ວັນພຸດ, 20 ມິຖຸນາ 2018

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ລະນຶກວັນກໍາມະກອນສາກົນ ຄົບຮອບ 132 ປີ

k1

 

          ໃນວັນທີ 30 ເມສາ  ນີ້ສະຫະພັນກໍາມະບານແຂວງ ເຊກອງ  ໄດ້ຈັດພິທີປາຖະກະຖາ  ວັນກໍາມະກອນສາກົນ ຄົບຮອບ 132 ປີ  ( 1/5/1886-15/2018 ) ຂຶ້ນຢູ່ທີ່ສະໂມສອນຂອງແຂວງ   ໂດຍການເປັນປະທານ ຂອງທ່ານ ສີດາ ສຸວັນນະສາຍ ຮອງເຈົ້າແຂວງ, ຊີ້ນໍາວຽກງານອົງການຈັດຕັ້ງມະຫາຊົນ , ມີທ່ານ ວົງເດືອນ ຈັນທະບຸດຊຽງ ປະທານສະຫະພັນກໍາມະບານແຂວງ, ພ້ອມດ້ວຍຄະນະບໍລິຫານງານ ສະຫະພັນກໍາມະບານແຂວງ ແລະ ຕາງໜ້າໃຫ້ສະມາຊິກກໍາມະບານ ຈາກໜ່ວຍຮາກຖານອ້ອມຂ້າງແຂວງເຂົ້າຮ່ວມຢ່າງພ້ອມພຽງ.
          ທ່ານ ສີດາ ສຸວັນນະສາຍ ຮອງເຈົ້າແຂວງ-ແຂວງເຊກອງ ໄດ້ໃຫ້ກຽດເລົ່າຄືນເຖິງປະຫວັດແຫ່ງການກໍາເນີດ, ການເຕີບໃຫຍ່ຂະຫຍາຍຕົວ, ທາດແທ້ ແລະ ມູນເຊື້ອອັນສະຫງ່າງາມຂອງຂະບວນການກໍາມະກອນສົກົນ ກໍຄືກໍາມະກອນລາວໃນແຕ່ລະໄລຍະ ຊຶ່ງວັນທີ 1 ພຶດສະພາ  ແມ່ນວັນທີ່ມີຄວາມໝາຍ  ທາງປະຫວັດສາດ  ອັນໃັຍ່ຫຼວງ ຂອງກໍາມະກອນທົ່ວໂລກ, ເຊິ່ງໃນເມື່ອກ່ອນ ຊົນຊັ້ນກໍາມະກອນ ຕົກຢູ່ພາຍໃຕ້ ການປົກຄອງຂອງນາຍທຶນ, ຖືກກົດຂີ່ຂູດຮີດຢ່າງໜັກໜ່ວງ, ບັງຄັບໃຫ້ເຮັດວຽກມື້ໜຶ່ງ  14-15 ຊົ່ວໂມງ,  ການອອກແຮງງານສຸດທີ່ລໍາບກ, ມີຄວາມສ່ຽງສູງຕໍ່ຊີວິດ,  ເນື່ອງຈາກລະບົບປ້ອງກັນ  ໄພຂອງເຄື່ອງຈັກເວລານັ້ນບໍ່ທັນມີ, ບວກກັບນາຍທຶນ ເພີ່ມທະວີການບັງຄັບຂົ່ມເຫັງ  ໃຫ້ອອກແຮງງານ ໂດຍບໍ່ມີການພັກຜ່ອນ, ອອກແຮງງານໜັກ  ແຕ່ຄ່າແຮງງານຖືກ,  ສະຫວັດດີການ-ສັງຄົມບໍ່ມີ,  ສະນັ້ນ  ຈຶ່ງພາໃຫ້ເກີດມີຂໍ້ຂັດແຍ່ງຂຶ້ນ ແລະ ເປັນເງື່ອນໄຂໃຫ້ກໍາມະກອນ  ແລະ  ຊາວຜູ້ອອກແຮງງານຈັດຕັ້ງເປັນກຸ່ມ,  ເປັນຂະບວນ  ລຸກຮື້ຂຶ້ນຕໍ່ສູ້ກັບຊົນຊັ້ນນາຍທຶນແນໃສ່  ທວງໃຫ້ພວກນາຍທຶນ ເພີ່ມເງິນເດືອນ, ຫຼຸດຜ່ອນຊົ່ວໂມງເຮັດວຽກລົງ  ແລະ ຂະບວນການຕໍ່ສູ້ດັ່ງກ່າວ ເກີດຂຶ້ນກ່ອນໝູ່ໃນປະເທດອັງກິດ ລະຫວ່າງປີ 1764 ,ຈາກນັ້ນ ຂະບວນການຕໍ່ສູ້ຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານຈຶ່ງນັບມື້ມີການຂະຫຍາຍຕົວຢ່າງກວ້າງຂວາງໄປໃນທຸກໆປະເທດທົ່ວໂລກ. 

