ວັນຈັນ, 19 ພະຈິກ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ອົງການຈັດຕັ້ງມະຫາຊົນເມືອງທ່າແຕງ ສືບຕໍ່ຂະຫຍາຍພັກ

 

     ຈາກຜົນສໍາເລັດ ໃນການປະຕິບັດ 6 ມາດຖານ ແລະ 5 ເງື່ອນໄຂ ຕາມກົດລະບຽບຂອງພັກ, ໜ່ວຍພັກ ອົງການຈັດຕັ້ງມະຫາຊົນ ເມືອງທ່າແຕງ ໄດ້ຮັບມະຫາຊົນກ້າວໜ້າ 3 ສະຫາຍເຂົ້າເປັນສະມາຊິກພັກ ສຳຮອງ ແລະ ເລື່ອນສະມາຊິກພັກສຳຮອງ 8 ສະຫາຍ ເປັນສະມາຊິກພັກສົມບູນ, ເຊິ່ງພິທີດັ່ງກ່າວ ໄດ້ຈັດຂື້ນ ໃນທ້າຍອາທີດຜ່ານມານີ້ ຢູ່ທີ່ຫ້ອງປະຊຸມຊັ້ນ II ຫ້ອງວ່າການປົກຄອງ ເມືອງທ່າແຕງ ໂດຍມີສະຫາຍ ລົດແກ້ວ ເພັງພູນສະຫັດ ຮອງເລຂາພັກເມືອງ ຜູ້ຊີ້ນໍາອົງການຈັດຕັ້ງມະຫາຊົນ, ສະຫາຍ ນາງ ມະໄລທອງ ວົງນາດ ກຳມະການພັກເມືອງ ເລຂາໜ່ວຍພັກ ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກ ສົມບູນ-ສໍາຮອງ ແລະ ແຂກຖືກເຊີນເຂົ້າຮ່ວມ.
     ທ່ານ ນາງ ມະໄລທອງ ວົງນາດ ກໍາມະການພັກເມືອງ ເລຂາໜ່ວຍພັກ ອົງການຈັດຕັ້ງມະຫາຊົນ ເມືອງທ່າແຕງ ກ່າວວ່າ: ຄະນະໜ່ວຍພັກໄດ້ເອົາໃຈໃສ່ ໃນການປັບປຸງ ກໍ່ສ້າງ ແລະ ຂະຫຍາຍພັກ ໂດຍເນັ້ນໃຫ້ ໄດ້ທັງປະລິມານ ແລະ ຄຸນນະພາບ ໂດຍໃນໄລຍະຜ່ານມາ ສຸມໃສ່ ສຶກສາອົບຮົມ ແລະ ກໍ່ສ້າງມະຫາຊົນກ້າວໜ້າ ຜ່ານຂະບວນການທົດສອບ ພຶດຕິກຳຕົວຈິງ ຂອງວຽກງານ ເຊິ່ງໄດ້ຜົນງານບຸກຄົນທີ່ມີການເຄື່ອນໄຫວ ຖືກຕ້ອງ ແລະ ສອດຄ່ອງ ຕາມກົດລະບຽບຂອງພັ ກປະຊາຊົນປະຕິວັດລາວ ວາງອອກ ຈິ່ງສາມາດຮັບເຂົ້າເປັນສະມະຊິກພັກ ສະໄໝສໍາຮອງ 3 ສະຫາຍຄື: ສະຫາຍ ນາງ ອຳພອນ ວິລະນາ, ສະຫາຍ ກິນລະດາ ສີລາເພັດ ແລະ ສະຫາຍ ສະເໜ່ ບຸນມາວົງ ພ້ອມດຽວກັນນີ້ ກໍ່ໄດ້ເລື່ອນ ສະມະຊິກພັກສໍາຮອງ ຂື້ນສົມບູນຈໍານວນ 8 ສະຫາຍຄື: ນາງ ບຸນມາ ຢິນໄກຢາ, ສະຫາຍ ນາງ ຈັນສະໝອນ ແກ້ວຜິວພັນ, ສະຫາຍ ນາງ ນິດຕະຍາ ສີສັກ, ສະຫາຍ ນາງ ດາລາພອນ ວັນນະແສງ ແລະ ສະຫາຍ ວິສັນ ມະນີວົງ. 
     ໂອກາດນີ້ ສະຫາຍ ລົດແກ້ວ ເພັງພູນສະຫັວດ ຮອງເລຂາພັກເມືອງ ຜູ້ຊີ້ນໍາ ອົງການຈັດຕັ້ງມະຫາຊົນ ໄດ້ໃຫ້ກຽດໂອ້ລົມ ໂດຍເນັ້ນໃຫ້ ສະມາຊິກພັກ ທັງ ສົມບູນ ແລະ ສຳຮອງ ທຸກສະຫາຍ ພ້ອມກັນ ປະຕິບັດກົດລະບຽບຂອງພັກ ຢ່າງເຂັ້ມງວດ, ເປັນເຈົ້າການ ເອົາໃຈໃສ່ ກຳແໜ້ນ 5 ຫຼັກການ 3 ທິດນຳ 5 ໜ້າທີ່ 6 ສິດ ແລະ 9 ຂໍ້ຫ້າມຂອງພັກວາງອອກ ຢ່າງເຂັ່ງຄັດ, ປະຈຸບັນ ໜ່ວຍພັກອົງການຈັດຕັ້ງມະຫາຊົນ ເມືອງທ່າແຕງ ມີສະມາຊິກພັກ ທັງໝົດ 17 ສະຫາຍ, ຍິງ 9 ສະຫາຍ, ໃນນີ້ ສະມາຊິກພັກສຳຮອງ ມີ 3 ສະຫາຍ, ຍິງ 1 ສະຫາຍ.

 

ຂ່າວ-ພາບ: ພອນ ບຸນອຸທິດ TEL: 020 5632 8844.