ວັນຈັນ, 21 ຕຸລາ 2019

ເອກະລັກເຜົ່າ ເສົາຫລັກເມືອງ ດິນແດນເຮືອງກາເຟ ໝາກແໜ່ງ ແຫຼ່ງພະລັງນໍ້າຕົກ ດິນດໍາດົກແຮ່ທາດ ມີຄ້ອງປະຮາດຕີວົງ ສົ່ງສຽງແຄນ ແດນວິລະຊົນ

ປີນີ້ ແຂວງເຊກອງ ຈະໃຫ້ປະຊາຊົນມີລາຍຮັບກວ່າ 12 ລ້ານກີບ

     ແຂວງເຊກອງ ຕັ້ງເປົ້າໝາຍໃນປີ 2017 ຈະໃຫ້ປະຊາຊົນ ມີລາຍຮັບສະເລ່ຍຕໍ່ປີ 12 ລ້ານກວ່າກີບຕໍ່ຄົນ, ສ້າງມູນຄ່າເພີ່ມໃຫ້ໄດ້ 1 ພັນກວ່າຕື້ກີບ ລວມຍອດຜະລິດຕະພັນພາຍໃນ ຂະຫຍາຍຕົວ 9,1%.
    ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ໃຫ້ຮູ້ວ່າ: ຄາດໝາຍສູ້ຊົນ ແຜນພັດທະນາເສດຖະກິດ-ສັງຄົມ ໃນປີ 2017 ແມ່ນເປັນປີທີສອງ ຂອງການຈັດຕັ້ງປະຕິບັດມະຕິ X ຂອງພັກ, ມະຕິ IX ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ 2016-2020 ຂອງແຂວງວາງອອກ ສະນັ້ນ ເພື່ອໃຫ້ບັນລຸ ແຜນການທີ່ວາງໄວ້ ຕ້ອງສູ້ຊົນເຮັດໃຫ້ລວມຍອດຜະລິດຕະພັນພາຍໃນ GDP ເພີ່ມຂຶ້ນໃນລະດັບ 9,1% ແລະ ສ້າງມູນຄ່າເພີ່ມໃຫ້ໄດ້ 1.507 ຕື້ກີບ ສະເລ່ຍລາຍຮັບຂອງປະຊາຊົນ ໃຫ້ໄດ້ 12,9 ລ້ານກີບ ຫຼື ປະມານ 1.615 ໂດລາສະຫະລັດ ທີ່ຄາດວ່າຈະມີພົນລະເມືອງທັງໝົດ ປະມານ 1 ແສນກວ່າຄົນ.
    ໃນນັ້ນ, ຂະແໜງກະສິກຳ-ປ່າໄມ້ ເພີ່ມຂຶ້ນ 8% ກວມປະມານ 38,1%; ຂະແໜງອຸດສາຫະກຳ ເພີ່ມຂຶ້ນ 7,5% ກວມ 22,3% ແລະ ຂະແໜງການບໍລິການ ເພີ່ມຂຶ້ນ 11% ກວມປະມານ 39,6% ຂອງ GDP ພ້ອມໆກັນນັ້ນ ກໍ່ປະຕິບັດ ການເກັບລາຍຮັບເຂົ້າງົບປະມານ (ສະເພາະລາຍຮັບພາຍໃນ) ໃຫ້ໄດ້ທັງໝົດ 69 ຕື້ກີບ ທຽບໃສ່ປີ 2015-2016 ເພີ່ມຂຶ້ນ 17% ປະກອບມີ: ລາຍຮັບຈາກສ່ວຍສາອາກອນ 59,8 ຕື້ກີບ ເພີ່ມຂຶ້ນ 20%; ລາຍຮັບຈາກທີ່ດິນ 1,20 ຕື້ກີບ ເພີ່ມຂຶ້ນ 20%; ລາຍຮັບຈາກການຄຸ້ມຄອງຊັບສິນຂອງລັດ 7 ຕື້ກີບຫຼຸດລົງ 10% ແລະ ລາຍຮັບຈາກ ການເງິນວິຊາການ-ຄ່າທຳນຽມ 1 ຕື້ກວ່າກີບ.
   ຂະນະທີ່ເພດານຂອງການລົງທຶນ ທ່ານເຈົ້າແຂວງໆເຊກອງ ລະບຸວ່າ: ມີຄວາມຕ້ອງການທັງໝົດ 545,8 ຕື້ກີບ ກວມເອົາ 36,2% ຂອງ GDP ໃນນັ້ນ, ການລົງທຶນຂອງລັດ 61 ຕື້ກີບກວມເອົາ 11,2%; ທຶນຊ່ວຍເຫຼືອລ້າ-ກູ້ຢືມ 80 ຕື້ກວ່າກີບກວມ 15,0%; ທຶນຂອງພາກເອກະຊົນ 272 ຕື້ກວ່າກີບກວມເອົາ 50,0% ແລະ ທຶນສິນເຊື່ອທະນາຄານ-ສະຖາບັນການເງິນຕ່າງໆ 130 ຕື້ກີບກວມເອົາ 23,8% ຂອງມູນຄ່າການລົງທຶນທັງໝົດ.

                                                                       ( ຂ່າວ : ສັນຍາ ແກ້ວໄຊຍະວົງ )