ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ແຂວງເຊກອງ ເຜີຍແຜ່ເອກະສານ ນໍາພາແນວຄິດການຮ່ວມມືກັບສະຫະລັດ

   ວັນທີ 24 ມັງກອນ 2017 ແຂວງເຊກອງ ໄດ້ຈັດກອງປະຊຸມ ເຜີຍແຜ່ເອກະສານ ແນວຄິດພາຍໃນ ກ່ຽວກັບການພົວພັນຮ່ວມມື ລະຫວ່າງ ສປປ ລາວ ກັບ ສະຫະລັດອາເມລິກາ ໃນເງື່ອນໄຂໃໝ່ ໂດຍພາຍໃຕ້ການເປັນປະທານຂອງທ່ານ ປອ ຄຳພຽມ ບົວລະພາ ຮອງເລຂາພັກ ແຂວງເຊກອງ, ມີຄະນະປະຈຳພັກແຂວງ, ກຳມະການພັກແຂວງ, ເລຂາຄະນະໜ່ວຍພັກ, ຫົວໜ້າ-ຮອງພະແນກ, ຫ້ອງການ ແລະ ລັດວິສາຫະກິດອ້ອມຂ້າງແຂວງ ເຂົ້າຮ່ວມຮັບຟັງ.
   ໃນກອງປະຊຸມ ທ່ານ ຄຳພຽມ ບົວລະພາ ກ່າວວ່າ: ລາວ ແລະ ອາເມລິການ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 10 ສິງຫາ 1955 ຊຶ່ງການພົວພັນໃນອະດີດ ແມ່ນເຕັມໄປດ້ວຍ ຄວາມຫຍຸ້ງຍາກສັບສົນ ທີ່ເກີດຈາກບາດແຜຂອງສົງຄາມ, ພາຍຫຼັງປະເທດຊາດ ໄດ້ຮັບການປົດປ່ອຍ ສ້າງຕັ້ງເປັນ ສປປ ລາວ, ປີ 1975 ທັງສອງຝ່າຍ ໄດ້ເລີ່ມມີການຮ່ວມກັນ ໃນດ້ານມະນຸດສະທຳ ດ້ວຍການຂຸດຄົ້ນສິ່ງເສດເຫຼືອທະຫານອາເມລິກາ ທີ່ຫາຍສາບສູນ ໃນປາງສົງຄາມ ແລະ ໄດ້ຖືເອົາໝາກຜົນຂອງການຮ່ວມມືດ້ານມະນຸດສະທຳນີ້ ເປັນພື້ນຖານຂອງການປັບປຸງ ການພົວພັນຮ່ວມມື ລະຫວ່າງ ສອງປະເທດໃນເວລາຕໍ່ມາ ຈົນເຖິງປັດຈຸບັນນີ້.
   ນັບແຕ່ປີ 1989 ເປັນຕົ້ນມາ ສປປ ລາວ ແລະ ສະຫະລັດອາເມລິກາ ໄດ້ມີການພົວພັນຮ່ວມມື ໃນຫຼາຍຂົງເຂດວຽກງານຄື: ດ້ານການເມືອງ, ການທະຫານ, ການຄ້າ ແລະ ການລົງທຶນ ແລະ ດ້ານການສຶກສາ… ຊຶ່ງໃນການພົວພັນດັ່ງກ່າວ ສອງຝ່າຍໄດ້ສ້າງກົນໄກຕິດຕາມ. ຊຸກຍູ້ແບບປົກກະຕິ ໂດຍໄດ້ຜັດປ່ຽນກັນ ຈັດຕັ້ງກອງປະຊຸມວິຊາການ ເພື່ອປຶກສາຫາລືສອງຝ່າຍ.
   ການຈັດກອງປະຊຸມເຜີຍແຜ່ ເທື່ອນີ້ ແມ່ນເພື່ອແນໃສ່ ສຶກສາອົບຮົມ-ນຳພາການເມືອງແນວຄິດ ໃຫ້ພະນັກງານ, ສະມາຊິກພັກ, ທະຫານ, ຕຳຫຼວດ ແລະ ປະຊາຊົນບັນດາເຜົ່າທຸກຊັ້ນຄົນຮັບຮູ້ ແລະ ເຂົ້າໃຈ ມີສະຕິລະວັງຕົວ, ເປັນເຈົ້າຕົນເອງ, ອອກແຮງປັບປຸງອົງການຈັດຕັ້ງຕ່າງໆ ຂອງພັກ-ລັດເຮົາ ໃຫ້ມີຄວາມເຂັ້ມແຂງ, ມີຄວາມສາມາດພຽງພໍ ຕ້ານທຸກກົນອຸບາຍຂອງສັດຕູ ເພື່ອນຳເອົາຜົນປະໂຫຍດມາໃຫ້ແກ່ປະເທດຊາດ ແລະ ປະຊາຊົນບັນດາເຜົ່າ, ຮັບປະກັນຄວາມສະຫງົບ ປອດໄພ ແລະ ຄວາມໝັ້ນຄົງ ຂອງປະເທດຊາດ.