          ຕໍ່ສະພາບການຄືແນວນັ້ນ ວັນທີ 1 ພຶດສະພາ 1889  ກອງປະຊຸມພັກກອມມູນິດ ສາກົນຄັ້ງທີ 2 ໄດ້ໄຂຂື້ນຢູ່ທີ່ນະຄອນຫຼວງປາຣີ (ປະເທດຝຣັ່ງ) ໂດຍຖືເອົາຄໍຂັວນ ມື້ໜຶ່ງເຮັດວຽກ 8 ຊົ່ວໂມງ ກໍານົດເອົາວັນທີ 1 ພຶດສະພາ ປີ1886 ເປັນວັນກໍາມະກອນສາກົນ  ແຕ່ນັ້ນມາ  ວັນທີ 1 ພຶສະພາ ຂອງທຸກໆປີ  ຈຶ່ງໄດ້ກາຍເປັນວັນບຸນ ໃຫຍ່ຂອງຊົນຊັ້ນ  ກໍາມະກອນໃນທົ່ວໂລຫ; ສະເພາະໃນ ສປປ ລາວ ໃນທຸກໆປີ  ຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ  ກໍໄດ້ຈັດຕັ້ງງານໂຮມຊຸມນຸມໃຫຍ່ ເພື່ອລະນຶກເຖິງມູນເຊື້ອ ສາມັກຄີຕໍ່ສູ້ ຂອງຊາວກໍາມະກອນ ເພື່ອເປັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ອອກແຮງງານ ແລະ ທັງເປັນການປົກປັກຮັກສາສັນຕິພາບຂອງໂລກເປັນຂີດໝາຍອັນສໍາຄັນຂອງຊົນຊັ້ນກໍາມະກອນ.
          ທ່ານ ສີດາ ສຸວັນນະສາຍ ຮອງເຈົ້າແຂວງ ໄດ້ກ່າວຕື່ມວ່າ: ການປາຖະກະຖາ ວັນກໍາມະກອນສາກົນໃນຄັ້ງນີ້ ເພື່ອເປັນການປຸກລະດົມ ໃຫ້ສະມາຊິກກໍາມະບານ, ກໍາມະກອນ ແລະຊາວຜູ້ອອກແຮງງານ ໂດຍສະເພາະແມ່ນພະນັກງານ-ລັດຖະກອນທຸກຄົນ ເຫັນໄດ້ຄວາມໝາຍຄວາມສໍາຄັນຂອງວັນທີ 1 ພຶດສະພາ ແລະ ທັງເປັນການຍົກລະດັບຄວາມຮູ້,ຄວາມເຂົ້າໃຈຕໍ່ວຽກງານກໍາມະບານ ເພື່ອແນໃສ່ຄົ້ນຄວ້າຮໍ່າຮຽນກົດໝາຍຂອງລັດ, ກົດໝາຍຂອງກໍາມະບານລາວ ທັງນີ້ເພື່ອເຮັດໃຫ້ອົງການຈັດຕັ້ງກໍາມະບານລາວມີຄວາມເຕີບໃຫຍ່ເຂັ້ມແຂງທາງດ້ານປະລິມານ ແລະຄຸນນະພາບ.

#ພາບ-ຂ່າວ: ພຸດທະສອນ