ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ເຊກອງ ເຊັນສັນຍາພັດທະນາໂຄງການເຂື່ອນໄຟຟ້າຂະນາດນອ້ຍ 15 MW

 

 

 

   ພິທີເຊັນສັນຍາພັດທະນາໂຄງການ ເຂື່ອນໄຟຟ້ານ້ຳຕົກ ຫວ້ຍໄຕຣ 1 ( ຕອນເທິງ ) ເມືອງກະລືມ ແຂວງເຊກອງ ລະຫວ່າງກຸ່ມບໍລິຫົງຄຳພາກໃຕ້ ກັບ ພະແນກແຜນການ ແລະ ການລົງທືນແຂວງເຊກອງ ໄດ້ມີຂື້ນໃນວັນທີ່ 26 ພຶດສະພາ 2017 ນີ້ ຢູ່ທີ່ໂຮງແຮມຫົງຄຳ ແຂວງເຊກອງ ໂດຍການເຂົ້າຮວ່ມຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ຜູ້ຊີ້ນຳຂົງເຂດວຽກງານເສດຖະກິດ, ມີປະທານກຸ່ມບໍລິສັດຫົງຄຳພາກໃຕ້, ມີເຈົ້າເມືອງ-ຮອງເຈົ້າເມືອງກະລຶມ, ເຈົ້າເມືອງລະມາມ, ພະແນການທີີ່ກ່ຽວຂ້ອງອ້ອມຂ້າງແຂວງ ພອ້ມດວ້ຍພະນັກງານວິຊາການພາຍໃນບໍລິສັດ ແລະພະແນກແຜນການ ແລະ ການລົງທືນແຂວງເຂົ້າຮວ່ມຢ່າງພ້ອມພຽງ.
   ທ່ານ ສົມໝາຍ ແກ້ວມີສີ ທີ່ປຶກສາ ກຸ່ມບໍລິສັດຫົງຄຳພາກໃຕ້ກ່າວວ່າ: ບໍລິສັດ ມີຄວາມຕອ້ງການພັດທະນາເສດຖະກິດ-ສັງຄົມແຂວງເຊກອງ ໃຫ້ມີຄວາມກ້າວໜ້າໄປຢ່າງໝັ້ນຄົງ ເວົ້າສະເພາະກໍໍຄືການພັດທະນາໂຄງການເຂື່ອນໄຟຟ້ານ້ຳຕົກ ຂະນາດນອ້ຍ 15 MW, ຫ້ວຍໄຕຣ 1 ( ຕອນເທີງ ) ເມືອງກະລຶມ ແຂວງເຊກອງ ເພື່ອຜະລິດ ແລະ ຈຳໝ່າຍພະລັງງານໄຟຟ້າໃຫ້ພຽງພໍ ແລະ ທົ່ວເຖິງ ມາຕອບສະໜອງຄວາມຮຽກຮ້ອງຕ້ອງການ ຂອງໂຮງຈັກ, ໂຮງງານອຸດສາຫະກຳຕ່າງໆ ພາຍໃນແຂວງ ແລະ ເພື່ອຫຼຸດຜ່ອນການນຳເຂົ້າໄຟຟ້າຈາກຕ່າງປະເທດ ທີ່ມີລາຄາແພງ, ພາຍຫຼັງທີ່ໂຄງການນີ້ສຳເລັດແລ້ວ ຈະສາມາດຕອບສະໜອງພະລັງງານໄຟຟ້າ ໃຫ້ແກ່ແຂວງເຊກອງ ແລະ ເຂົ້າໃນການພັດທະນາທ້ອງຖິ່ນແບບຍືນຍົງ, ສົ່ງເສີມທຸລະກິດພາຍໃນທ້ອງຖີ່ນ ໃຫ້ມີການຂະຫຍາຍຕົວ, ສ້າງວຽກເຮັດງານທຳໃຫ້ແກ່ປະຊາຊົນບັນດາເຜົ່າ ລວມທັງສ້າງສີມືແຮງງານ, ຄວາມຮູ້, ເຕັກໂນໂລຊີໃຫ້ແກ່ພະນັກງານວິຊາການ ຂອງພາກລັດ, ເຮັດໃຫ້ລັດໄດ້ຮັບຜົນປະໂຫຍດ ຈາກການສຳປະທານທີ່ດິນ, ພັນທະດ້ານພາສີ ແລະອາກອນຕ່າງໆ ທັງເຮັດໃຫ້ສະຖຽນລະພາບ ຂອງລະບົບໄຟຟ້າພາຍໃນແຂວງ ນັບມື້ນັບດີຂື້ນ.
