂປ່ງໃສ, ເສີມສ້າງຖານລາຍຮັບໃຫ້ໝັ້ນຄົງ-ກວ້າງຂວາງ ພ້ອມທັງ ຕິດຕາມກວດກາ, ປັບປຸງກົນໄກການປະຕິບັດແຜນງົບປະມານ-ແຜນລາຍຈ່າຍ ໃຫ້ມີປະສິດທິຜົນ, ອີງໃສ່ຜົນກວດສອບ ໃຫ້ມີມາດຕະການເກັບກູ້ຄືນ ໃຫ້ເຂົ້າສູ່ງົບປະມານຢ່າງເຂັ້ມງວດ.
(3) ປັບປຸງສະພາບແວດລ້ອມ ຂອງການດຳເນີນທຸລະກິດ, ແກ້ໄຂຂັ້ນຂອດຕ່າງໆ ທີ່ບໍ່ສະດວກ, ກົດໜ່ວງ ແລະ ສ້າງຄວາມຫຍຸ້ງຍາກ ທັງເປັນການເພີ່ມຕົ້ນທຶນ ໃຫ້ແກ່ການດຳເນີນທຸລະກິດ ດ້ວຍການປະຕິບັດກົດໝາຍ ວ່າດ້ວຍການສົ່ງເສີມການລົງທຶນ ສະບັບປີ 2016 ແລະ ດຳລັດ ວ່າດ້ວຍເຂດເສດຖະກິດພິເສດ ແລະ ເຂດເສດຖະກິດສະເພາະ, ໃຫ້ແຂວງສຶກສາຄົ້ນຄວ້າຕື່ມ ອີງໃສ່ແຜນການພັດທະນາພື້ນຖານໂຄງລ່າງຂອງແຂວງ.
(4) ຊຸກຍູ້ສົ່ງເສີມການຜະລິດ ແລະ ການບໍລິການ, ສົ່ງເສີມການລົງທຶນໃສ່ການຜະລິດ-ການບໍລິການ ໂດຍສຸມໃສ່ອັນທີ່ເຮົາມີທ່າແຮງ ເປັນຕົ້ນ ດ້ານກະສິກຳ, ຍູ້ແຮງເສດຖະກິດ ຂະໜາດນ້ອຍ-ຂະໜາດກາງ, ການພັດທະນາການທ່ອງທ່ຽວ, ການບໍລິການ, ການຄ້າ, ການຂົນສົ່ງ ແລະ ອື່ນໆ, ຊຸກຍູ້ສົ່ງເສີມການຮຽຮູ້ ແລະ ການນຳໃຊ້ຄວາມຮູ້ເຕັກນິກ-ເຕັກໂນໂລຊີທັນສະໄໝ, ຍົກລະດັບຄວາມສາມາດ ຂອງທຸລະກິດຢູ່ພາຍໃນ ໃນການຄຸ້ມຄອງບໍລິຫານທຸລະກິດ ໃຫ້ສາມາດແຂ່ງຂັນ ໃນເງື່ອນໄຂແຫ່ງການເປັນປະຊາຄົມເສດຖະກິດອາຊຽນ, ການຮ່ວມມືໃນກອບ ຂອງບັນດາ ປະເທດສະມາຊິກລຸ່ມແມ່ນ້ຳຂອງ ແລະ ຄູ່ຮ່ວມພັດທະນາຕ່າງໆ.
(5) ສືບຕໍ່ສຸມໃສ່ພັດທະນາທາງດ້ານວັດທະນາ-ສັງຄົມ, ແກ້ໄຂຄວາມທຸກຍາກຂອງປະຊາຊົນ, ຍົກສູງຄຸນນະພາບການສຶກສາ-ສາທາລະນະສຸກ ໃຫ້ທົ່ວເຖິງ ໂດຍສະເພາະ ໃນເຂດຊົນນະບົດ ຫ່າງໄກສອກຫຼີກ ກໍ່ຄືເມືອງດາກຈຶງ ແລະ ເມືອງກະລຶມ ທີ່ຍັງເປັນເມືອງທຸກຍາກ, ຮ່ວມກັບບັນດາທ່າແຮງຂອງວິສາຫະກິດ ແລະ ໂຄງການໃນທ້ອງຖິ່ນ ເພື່ອປະຕິບັດວຽກງານ 3 ສ້າງ. ໃນນັ້ນ ໃຫ້ເອົາໃຈໃສ່ການສະໜອງນ້ຳສະອາດ ແລະນ້ຳເພື່ອການຜະລິດ ຍົກສູງດ້ານໂພຊະນາການ. ສິ່ງສຳຄັນ ແມ່ນຕ້ອງຍົກລະດັບຄຸນນະພາບຂອງຄູ, ປັບປຸງການຮຽນ-ການສອນ ນັບຕັ້ງແຕ່ອະນຸບານ ຈົນຮອດຂັ້ນມະຫາວິທະຍາໄລ, ແກ້ໄຂບັນຫາສິ່ງຫຍໍ້ທໍ້ຕ່າງໆ ໃຫ້ເປັນຮູບປະທຳ ລວມເຖິງການຄຸ້ມຄອງພົນລະເມືອງ, ການເຄື່ອນຍ້າຍແຮງງານ, ການປະຕິບັດນະໂຍບາຍ-ສະຫວັດດີການສັງຄົມ ຕໍ່ຜູ້ມີຜົນງານຕົວຈິງ.
