ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ທ່ານ ຮອງນາຍົກລັດຖະມົນຕີ ເນັ້ນຫຼາຍບັນຫາໃຫ້ແຂວງເຊກອງສືບຕໍ່ປະຕິບັດ

  ໂອກາດມາຢ້ຽມຢາມ ແລະ ເຮັດວຽກຢູ່ແຂວງເຊກອງ ຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ພ້ອມຄະນະ ໃນລະຫວ່າງວັນທີ 7-8 ກຸມພາ 2017 ນີ້, ທ່ານສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ເນັ້ນໜັກຫລາຍບັນຫາ ໃຫ້ການນໍາທຸກຂັ້ນ ຂອງແຂວງ ຕ້ອງໄດ້ເອົາໃຈໃສ່ສືບຕໍ່ຈັດຕັ້ງປະຕິບັດ.
   ຫຼັງການຮັບຟັງການລາຍງານ ກ່ຽວກັບສະພາບລວມຂອງການພັດທະນາ ເສດຖະກິດ-ສັງຄົມ ຂອງແຂວງເຊກອງ ໃນໄລຍະ 1 ປີຜ່ານມາ ຈາກທ່ານ ຄໍາເຜີຍ ບຸດດາວຽງ ເຈົ້າແຂວງເຊກອງ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ກໍໃຫ້ກຽດໂອ້ລົມການນໍາແຂວງເຊກອງ ກ່ອນອື່ນ ທ່ານໄດ້ຍ້ອງຍໍຊົມເຊີຍ ຕໍ່ຜົນງານອັນພົ້ນເດັ່ນ ແລະ ການປະກອບສ່ວນໃນການພັດທະນາ ເສດຖະກິດ-ສັງຄົມ ຂອງແຂວງເຊກອງ ໃນໄລຍະຜ່ານມາ, ພ້ອມນັ້ນ ກໍ່ໄດ້ເນັ້ນໜັກຫລາຍບັນຫາໃຫ້ແຂວງເຊກອງ ຕ້ອງໄດ້ເອົາໃຈໃສ່ ສືບຕໍ່ຈັດຕັ້ງປະຕິບັດ ໂດຍເນັ້ນຫນັກໃຫ້ອໍານາດການປົກຄອງທຸກຂັ້ນ ຢູ່ພາຍໃນແຂວງ ໄດ້ເອົາໃຈໃສ່ເຊື່ອມຊຶມ ແລະ ຈັດຕັ້ງຜັນຂະຫຍາຍມະຕິ, ຄໍາສັ່ງ, ຂໍ້ກໍານົດ, ນິຕິກໍາຕ່າງໆຂອງພັກ ແລະ ລັດຖະບານໃຫ້ປະກົດຜົນເປັນຈິງ ເປັນຕົ້ນ ເອົາໃຈໃສ່ສືບຕໍ່ເສີມຂະຫຍາຍວຽກງານ 3 ສ້າງໃຫ້ເຂົ້າສູ່ລວງເລິກ ຕິດພັນກັບການພັດທະນາຊີວິດການເປັນຢູ່ຂອງປະຊາຊົນ ໃຫ້ດີຂຶ້ນກວ່າເກົ່າ, ເນັ້ນໜັກວຽກງານ ປກຊ-ປກສ ຮັກສາຄວາມສະຫງົບ ປອດໄພໃຫ້ໄດ້ໂດຍພື້ນຖານ ເພື່ອເຮັດໃຫ້ແຂວງ ມີສະຖຽນລະພາບທາງດ້ານການເມືອງແນວຄິດ ຢ່າງຫນັກແຫນ້ນ, ສັງຄົມມີຄວາມສະຫງົບມີຄວາມເປັນລະບຽບຮຽບຮ້ອຍ, ພ້ອມກັນປົກປັກຮັກສາ ມູນເຊື້ອວິລະຊົນຮັກຊາດ, ຮັກສາມູນເຊື້ອດຸຫມັ່ນຂະຫຍັນພຽນ ຖືເອົາການປູກ-ການລ້ຽງເປັນຫຼັກ ໂດຍອີງໃສ່ທ່າແຮງບົ່ມຊ້ອນ ຂອງແຂວງ ແລະ ຄວາມຕ້ອງການຂອງຕະຫລາດ, ພ້ອມທັງສົ່ງເສີມການລົງທຶນທັງພາຍໃນ ແລະ ຕ່າງປະເທດໃຫ້ຫລາຍຂຶ້ນ.

   ໂອກາດດຽວກັນນີ້, ທ່ານ ຮອງນາຍົກ ຍັງໄດ້ນໍາເອົາເຄື່ອງຮັບໃຊ້ຫ້ອງການປະເພດຄັອມພິວເຕີ ຈໍານວນ 5 ຊຸດ ແລະເງິນສົດ 100 ລ້ານກີບ ມອບໃຫ້ແຂວງເຊກອງ, ກ່າວມອບໂດຍທ່ານ ສອນໄຊ ສີພັນດອນ ກ່າວຮັບໂດຍ ທ່ານ ຄໍາເຜີຍ ບຸດດາວຽງ, ເພື່ອເປັນ ທຶນຮອນນໍາໃຊ້ເຂົ້າໃນການສ້າງສາພັດທະນາແຂວງເຊກອງໃຫ້ມີການພັດທະນາຂຶ້ນເປັນກ້າວໆ.

                                                                                   ຂ່າວ-ພາບ: ນາລີວັນ