   ໂອກາດນີ້ ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ກໍໄດ້ກ່າວວ່າ: ພິທີຄັ້ງນີ້ ແມ່ນສະແດງເຖິງຄວາມເຊື່ອໝັ້ນຂອງພາກລັດ ຂັ້ນແຂວງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆ ທີ່ມີຕໍ່ກຸ່ມບໍລິສັດຫົງຄຳພາກໃຕ້ ສະນັ້ນ ຮຽກຮອ້ງມາຍັງບໍລິສັດ ຈົ່ງໄດ້ເອົາໃຈໃສ່ ບັນລຸຕາມສັນຍາພັດທະນາໂຄງການທີ່ວາງໄວ້, ປະຕິບັດຕາມມາດຕະຖານເຕັກນິກ ໄຟຟ້າລາວວາງອອກ, ວາງແຜນຄິດໄລ່ກຳລັງຕິດຕັ້ງທີ່ແນ່ນອນ ເພື່ອຮັບປະກັນຄຸນນະພາບ, ໃຫ້ບໍລິສັດເອົາໃຈໃສ່ ໃນການແກ້ໄຂບາງຂໍ້ຄົງຄ້າງ, ພັດທະນາ ເພື່ອຊຸກຍູ້ຊີວິດການເປັນຢູ່ຂອງປະຊາຊົນ ໂດຍສະເພາະເຂດການຜະລິດຂອງປະຊາຊົນ ທີ່ຢູ່ໃນຂອບເຂດໂຄງການ ໃຫ້ມີຜົນສຳເລັດ ພອ້ມນີ້ກໍໃຫ້ພາກສວ່ນທີ່ກ່ຽວຂອ້ງແຕ່ລະຂັ້ນ ເອົາໃຈໃສ່ໃນການກະຕຸກຊຸກຍູ້ ການພັດທະນາ, ເອົາໃຈໃສ່ຕິດຕາມ, ປະເມີນຜົນໂຄງການເປັນປົກກະຕິຕໍ່ເນື່ອງ ເພື່ອພອ້ມກັນຊຸກຍູ້ດ້ານດີ ແລະ ແກ້ໄຂບັນດາຂໍ້ຫຍຸ້ງຍາກ ໃຫ້ມີຜົນສຳເລັດ. ຫຼັງຈາກນັ້ນ ໃນພິທີກໍໄດ້ມີການລົງນາມເຊັນສັນຍາ ພັດທະນາໂຄງການ ຢ່າງເປັນທາງການ ຕ່າງໜ້າໃຫ້ແຂວງເຊກອງ ໂດຍແມ່ນ ທ່ານ ທອງຄຳ ມະນີວົງ ກໍາມະການພັກແຂວງ ຫົວໜ້າພະແນກແຜນການ ແລະ ການລົງທືນແຂວງເຊກອງ ແລະ ຕາງໜ້າບໍລິສັດ ໂດຍແມ່ນ ທ່ານ ນາງ ແກ່ນຈັນ ບຸດດາວົງ ປະທານກຸ່ມບໍລິສັດຫົງຄຳພາກໃຕ້ ໂດຍມີ ຮອງເຈົ້າແຂວງ, ເຈົ້າເມືອງກະລືມ- ລະມາມ ແລະ ພາກສວ່ນກ່ຽວຂອ້ງອອ້ມຂ້າງແຂວງ ຊອ້ງໜ້າ ເພື່ອເປັນສັກຂີພິຍານໃນການເຊັນສັນຍາຄັ້ງນີ້.
                                                                                ຂ່າວພາບ:: ນາລີວັນ