(6) ສືບຕໍ່ຄົ້ນຄວ້າ, ກວດກາຄືນ ໃນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ(SDGs) ເພື່ອໃຫ້ເປັນຄາດໝາຍ, ແຜນການ, ໂຄງການລະອຽດຂອງແຕ່ລະຂະແໜງການ ແລະ ທ້ອງຖິ່ນ ເພື່ອຮັບປະກັນການຈັດຕັ້ງປະຕິບັດ ຢ່າງມີປະສິດທິຜົນ ນຳເອົາປະເທດຊາດ ຫຼຸດພົ້ນອອກຈາກປະເທດດ້ອຍພັດທະນາ ໃນປີ 2020 ໂດຍນຳໃຊ້ທ່າແຮງ ແລະ ຈຸດພິເສດພູມີປະເທດ ທີ່ມີຂອງແຂວງ.
(7) ການຄຸ້ມຄອງບໍລິຫານຂອງລັດ ເພື່ອໃຫ້ທຸກພາກສ່ວນເສດຖະກິດໃນສັງຄົມ ຕ້ອງໄດ້ປະຕິບັດກົດໝາຍ ຢ່າງເຄັ່ງຂັດ ແລະ ເຂັ້ມງວດ. ໃນນັ້ນ ແມ່ນໃຫ້ເອົາໃຈໃສ່ຕ້ານພະຍາດອາດຍາສິດ, ການສໍ້ລາດບັງຫຼວງ ໃຫ້ເປັນຮູບປະທຳ.
(8) ປັບປຸງບັນດານິຕິກໍາທີ່ຍັງບໍ່ສອດຄ່ອງ ກັບການຈັດຕັ້ງປະຕິບັດຕົວຈິງ.
(9) ການພັດທະນາ ຕ້ອງຮັບປະກັນດ້ານສິ່ງແວດລ້ອມ, ສືບຕໍ່ແກ້ໄຂຄວາມຫຍຸ້ງຍາກ ດ້ານເສດຖະ ກິດ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ.
   ນອກນັ້ນ, ກໍ່ໃຫ້ສືບຕໍ່ພົວພັນຮ່ວມມືກັບຕ່າງປະເທດ ໂດຍສະເພາະ ແຂວງເຊກອງ ທີ່ມີຊາຍແດນຕິດຈອດກັບ ສສ ຫວຽດນາມ ໂດຍການຮ່ວມກັນພັດທະນາ ເຮັດໃຫ້ມີຄວາມສະຫງົບ ຄວາມເປັນລະບຽບຮຽບຮ້ອຍ ຕາມແນວຊາຍແດນ.

   ໂອກາດດຽວກັນນີ້, ທ່ານຮອງນາຍົກລັດຖະມົນຕີ ແລະ ຄະນະ ຍັງໄດ້ໄປຢ້ຽມໂຄງການກໍ່ສ້າງຂົວຂ້າມນ້ຳເຊກອງ ຕາມເສັ້ນທາງຫຼວງແຫ່ງຊາດ ເລກທີ 16 B ທີ່ໄດ້ຮັບທຶນຊ່ວຍເຫຼືອ ຈາກປະເທດຍີ່ປຸ່ນ ມູນຄ່າກວ່າ 1,6 ຕື້ເຢັນ (ສະກຸນເງິນຍີ່ປຸ່ນ) ທີ່ຄາດວ່າຈະສໍາເລັດ ແລະ ເປີດນໍາໃຊ້ໄດ້ຢ່າງເປັນທາງການ ໃນຕົ້ນປີ 2018, ຢ້ຽມຊົມສວນສາທິດ ການປູກໜໍ່ໄມ້ເປັນສິນຄ້າ ທີ່ສູນບໍລິການເຕັກນິກກະສິກໍາ ແລະ ປ່າໄມ້ແຂວງເຊກອງ, ໂຄງການສົ່ງເສີມປູກກາເຟ ຄຸນນະພາບເຂດເມືອງທ່າແຕງ ແລະ ປູກຜັກກະລ່ຳປີເປັນສິນຄ້າ ທີ່ກຸ່ມຜະລິດ ບ້ານຫຼັກຂາວ.

                                                                 ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ.