ວັນພຸດ, 23 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ສະພາປະຊາຊົນແຂວງເຊກອງຫວນຄືນມູນເຊື້ອວັນສ້າງຕັ້ງກຳມະບານລາວ

   ຕອນເຊົ້າວັນທີ 3 ກຸມພາ 2017 ນີ້, ສະພາປະຊາຊົນ ແຂວງເຊກອງ ໄດ້ຈັດພິທີປາຖະກະຖາ ຫວນຄືນມູນເຊື້ອ ວັນສ້າງຕັ້ງອົງການສະຫະພັນກຳມະບານລາວ ຄົບຮອບ 61 ປີ (1 ກຸມພາ 1956-1 ກຸມພາ 2017) ຂຶ້ນທີ່ສະໂມສອນສະພາປະຊາຊົນແຂວງ ໂດຍໃຫ້ກຽດປາຖະກະຖາຂອງທ່ານ ນີສອນ ວືອິນຢ້າວ ຮອງປະທານສະພາປະຊາຊົນແຂວງເຊກອງ ຜູ້ຊີ້ນໍາ ຂົງເຂດວຽກງານອົງການຈັດຕັ້ງມະຫາຊົນ, ໃຫ້ກຽດເຂົ້າຮ່ວມມີທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ ພ້ອມດ້ວຍຄະນະຫນ່ວຍພັກ ແລະ ບັນດາສະມາຊິກອົງການກຳມະບານທີ່ຂຶ້ນກັບເຂົ້າຮ່ວມຢ່າງພ້ອມພຽງ.
   ການປາຖະກະຖາຄັ້ງນີ້ທ່ານ ນີສອນ ວືອິນຢ້າວ ໄດ້ຍົກໃຫ້ເຫັນເຖິງການກໍາເນີດ ແລະ ເຕີບໃຫຍ່ຂະຫຍາຍຕົວ ຂອງອົງການກຳມະບານລາວ ໂດຍສະເພາະຜົນງານທີ່ພົ້ນເດັ່ນໃນໄລຍະ 61 ປີທີ່ຜ່ານມາຂອງການສ້າງຕັ້ງ ແລະ ການເຄື່ອນໄຫວວຽກງານກຳມະບານ ທີ່ໄດ້ປະກອບສ່ວນໃນ ພາລະກິດປະຕິວັດ ອັນເປັນກຳລັງທີ່ສໍາຄັນ ປະກອບສ່ວນເຂົ້າໃນການຕໍ່ສູ້ກູ້ຊາດ ໃນແຕ່ລະໄລຍະຜ່ານມາ ລວມທັງການປະຕິບັດຫນ້າທີ່ ໃນການຜະລິດ, ສ້າງຄວາມເຂັ້ມແຂງ ເພື່ອກຸ້ມຕົນເອງ ທາງດ້ານເສດຖະກິດ ແລະ ຊີວິດການເປັນຢູ່ ຄຽງຄູ່ກັບການເຮັດຫນ້າທີ່ສູ້ຮົບ ທັງປັບປຸງກໍ່ສ້າງ ແລະ ຂະຫຍາຍການຈັດຕັ້ງຂອງຕົນ. ເຮັດໃຫ້ອົງການກໍາມະບານລາວ ນັບມື້ນັບເຕີບໃຫຍ່ຂະຫຍາຍຕົວ ແລະ ເຂັ້ມແຂງທັງທາງດ້ານການຈັດຕັ້ງປະຕິບັດ ວຽກງານວິຊາສະເພາະ ດັ່ງທີ່ພັກໄດ້ຢັ້ງຢືນວ່າ:"ໃນໄລຍະໃຫມ່ຂອງການປະຕິວັດຊົນຊັ້ນກໍາມະກອນ ແລະ ອົງການຈັດຕັ້ງກໍາມະບານ ຍິ່ງມີບົດບາດທີ່ຕັ້ງອັນສໍາຄັນທີ່ສຸດ, ອົງການກໍາມະບານເປັນຂົວຕໍ່ ທີ່ແຫນ້ນແກ່ນ ເປັນບ່ອນອີງທີ່ແຫນ້ນຫນາ ຂອງລັດທິສັງຄົມນິຍົມ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ".
ໂອກາດດຽວກັນນີ້, ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ ກໍໄດ້ຮຽກຮ້ອງມາຍັງສະມາຊິກກຳມະບານ ທົ່ວສະພາປະຊາຊົນແຂວງເຊກອງຈົ່ງສືບຕໍ່ຍຶດຫມັ້ນ ແລະ ເດີນຕາມແນວທາງປ່ຽນແປງໃຫມ່ຢ່ າງຮອບດ້ານ ທີ່ມີຫລັກການຂອງພັກ ຢ່າງຫນັກແຫນ້ນ, ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ VII ຂອງສະຫະພັນກຳມະບານລາວ, ເອົາໃຈໃສ່ຂຸດຄົ້ນກຳລັງແຮງ ສັງລວມຂອງຊາດ ສົມທົບກັບກໍາລັງແຮງສັງລວມຂອງຍຸກສະໄຫມ, ປຸກລະດົມ-ໂຄສະນາ, ສຶກສາອົບຮົມການເມືອງແນວຄິດ, ຄວາມຮູ້ວິທະຍາສາດຕ່າງໆ ປະຕິບັດບົດບາດ ເປັນຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທໍາ ຂອງກໍາມະບານ, ຊາວຜູ້ອອກແຮງງານ.
   ພ້ອມນີ້, ສະຫະພັນກຳມະບານ ຄະນະເລຂາທິການ ສະພາປະຊາຊົນແຂວງເຊກອງ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດ ເນື້ອໃນຄໍາຂັວນ 2 ດີ 5 ເປັນເຈົ້າ ຂອງສູນກາງກໍາມະບານລາວ ພ້ອມທັງເສີມຂະຫຍາຍຈຸດດີ ແລະ ແກ້ໄຂຈຸດອ່ອນ ຂໍ້ບົກຜ່ອງທີ່ຜ່ານມາ, ຕັ້ງຫນ້າຜັນຂະຫຍາຍມະຕິກອງປະຊຸມໃຫຍ່ຂອງສະຫະພັນກຳມະບານລາວ ໃຫ້ເຂົ້າສູ່ວຽກງານຕົວຈິງ, ຮັບປະກັນ 4 ບາດກ້າວບຸກທະລຸ ແລະ ປະຕິບັດຄາດຫມາຍ ກອງປະຊຸມໃຫຍ່ຂອງພັກ ໃຫ້ປະກົດຜົນເປັນຈິງ, ສຸມໃສ່ບັນດາວຽກງານ 3 ສ້າງ ຕິດພັນກັບຂະບວນການຮັກຊາດ ແລະ ພັດທະນາ ເພື່ອເຮັດໃຫ້ວຽກງານກໍາມະບານ ມີການພັດທະນາ ແລະ ເຕີບໃຫຍ່ຂະຫຍາຍຕົວ, ມີຄວາມຫນັກແຫນ້ນເຂັ້ມແຂງ ເພື່ອເປັນຕົວແບບ ໃນການປົກປ້ອງສິດ ແລະ ຜົນປະໂຫຍດອັນຊອບທໍາ ຂອງກໍາມະກອນຊາວຜູ້ອອກແຮງງານ ແນໃສ່ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນກ້າວຫນ້າຂຶ້ນເປັນກ້າວໆ.
                                                                    ຂ່າວ-ພາບ: ນາລີວັນ